ދަށު ކޯޓުން ނިންމާ މައްސަލައެއްގެ ހުކުމް ތަންފީޒުކޮށްދިނުން ފަސްކުރުމަށް ހައިކޯޓުގައި އެދިފައިވާނަމަ، ހައިކޯޓުން އެކަމަށް ވަކި އަމުރެއް ނުނެރުނު ނަމަވެސް ދަށުކޯޓުން ކޮށްފައިވާ ހުކުމް ތަންފީޒުކުރުން ފަސްކުރަންވާނެ ކަމަށް ހައިކޯޓުގެ ފަނޑިޔާރުންގެ މަޖިލީހުން އިއްޔެ ކަނޑައެޅި އުސޫލު ބާތިލްކޮށް، ސުޕްރިމް ކޯޓުން ޕްރެކްޓިސް ޑައިރެކްޝަންއެއް ނެރުއްވައިފި އެވެ.
ސުޕްރިމް ކޯޓުން މިއަދު ނެރުނު ޕްރެކްޓިސް ޑައިރެކްޝަންގައި ވަނީ މި އުސޫލު ތަފްސީލުކޮށްދީފަ އެވެ. ރާއްޖޭގެ ކޯޓުތަކުން ބަލަމުންގެންދާ މައްސަލަތަކުގެ ތެރެއިން މަދަނީ މައްސަލައެއްގައި ނެރެފައިވާ އަމުރެއް ނުވަތަ ހުކުމެއް ނުވަތަ ނިންމުމެއް ތަންފީޒުކުރުން ފަސްކުރުމަށް އަމުރެއް ކޮށްފައި ނުވާނަމަ އެ ހުކުމް ތަންފީޒުކުރަން ވާނެކަމަށް ސުޕްރީމް ކޯޓުގެ އެންގެވުމުގައި އޮވެ އެވެ.
މައްސަލައެއްގެ ހުކުމް ތަންފީޒުކުރުން ފަސްކުރުމަށް އެ މައްސަލައިގެ މަސްލަހަތު އޮތް ފަރާތަކުން އިސްތިއުނާފް ކޯޓެއްގައި އެދެން ވާނީ އެކަމަށް އެ ކޯޓަކުން ކަނޑައަޅާފައިވާ ފޯމަކުން ކަމަށް އެ އެންގެވުމުގައި ބުނެފައި ވެއެވެ. އަދި އަމުރެއް ނުވަތަ ހުކުމެއް ނުވަތަ ނިންމުމެއް ތަންފީޒުކުރުން ފަސްކުރުމަށް އިސްތިއުނާފް ކޯޓަކުން އަމުރުކުރުމުގައި ފަނޑިޔާރު ރިޔާއަތް ކުރަން ޖެހޭނެ ދެ ކަމެއް ބަޔާންކޮށްފައި ވެއެވެ. އެއީ؛
- އިސްތިއުނާފް ކޯޓުން އަމުރު ނުވަތަ ހުކުމް ނުވަތަ ނިންމުން ތަންފީޒުކުރުން ފަސްކޮށްނުދީފިނަމަ، އެކަމުގެ ސަބަބުން އިއާދަނުކުރެވޭނެ ގެއްލުމެއް ލިބިދާނެކަން؛ ނުވަތަ
- އަމުރު ނުވަތަ ހުކުމް ނުވަތަ ނިންމުމާ އެއްގޮތަށް އަމަލުކުރާނެ ކަމުގެ ޔަގީންކަން ދިނުމުގެ ގޮތުން ކޯޓުން ގަބޫލުކުރާ ނަމޫނާ އަކާ އެއްގޮތަށް ސެކިއުރިޓީ ހުށަހަޅާފައިވުން.
މީގެ އިތުރުން، ފަސްކުރުމަށް އެދިފައިވާ ހުކުމަކީ ފައިސާ ދެއްކުމަށް ކޮށްފައިވާ އަމުރެއް ނަމަ، ކޯޓަށް ފައިސާ ދައްކަމުން ދާ ފަރާތެއްގެ ފައިސާތައް އެއްވެސް ފަރާތަކަށް ދޫނުކޮށް ހިފެހެއްޓުމުގެ އިހްތިޔާރުވެސް މަތީ މަރުހަލާގެ ކޯޓުތަކަށް ލިބިގެންވާކަމަށް ކަމަށް ސުޕްރިމް ކޯޓުގެ ޕްރެކްޓިސް ޑައިރެކްޝަންގައި އަންގަވާފައި ވެއެވެ.
"މި ޕްރެކްޓިސް ޑައިރެކްޝަންގައިވާ ގޮތުގެމަތިން، ތަންފީޒުކުރުން ފަސްކުރުމުގެ އަމުރެއް، އަޑުއެހުމެއް ބޭއްވުމަށް ފަހު ނުވަތަ އަޑުއެހުމެއް ބޭއްވުމަކާ ނުލައި ނެރެވިދާނެ އެވެ. އަދި މައްސަލަ ރައްދުވާ ފަރާތުގެ ބަހެއް ހޯދުމެއް ނެތި، މައްސަލައިގެ ޒާތަށާއި ހުށަހެޅިފައިވާ ލިޔެކިޔުންތަކަށާއި ވަށައިގެންވާ ކަންތައްތަކަށް ރިއާޔަތްކުރުމަށް ފަހު، ތަންފީޒުކުރުން ފަސްކުރުމުގެ އަމުރެއް ނެރުމުގެ އިހްތިޔާރު އިސްތިއުނާފް ކޯޓުތަކަށް ލިބިގެން ވެއެވެ." ސުޕްރިމް ކޯޓުން ބުނެފައިވެ އެވެ.
titledesc
ހައިކޯޓުގެ 8 ފަނޑިޔާރުން ބައިވެރިވި މި ބައްދަލުވުމުގައި މި ގޮތަށް ފާސްކުރަން ނުފެންނަކަމަށް ވޯޓު ދެއްވީ ފަނޑިޔާރު ހުސައިން މަޒީދު އެކަންޏެވެ. ދެން މަޖިލީހުގައި ބައިވެރިވެވަޑައިގެންނެވީ އިސްފަނޑިޔާރު ހާތިފް ހިލްމީއާއި، ފަނޑިޔާރު އަބްދުﷲ ހަމީދާއި، ފަނޑިޔާރު ޝުއައިބް ހުސައިން ޒަކަރިއްޔާއާއި، ފަނޑިޔާރު އަބްދުއްރައޫފު އިބްރާހީމްއާއި، ފަނޑިޔާރު އަލީ ސަމީރުއާއި، ފަނޑިޔާރު ހުސައިން ޝަހީދުއާއި، ފަނޑިޔާރު ފާތިމަތު ފަރްހީޒާ އެވެ. އެ ބޭފުޅުން ވޯޓު ދެއްވީ މި ގޮތަށް ފާސްކުރަން ފެންނަ ކަމަށެވެ.
ހައިކޯޓުން އެ އެންގެވުން އިއްޔެ އާންމުކުރިއިރު، އޭގެ ކުރިން ސުޕްރީމް ކޯޓުން ނިންމާފައިވާ ނިންމުމެއްގައި ވެސް އޮންނަ ގޮތުން ހުކުމް ތަންފީޒުކުރުން އެއްވެސް ގޮތަކަށް ފަސްކުރެވޭނީ ހުކުމް ތަންފީޒުކުރުން ފަސްކުރުމަށް މަތީ މަރުހަލާގެ ކޯޓަކުން ކަނޑައެޅިގެން އަމުރެއް ކުރުމުންނެވެ.
