މި އަހަރުގެ ތިން ވަނަ ކުއާޓާގައި ދިރާގަށް ލިބުނު އާމްދަނީ ދަށަށް ގޮސްފައިވާ ކަމަށް އެ ކުންފުނިން ހާމަކޮށްފި އެވެ.
މިދިޔަ ކުއާޓަގައި ދިރާގަށް އާމްދަނީގެ ގޮތުގައި ލިބިފައި ވަނީ .610.3 މިލިއަން ރުފިޔާ އެވެ. މިއީ ދެ ވަނަ ކުއާޓާގައި ލިބުނު 617.4 މިލިއަން ރުފިޔާއާ އަޅާ ބަލާއިރު 7.1 މިލިއަން ރުފިޔާ ދަށް އަދަދެކެވެ.
ތިން ވަނަ ކުއާޓާގައި ދިރާގުގެ ސާފު ފައިދާ ވެސް ވަނީ ދެ ވަނަ ކުއާޓާއާ އަޅާ ބަލާއިރު ދަށަށް ގޮސްފަ އެވެ. ދެ ވަނަ ކުއާޓާގައި ކުންފުންޏަށް ސާފު ފައިދާގެ ގޮތުގައި 195.8 މިލިއަން ރުފިޔާ ލިބުނު އިރު، ތިން ވަނަ ކުއާޓާގެ ސާފު ފައިދާއަކީ 191.3 މިލިއަން ރުފިޔާ އެވެ.
މޯބައިލްގެ ހިދުމަތްތަކުން ތިން ވަނަ ކުއާޓާގައި ލިބިފައިވަނީ 325.6 މިލިއަން ރުފިޔާ އެވެ. ދެ ވަނަ ކުއާޓާގައި މޯބައިލް ހިދުމަތްތަކުގެ އާމްދަނީގެ ގޮތުގައި ލިބުނީ 340.4 މިލިއަން ރުފިޔާ އެވެ.
ފިކްސްޑް ބްރޯންޑް ބޭންޑްގެ ހިދުމަތްތައްކުން ތިން ވަނަ ކުއާޓާގައި 268.1 މިލިއަން ރުފިޔާ ދިރާގަށް ލިބުނު އިރު، ދެ ވަނަ ކުއާޓާގައި ލިބިފައި ވަނީ 261.3 މިލިއަން ރުފިޔާ އެވެ.
މިދިޔަ ކްއާޓާގައި ދިރާގުން ވަނީ ކުންފުނީގެ ހިންގުމުގެ ހަރަދުވެސް ދަށްކޮށްފަ އެވެ. ދެ ވަނަ ކުއާޓާގައި 234.9 މިލިއަން ރުފިޔާގައި ހުރި ހަރަދު ތިން ވަނަ ކުއާޓާގައި ހުރީ 231.5 ގަ އެވެ.
