އަފްގާނިސްތާނުގައި ހިންގާ "ފެހި މަޝްރޫއުތައް" އަލުން ހިންގައިގަތުމަށް ބޭނުންވާ ފައިސާ ބައިނަލްއަގްވާމީ ފަރާތްތަކުން ދިނުމަށް ތާލިބާނުން ގޮވާލައިފި އެވެ.
މިދިޔަ އޯގަސްޓު މަހު އަފްގާނިސްތާނުގެ ގާނޫނީ ވެރިކަން ވައްޓާލުމަށް ފަހު ސަރުކާރެއް ގާއިމްކޮށްގެން އުޅޭ ތާލިބާނުން ބައިނަލްއަގްވާމީ މުޖުތަމައިން މިހާތަނަށް ބަލައިގެންފައެއް ނުވެ އެވެ.
އެހެންކަމުން އާދީއްތަ ދުވަހުގެ ރޭ ސްކޮޓްލޭންޑުގެ ގްލާސްގޯގައި ފެށި މޫސުމީ ބަދަލާ ގުޅޭ ބައިނަލްއަގްވާމީ ބޮޑު ބައްދަލުވުން، ކޮޕް26 ގައި ބައިވެރިވުމުގެ ފުރުސަތު ތާލިބާނުންނަކަށް ނެތެވެ.
ނަމަވެސް ތާލިބާނުންގެ އިސް ޑިޕްލޮމެޓު ސުހައިލް ޝަހީން ބުނީ މިހާރު ވެސް އދ. ގެ ރުހުން ލިބިފައިވާ މޫސުމީ ބަދަލާ ގުޅޭ ޕްރޮޖެކްޓުތައް ހުއްޓާލައިގެން ނުވާނެ ކަމަށެވެ.
"އަފްގާނިސްތާނުގައި އޮންނަނީ ބަލިކަށި މޫސުމެއް. ކުރަން ޖެހޭ ބައިވަރު މަސައްކަތް އެބަ ހުރި،" ޓްވިޓާ މެދުވެރިކޮށް އޭނާ ބުންޏެވެ.
"މިހާރު ވެސް ހުއްދަ ދީގެން ކޮންމެވެސް ވަރަކަށް ފަންޑުކޮށްފައިވާ ގްރީން ކްލައިމެޓް ފަންޑު، ޔޫއެންޑީޕީ އަދި އަފްގާން އެއިޑްގެ މަޝްރޫއުތައް އަލުން ފަށައިގަންނަން ޖެހޭ."
އދ. އިން ބުނެފައި ވަނީ އަފްގާނިސްތާނަށް ވާރޭ ނުވެހި ކުރިމަތިވެފައިވާ ހަނަފަސްކަމުގެ ސިއްރަކީ މޫސުމީ ބަދަލު ކަމަށެވެ. އެކަމާ ހެދި 22 މިލިއަން މީހުންނަށް ކާބޯތަކެތި ލިބެން އޮތް މަގު ގެއްލުމުގެ ބިރު އެބަ އޮތެވެ.
ނަމަވެސް އަފްގާނިސްތާނުގެ ވެރިކަމަށް ތާލިބާނުން އައުމާއެކު ބައިނަލްއަގްވާމީ އެހީ މެދުކަނޑާލާފައި ވާތީ އެ ގައުމުގެ އިގްތިސާދު މި ވަގުތު އޮތީ ހުއްޓިފަ އެވެ.
ޝަހީން ބުނީ މަޝްރޫއުތައް ހިންގަން އަފްގާނިސްތާނަށް ދަތުރު ކުރާ އެހެން ގައުމުތަކުގެ މީހުންނަށް ތާލިބާނުންގެ ފުރިހަމަ ރައްކާތެރިކަން ލިބޭނެ ކަމަށެވެ.
"އަޅުގަނޑުމެން މި ތިބީ އަމިއްލަ ޖަމިއްޔާތަކާއި އެހީދޭ ޖަމިއްޔާތަކުން ރައްކާތެރިކަމާ އެކު މަސައްކަތް ކުރެވޭނެ މާހައުލެއް ޔަގީންކޮށްދިނުމަށް ތައްޔާރަށް."
