ޝަރުތު ހަމަނުވާ ދަރިވަރުން ކޯސްތަކުގައި ބައިވެރިކޮށް، ކަނޑައަޅާފައިވާ އުސޫލުތަކުން ބޭރުން ސަނަދު ދޫކުރާ މައްސަލައިގައި ސެންޓާ ފޯ އިންފޮމޭޝަން ޓެކްނޮލޮޖީ މެނޭޖްމަންޓު (ސީއައިޓީއެމް) ގެ މަތީ ތައުލީމު ހުއްދަތަށް މިއަދުން ފެށިގެން ބާތިލުކޮށްފި އެވެ.
ސީއައިޓީއެމްގެ ހުއްދަތައް ބާތިލުކުރުމާ ގުޅިގެން މޯލްޑިވްސް ކޮލިފިކޭޝަން އޮތޯރިޓީ (އެމްކިޔުއޭ) އިން ނެރުނު އިއުލާނުގައި ބުނީ ސީއައިޓީއެމް މަތީ ތައުލީމު ޕްރޮގްރާމުތަކުން ގިނަ މައްސަލަތަކެއް ފާހަގަކުރެވިފައިވާ ކަމަށެވެ. އަދި ދަރިވަރުން ވެއްދުމާ ކޯސްތައް ފުރިހަމަކުރާ ދަރިވަރުންނަށް ސަނަދު ދޫކުރަން އޮންނަ އުސޫލުން ބޭރުން އަމަލުކޮށްފައިވާ ކަމަށް އެމްކިޔުއޭއިން ބުންޏެވެ.
ސީއައިޓީއެމްގެ ޕްރޮގްރާމުތަކުން އެމްކިޔުއޭއަށް ފާހަގަވި މައްސަލަތައް
- ސީއައިޓީއެމްގައި ހިންގާ މަތީ ތައުލީމު ޕްރޮގްރާމުތަކަށް ޝަރުތު ހަމަނުވާ ދަރިވަރުން ވެއްދުން
- ކޯސް ނިންމާ ދަރިވަރުންނަށް ސެޓިފިކެޓް ދިނުމުގެ ކުރިން "ސުޕަވިޝަން" މަރުހަލާ ފުރިހަމަނުކުރުން
- "ސުޕަވިޝަން" މަރުހަލާ ފުރިހަމަނުކޮށް ކުރިން އޮތޯރިޓީގެ ހުއްދަ ނެތި ދަރިވަރުންނަށް ސެޓިފިކެޓް
- ސީއައިޓީއެމްގެ ޕްރޮގްރާމުތައް ފުރިހަމަކުރާ ދަރިވަރުންނަށް ސެޓިފިކެޓް ނުދިނުން
- 2014 ވަނަ އަހަރުން ފެށިގެން ކޯހުގެ ބެޗުތައް ފެށުމުގެ ކުރިން ހުށަހަޅަން ޖެހޭ ފޯމު ހުށަނޭޅުން
ސީއައިޓީއެމްގެ ހުއްދަތައް ހިފެހެއްޓި ނަމަވެސް މިހާރު ނަގާފައިވާ ބެޗުުތަކުގެ ދަރިވަރުންގެ ކިޔެވުން ކުރިޔަށް ގެންދަން އެމްކިޔުއޭގެ ހުއްދަ އެބައޮތެވެ. ނަމަވެސް އިތުރު ދަރިވަރުން ނެގޭނީ އެމްކިޔުއޭއިން ބޭނުންވާ ލިޔެކިޔުންތައް ހުށަހެޅުމުންނެވެ. އަދި މިހާރު ނަގާ އެއްވެސް ބެޗެއް ބަލައިނުގަންނަން ވަނީ ނިންމާފަ އެވެ.
އެމްކިޔުއޭއިން ވަނީ ލިޔެކިޔުންތައް ހުށަހަޅަން ސީއައިޓީއެމްއަށް މަސް ދުވަހުގެ މުހުލަތެއް ދީފަ އެވެ. މި މުއްދަތުގެ ތެރޭގައި ލިޔެކިޔުން ހުށަނާޅާނަމަ އެެ މަރުކަޒުގެ ރަޖިސްޓްރީއާ މެދު ފިޔަވަޅު އަޅަން ހަޔާ އެޑިޔުކޭޝަން މިނިސްޓްރީއަށް ހުށަހަޅާނެ ކަމަށް އެ އޮތޯރިޓީން އިލްތިމާސްކުރެ އެވެ.
ސީއައިޓީއެމްގެ ފޭސްބުކް ޕޭޖުގައި ހުރި މައުލޫމާތު ބުނާ ގޮތުން އެ މަރުކަޒުން ވަނީ 11 އަހަރުގެ ތެރޭގައި 20،000 އަށް ވުރެ ގިނަ ދަރިވަރުން ތަމްރީނުކޮށްފަ އެވެ. ހުއްދަތައް ބާތިލުކުރުމާ ގުޅިގެން ސީއައިޓީއެމްގެ ބަހެއް ހޯދަން ކުރި މަސައްކަތް ވަނީ ނާކާމިޔާބުވެފަ އެވެ.
