ތާލިބާނުންގެ ލީޑާޝިޕާ 2016 ވަނަ އަހަރު ހަވާލުވުމަށް ފަހު އެ ގްރޫޕުގެ ރޫހާނީ ލީޑަރު ހިބާތުﷲ އަހުންދްޒާދާ ފުރަތަމަ ފަހަރަށް އާއްމުންގެ ކުރިމައްޗަށް ނުކުމެއްޖެ އެވެ.
ހިބާތުﷲ ވަނީ އަފްގާނިސްތާނުގެ ދެކުނު ކަންދަހާރް ސިޓީގައި ސަޕޯޓަރުންނާ މުހާތަބުކޮށް ވާހަކަދައްކާފަ އެވެ. އޭނާ މީގެ ކުރިން އާއްމު ތަނެއްގައި އެގޮތަށް ފެނިފައެއް ނުވެ އެވެ.
މިދިޔަ އޯގަސްޓު މަހު ތާލިބާނުން ވެރިކަމަށް އައުމަށް ފަހު ވެސް ހިބާތުﷲ ނުފެނުމުން، ތާލިބާން ސަރުކާރުގައި އޭނާގެ ދައުރު އޮންނަ މިންވަރާ މެދު ސުވާލުތައް އުފެދުނެވެ. އޭގެ އިތުރުން އޭނާ މަރުވެފައިވާ ކަމަށް ވެސް އަޑުތައް ފެތުރުނެވެ.
ނަމަވެސް ހޮނިހިރު ދުވަހު ހިބާތުﷲ ވަނީ ދާރުލް އުލޫމް ހާކިމާ މަދަރުސާ އަށް ގޮސް އެ ތަނުގައި ކިޔަވާ ކުދިންނާ މުހާތަބުކޮށް ވާހަކަދައްކާފައި ކަމަށް ތާލިބާނުންގެ ސޯޝަލް މީޑިއާ އެކައުންޓުތަކުން ބުނެ އެވެ.
"ކާފަރުންނާއި އަނިޔާވެރިންނާ ދެކޮޅަށް 20 އަހަރު ވަންދެން ހަނގުރާމަ ކުރި އަފްގާނިސްތާނުގެ ރައްޔިތުންނަށް މާތް ﷲ ގެ ހެޔޮ ރަހުމަތް ލައްވާށި. އަޅުގަނޑުގެ ބޭނުމަކީ ތި އެންމެންނަށްޓަކައި ދުއާކޮށްދިނުން،" ތާލިބާނުން އާއްމުކުރި އޯޑިއޯ ރިކޯޑިންއެއްގައި ހިބާތުﷲ ބުނެފައި ވެ އެވެ.
ދިހަ މިނެޓުގެ އެ ރިކޯޑިންގައި ހިބާތުﷲ ވަނީ އަފްގާނިސްތާނު އަލުން ބިނާކުރުމުގެ "ބޮޑު އިމްތިހާނާ" ކުރިމަތިލަމުންދާ އޮފިޝަލުންނަށް ކާމިޔާބު ލިބުނަށް އެދި ވެސް ދުއާކޮށްފަ އެވެ.
ހިބާތުﷲ ޒިޔާރަތް ކުރި މަދަރުސާ ކައިރީގައި ސެކިއުރިޓީ އޮތީ ވަރަށް ބޮޑަށް ވަރުގަދަކޮށްފަ އެވެ. އޭނާ އެ ތަނުގައި އުޅޭ މަންޒަރު ފެންނަ އެއްވެސް ފޮޓޯއެއް އަދި ވީޑިއޯއެއް ވެސް އާއްމުވެފައެއް ނުވެ އެވެ.
ތާލިބާނުން ހިބާތުﷲ އަށް މުހާތަބު ކުރަނީ "އަމީރުލް މުއުމިނީން" ގެ ގޮތުގަ އެވެ. އެއީ ތާލިބާނުން އުފެއްދި މުއްލާ އުމަރަށް ވެސް އެ މީހުން މުހާތަބު ކުރި ގޮތެވެ.
