މޫސުމީ ބަދަލާ ގުޅޭ ބައިނަލްއަގްވާމީ ބޮޑު ސަމިޓު، ކޮޕް26 ފެށުމުގެ ކުރިން އެތައް ސަތޭކަ ތިމާވެށި އެކްޓިވިސްޓުން ސްކޮޓްލޭންޑުގެ ގްލާސްގޯގައި އެއްވެ، މޫސުމީ ބަދަލާ ގުޅޭ ފިޔަވަޅު އެޅުމަށް ލީޑަރުންނަށް ގޮވާލައިފި އެވެ.
އެއްވުމުގައި ސްވިޑަންގެ މަޝްހޫރު އެކްޓިވިސްޓް ގްރެޓާ ތަންބާގް ވެސް ބައިވެރިވި އެވެ. ލަންޑަނުން ގްލާސްގޯ އަށް އޭނާ ދަތުރު ކުރީ ރޭލުގަ އެވެ. އެއަށްފަހު އެއްވުން އޮތް ތަނަށް ގޮސްފައި ވަނީ ގިނަ އަދަދެއްގެ ފުލުހުންގެ އެހީއާ އެކު އެވެ.
"އެންމެ ފަހުން ކޮޕް26 އަށް ގްލާސްގޯ އަށް އާދެވިއްޖެ. އަޅުގަނޑަށް ކީ ހޫނު މަރުހަބާ އަށް ޝުކުރިއްޔާ،" 18 އަހަރުގެ ތަންބާގް ކުރި ޓްވީޓެއްގައި ބުންޏެވެ.
ގްލާސްގޯގެ އެއްވުމުގައި ބައިވެރިވުމުގެ ކުރިން އޭނާ ވަނީ ހުކުރު ދުވަހު ލަންޑަންގައި އޮތް އެއްވުމެއްގައި ވެސް ބައިވެރިވެފަ އެވެ. އެ އެއްވުމަކީ ބޭންކުތަކުން ދުނިޔެ އާއި މީހުންގެ ފުރާނަ ނުރައްކަލަށް ހުށަހަޅަމުންދާ ކަމަށް ބުނެ ބޭއްވި އެއްވުމެކެވެ.
ކޮޕް26 އާ ދިމާކޮށް ދުނިޔޭގެ އެތަން މިތަނުން ގިނަ އަދަދެއްގެ ތިމާވެށި އެކްޓިވިސްޓުން ވަނީ ގްލާސްގޯ އަށް ޖަމާވެފަ އެވެ. ބައެއް ރިޕޯޓުތައް ބުނާ ގޮތުގައި އަންނަ ހުކުރު ދުވަހު އޮންނަ އެއްވުމެއްގައި 100،000 އަށް ވުރެ ގިނަ އެކްޓިވިސްޓުން ބައިވެރިވާނެ ކަމަށް ބެލެވެ އެވެ.
އާދީއްތަ ދުވަހުން ފެށިގެން ނޮވެމްބަރު 12 ގެ ނިޔަލަށް އޮންނަ އދ. ގެ ތިމާވެށި ކޮންފެރެންސަށް އެކްޓިވިސްޓުން ޖަމާވަމުން ދަނީ އެ މީހުންގެ ކަންބޮޑުވުންތަކުގެ އަޑު އުފުލުމަށެވެ. ކޮޕް26 ފެށުމުގެ ކުރިން ގްލާސްގޯގެ މަގުތަކުގައި ބޮޑު ހިނގާލުމެއް ވެސް ވަނީ ބާއްވާފަ އެވެ.
އެއްވުންތަކުގައި އިސްކޮށް އުޅެނީ "އެކްސްޓިންކްޝަން ރެބެލިއަން" ގްރޫޕެވެ. އެ ގްރޫޕަކީ ދުނިޔޭގެ ބައެއް ގައުމުތަކުގައި މުޒާހަރާކޮށް، ސަރުކާރުގެ މަސައްކަތްތައް ހުއްޓުވާފައިވާ ބައެކެވެ. އެ މީހުން ވަނީ ގްލާސްގޯގައި ވެސް އެގޮތަށް އަމަލު ކުރާނެ ކަމުގެ އިންޒާރު ދީފަ އެވެ.
"އަޅުގަނޑުމެން މަޑުކޮށްގެން މި ތިބީ އަޅުގަނޑުމެންގެ ލީޑަރުން މިހާރަށް ވުރެ ހަރުދަނާ ފިޔަވަޅުތަކެއް އަޅާތޯ،" ބެލްޖިއަމްގެ އުމުރުން ދުވަސްވީ މީހަކު ބުންޏެވެ.
"އަޅުގަނޑުމެންގެ ދަރިންނާއި ކާފަ ދަރިން ދިރިއުޅެމުން އެ ދަނީ ބޮޑު ނުރައްކަލަކަށް ހުށަހެޅިގެން."
"ގްރޭންޑްޕޭރެންޓްސް ފޯ ދަ ކްލައިމެޓް" ނަމުގައި ހިންގާ ގްރޫޕަށް ނިސްބަތްވާ އެ މީހާ އާއި އެ ގްރޫޕުގެ އިތުރު މެމްބަރުންތައް ބެލްޖިއަމް އިން އެޑިންބަރާ އަށް ދަތުރު ފެށީ ރޭލުގަ އެވެ. އޭގެ ފަހުން ގްލާސްގޯ އަށް ދިޔެއީ 47 މޭލު ހިނގާފަ އެވެ.
"ގަރާރުތައް އިއްވުމާއި ފިޔަވަޅު އެޅުމާ ދެމެދު އަދިވެސް ވަރަށް ބޮޑު ފަރަގެއް އެބަ އޮތް،" ފަސް ދަރިންނާއި 12 ކާފަ ދަރިން ތިބި އުމުރުން 68 އަހަރުގެ އެ މީހާ ބުންޏެވެ.
ކޮޕް26 ގައި އެމެރިކާގެ ރައީސް ޖޯ ބައިޑެން ހިމެނިވަޑައިގަންނަވާ ގޮތަށް 100 އަށް ވުރެ ގިނަ ލީޑަރުން ބައިވެރިވާނެ އެވެ. މި ސަމިޓަކީ މޫސުމީ ބަދަލު ކުޑަ ކުރަން ގައުމުތަކުން އަޅާނެ ފިޔަވަޅުތަކާ މެދު ގޮތް ނިންމުމަށް މުހިއްމު ބައްދަލުވުމެކެވެ.
ފުލުހުން ބުނީ ސަމިޓާ ދިމާކޮށް ކޮންމެ ދުވަހަކު ވެސް 10،000 އޮފިސަރުން ސެކިއުރިޓީ ބެލެހެއްޓުމުގައި އުޅޭނެ ކަމަށެވެ.
