ކަނޑުދަތުރުފަތުރުކުރާއިރު ލައިފްޖެކެޓް އެޅުން ލާޒިމުކުރާ އިސްލާހު ހިމެނޭހެން، ޓްރާންސްޕޯޓް މިނިސްޓްރީގެ ސަލާމަތީ ގަވާއިދަށް ގެންނަ އިސްލާހުތަކަށް އެޓާނީ ޖެނެރަލްގެ އޮފީހުން ލަފާލިބި، އެ އިސްލާހުތައް ގެޒެޓްކުރުމަށް މިހާރު ދަނީ ތައްޔާރުވަމުންނެވެ.
ކަމުގެ މައުލޫމާތު އެނގޭ ސަރުކާރުގެ އިސް އޮފިޝަލަކު ނަން ނުޖެހުމަށް ޝަރުތުކޮށް ވިދާޅުވީ އެ އިސްލާހުތަކަށް އެޓާނީ ޖެނެރަލްގެ ފަރާތުން ލަފާ ލިބިފައިވާއިރު، ޓްރާންސްޕޯޓް މިނިސްޓްރީން ހުށަހެޅި ހުރިހާ ކަމަކަށް އެޓާނީ ޖެނެރަލްގެ އޮފީހުން ގާނޫނީ ލަފާ އަރުވައި އެކަންކަން އިސްލާހުތަކުގެ ގޮތުގައި ހިމެނުމަށް ވަނީ ހުއްދަ ލިބިފަ އެވެ.
އޭގެ ތެރޭގައި ކަނޑުދަތުރުފަތުރުކުރާއިރު، މޫސުން އަދި ހާލަތަށް ރިއާޔަތްކޮށް އުޅަނދުގެ ފަޅުވެރިންނާއި ދަތުރުވެރިން ލައިފްޖެކެޓް އެޅުވުމަކީ އެ އުޅަނދެއްގެ ކެޕްޓަންގެ މައްޗަށް ލާޒިމުވާ އިސްލާހު ވެސް ހިމެނެ އެވެ.
އެ އިސްލާހުތައް ގެޒެޓްކޮށް އަމަލުކުރަން ފެށުމުން، މޫސުން ގޯސް ދުވަސް ދުވަހު ލައިފްޖެކެޓް ނާޅުވައި ދަތުރުކުރާނަމަ، އުޅަނދުގެ ކެޕްޓަން އެކަމަށް ޒިންމާކުރުވައި އޭނާއާ ދެކޮޅަށް ފިޔަވަޅު އެޅޭނެ އެވެ.
އެ އިސްލާހުތައް ރައީސް އޮފީހުގެ ފަރާތުން މިއަދުގެ ވަގުތެއްގައި ނުވަތަ މާދަމާ ގެޒެޓްކުރާނޭކަމަށް ވަނީ މައުލޫމާތު ލިބިފަ އެވެ. އެ އިސްލާހުތަކަށް އެޓާނީ ޖެނެރަލްގެ އޮފީހުން ލަފަޔަކަށް އެދިފައިވަނީ މިދިޔަ ހަފްތާ ތެރޭގަ އެވެ.
އިސްލާހުތައް ގެޒެޓްކުރުމާއެކު، ކަނޑުމަތީގެ ރައްކާތެރިކަމުގެ މިންގަނޑުތައް އިތުރުވެ، ހާދިސާތަކުގެ ނުރައްކާ ދަށްވެގެންދާނެކަމަށް ބެލެވެ އެވެ. މިފަހުން ހިނގައިދިޔަ ބައެއް ކަނޑުމަތީ ހާދިސާތަކުގައި ވެސް ސަލާމަތީ ގޮތުން އަޅަން ޖެހޭ އެންމެ އެދެވޭ ފިޔަވަޅުތައް ނޭޅުމުގެ ސަބަބުން ހާދިސާގެ ނުރައްކާ އިތުރުވެފައިވާކަން ވަނީ ފާހަގަވެފަ އެވެ.
ކަނޑުދަތުރުފަތުރުކުރުމުގައި ރައްކާތެރިކަމާ ގުޅުން ހުރި އެ އިސްލާހުތައް ގެނައުމުގައި ގިނަ ދުވަސްތަކެއް ހޭދަވެފައިވާތީ ކަމަށް ބުނެ، އެކަމާ ގުޅިގެން އެ މިނިސްޓްރީއަށް ވަނީ ބޮޑެތި ފާޑުކިޔުންތަކެއް އަމާޒުވެފަ އެވެ.
އެ ފާޑުކިޔުންތައް އަމާޒުވެގެން ދިޔައީ، މިފަހުން ރާއްޖެއަށް ކުރި ވިއްސާރައިގައި، މާލެއިން ވ. އަތޮޅަށް ދަތުރުކުރި ލޯންޗަކަށް ރާޅެއް ޖަހައި، މީހަކު މަރުވެ ތުއްތު ކުއްޖަކު ގެއްލުނު ހާދިސާއަށް ފަހު އެވެ.
އެ ހާދިސާއަށްފަހު ގަވާއިދަށް މީގެ ދެ އަހަރު ކުރިން ޓްރާންސްޕޯޓް މިނިސްޓްރީން ގެންނަން މަސައްކަތްފެށި އިސްލާހުތަކެއް އަދިވެސް ނުގެނެވިފައިވާކަމަށް ބުނެ އެކަމާ ގުޅިގެން އާއްމު ގިނަ ބަޔަކު ވަނީ އެ މިނިސްޓްރީއަށް ފާޑުކިޔައިފަ އެވެ.
އެ އިސްލާހުތައް އެންމެ ފުރަތަމަ ގެންނަން ވާހަކަދެކެވުނީ، 2019 ވަނަ އަހަރުގެ ފަޅުކޮޅު ހދ. ނޮޅިވަރަންފަރުން ހދ. ހަނިމާދުއަށް ދަތުރުކުރި ލޯންޗެއް ބަންޑުން ޖަހާލައި ފަސް މީހަކު މަރުވި ހާދިސާއަށް ފަހު އެވެ.
