އިއްޔެގެ ހުކުރު ނަމާދަށް ހުރަސް އަޅަން މަސައްކަތް ކުރި ހިންދޫ ދީނުގެ ބަޔަކު އިންޑިއާ ފުލުހުން ހައްޔަރުކޮށްފި އެވެ.
ހުކުރު ނަމާދު ގަޑިއާ ދިމާކޮށް ހިންދޫ ހަރުކަށި ފިކުރުގެ ގްރޫޕުތަކުން އެއްވުމުން، ގިނަ އަދަދެއްގެ ފުލުހުން ސެކިއުރިޓީ ބަލަހައްޓަން ނުކުތެވެ.
އާއްމު ތަންތަނުގައި ހުކުރު ނަމާދު ކުރުން މަނާ ކުރުމަށް ގޮވާލައި ނިއު ދިއްލީ ކައިރީގައި އޮންނަ ގުރްގައޮން ސިޓީގެ ހިންދޫން ޕްރެޝަރު ކުރަމުންދާތާ ހަފުތާތަކެއް ވެއްޖެ އެވެ.
އިއްޔެ ހިނގި ކަންކަމުގެ ވީޑިއޯތަކުން ފެންނަނީ ގިނަ އަދަދެއްގެ ހިންދޫން އެއްވެ، މުސްލިމުން ނަމާދު ކުރުން ހުއްޓާލަން ޑިމާންޑު ކުރާ މަންޒަރެވެ.
ފުލުހުން ނުކުމެ އެ ތަނުން 30 މީހުން ހައްޔަރު ކުރި އެވެ. ފުލުހުން ބުނީ އެ މީހުން ހައްޔަރު ކުރީ ސުލްހަ ގާއިމް ކުރުމަށާއި ދީނީ އަޅުކަމަށް ހުރަސް ނޭޅުމުގެ ގޮތުން ކަމަށެވެ.
"އަޅުގަނޑުމެން ވާނީ ނަމާދަށް ހުރަސް އަޅަން އައި މީހުން ހައްޔަރުކޮށްފައި،" މުސްލިމުންނަށް ފުރިހަމަ ރައްކާތެރިކަން ދޭނެ ކަމަށް ވައުދުވެ، ގުރްގައޮން ސަބް ޑިވިޝަނަލް މެޖިސްޓްރޭޓް އަނީތާ ޗައުދަރީ ވިދާޅުވި އެވެ.
ހިންދޫންނާއި މުސްލިމުންނާ މެދު މައްސަލަ ބޮޑުވާތީ މީގެ ކުރިން ބޭއްވި މަޝްވަރާތަކަށް ފަހު 37 އާއްމު ތަނެއްގައި ނަމާދު ކުރެވޭނެ ކަމަށް ކަނޑައަޅާފައި ވެ އެވެ.
ނަމާދު ކުރުން ހުއްދަ އާއްމު ތަންތަނުގައި ޖަމާއަތުގައި ނަމާދު ކުރިއަށްދާ ވަގުތުތަކުގައި ހިންދޫއިން ހުރަސް އަޅާތާ މިހާރު ތިން ހަފުތާ ވެއްޖެ އެވެ.
