ވޮޝިންޓަން، އެމެރިކާ (އޮކްޓޯބަރު 30) - އެމެރިކާގެ ސަރުކާރުން ހުށަހަޅާފައިވާ އިގްތިސާދީ އެޖެންޑާއާ މެދު ވެރިކަން ކުރާ ޑިމޮކްރެޓިކް ޕާޓީގެ ޕާލިމެންޓު މެމްބަރުންނަށް އެއް ގަލަކަށް އާދެވިފައި ނުވާތީ މޫސުމީ ބަދަލާ ގުޅޭ ބައިނަލްއަގްވާމީ ބޮޑު ބައްދަލުވުން، ކޮޕް26 އަށް ރައީސް ޖޯ ބައިޑެން ހުސް އަތާ ވަޑައިގެންފި އެވެ.
ބައިޑެން މަސައްކަތް ކުރެއްވީ ސްކޮޓްލޭންޑުގެ ގްލާސްގޯގައި ކުރިއަށްދާ ކޮޕް26 ގައި އެމެރިކާ އަކީ ކާބަން މަދު ކުރުމުގައި ދުނިޔޭގެ ލީޑަރުގެ ގޮތުގައި ދެއްކުމަށެވެ. ނަމަވެސް ސަރުކާރުގެ އިގްތިސާދީ އެޖެންޑާގައި ހިމެނޭ އިޖުތިމާއީ އިސްލާހުތަކާ އެކު އޮތް މޫސުމީ ބަދަލާ ގުޅޭ ސިޔާސަތު ކޮންގްރެސްގައި އަދިވެސް ފާހެއް ނުވެ އެވެ.
"ބިލްޑް ބެކް ބެޓާ ގާނޫނަކީ ރައީސް ޖޯ ބައިޑެންގެ މޫސުމީ ބަދަލާ ގުޅޭ ލަނޑުދަނޑިތަކަށް ވާސިލްވުމަށް މުހިއްމު އެއްޗެއް،" އިންޓަސެކްޓް ޕަވާގެ ވެރިޔާ ޝެލްޑަން ކިމްބާ ވިދާޅުވި އެވެ.
އިންޓަސެކްޓް ޕަވާ އާއި އެހެން ބައެއް ކުންފުނިތަކުގެ ވެރިން ހިމެނޭ ގްރޫޕަކުން އަންނަނީ މޫސުމީ ބަދަލާ ގުޅޭ ގޮތުން އަވަސް ފިޔަވަޅު އެޅުމަށް ޕާލިމެންޓު މެމްބަރުންނަށް ޕްރެޝަރު ކުރަމުންނެވެ.
"އެކަމަކު އެ ލަނޑުދަނޑިތަކަށް ވާސިލްވެވެނީ އެންމެން އެއް ނިޔަތެއްގައި މަސައްކަތްކޮށް، އިޖުތިމާއީ އެއްބަސްވުމަކަށް އައިސް، ސަރުކާރާއި ޕްރައިވެޓް ސެކްޓާ އިން ލީޑާޝިޕް ދައްކައިގެން. އަޅުގަނޑު އުއްމީދު ކުރަނީ އެ ގާނޫނު ފާސްކުރަން ކޮންގްރެސް އަށް ކެރޭނެ ކަމަށް."
ވައިޓް ހައުސް އިން ބުނެފައި ވަނީ މި ގަރުނުގެ ތެރޭގައި ކާބަން ބޭރު ކުރުން 50 ޕަސެންޓަށް މަދުކުރުމުގެ ލަނޑުދަނޑި އަށް ވާސިލްވުމާ ގާތްވަމުންދާ ކަމަށެވެ. އެކަމަކު އެކަން ހާސިލްވާނީ 1.75 ޓްރިލިއަން ޑޮލަރުގެ ބިލްޑް ބެކް ބެޓާ ބިލުގައި މޫސުމީ ބަދަލާ ގުޅޭ ހާއްސަ ކަންކަން ތަންފީޒުކޮށްގެންނެވެ.
ސިއްހީ ނިޒާމާއި، ކުޑަކުދިންނަށް އަޅާލުމާއި، ތައުލީމާއި، ސާފު ހަކަތަ ހިމެނޭ އިގްތިސާދީ އެޖެންޑާ އަށް ކަނޑައެޅި ފައިސާގެ ތިން ބައިކޮށްފައި އެއް ބައި ހާއްސަ ވަނީ ތިމާވެއްޓާއި މޫސުމީ ބަދަލާ ގުޅޭ ކަންކަމަށެވެ.
އެ އެޖެންޑާ އަށް ކޮންގްރެސްގެ ތާއީދު ހޯދުމަށް ބައިޑެން ކޮޕް26 އަށް ފުރާވަޑާއިގެންނެވުން މީގެ ކުރިން ފަސް ވެސް ކުރި އެވެ. ނަމަވެސް ސަމިޓު ފެށުމުގެ ކުރިން އެކަން ކުރެވޭނެހާ ވަގުތު ނެތް ކަމަށް އެނެލިސްޓުން ބުންޏެވެ.
ޑިމޮކްރެޓިކް ޕާޓީން އެ އެޖެންޑާއާ މެދު އެއްބަސްވުމަކަށް އައިސް ފާސްކުރި ނަމަ ބައިޑެން ކޮޕް26 އަށް ވަޑައިގަންނަވާނީ ކާބަން މަދުކުރުމުގެ މަސައްކަތަށް 500 ބިލިއަން ޑޮލަރު ހާއްސަ ކުރާނެ ކަމުގެ ވައުދާއެކު އެވެ.
