މިދިޔަ އާދީއްތަ ދުވަހު އޮތް ޓީ20 ވޯލްޑު ކަޕުގެ ކްރިކެޓު މެޗުން އިންޑިއާ ބަލިކޮށް ޕާކިސްތާން މޮޅުވުމުން ކަޝްމީރުގެ ތިން ދަރިވަރަކު އުތުރު އުއްތަރް ޕްރަދޭޝް ސްޓޭޓުން ހައްޔަރުކޮށްފި އެވެ.
ފުލުހުން ބުނީ މެޗު ކުރިއަށް ދިޔަ ވަގުތު ދަރިވަރުން ވަނީ އިންޑިއާއާ ދެކޮޅަށް އަޑު އުފުލައި ޕާކިސްތާނަށް ތާއީދުކޮށްފައި ކަމަށެވެ. އެ މީހުންނަށް ތުހުމަތު ކުރަނީ ރުޅިވެރިކަން ފެތުރުމާއި ސައިބަ ޓެރަރިޒަމްގެ ކުށް ކުރި ކަމަށެވެ.
އާގްރާ ސިޓީން އެ ތިން ދަރިވަރުން ހައްޔަރު ކުރިއިރު، ޕާކިސްތާން ޓީމަށް ސަޕޯޓު ކުރާތީ ފަހަކަށް އައިސް މުސްލިމުން ހައްޔަރު ކުރުން އިތުރުވެފައިވާ ކަމަށް ރިޕޯޓުތައް ބުނެ އެވެ.
އެ މެޗުގައި ޕާކިސްތާނުން އިންޑިއާ ބަލިކުރީ 10 ވިކެޓުންނެވެ.
އިންޑިއާ އާއި ޕާކިސްތާނުގެ ގުޅުން އަބަދުވެސް ގޯހެވެ. ކްރިކެޓް މެޗެއް ދެ ގައުމުގެ މެދުގައި ކުޅޭ ކޮންމެ ފަހަރަކު ނުތަނަވަސްކަން ބޮޑުވެ އެވެ.
ފާޑުކިޔާ ފަރާތްތަކުން ބުނީ މެޗުން ބަލިވުމާއެކު އިންޑިއާގެ ސަޕޯޓަރުން ކުޅިވަރުގެ ރޫހާ ހިލާފަށް، އެކި ފަރާތްތަކަށް ތުހުމަތުގެ އިނގިލި ދިއްކުރި ކަމަށެވެ.
އެގޮތުން މެޗު ނިމުމުން ޓީމުގައި ހިމެނޭ ހަމައެކަނި މުސްލިމް ކުޅުންތެރިޔާ މުހައްމަދު ޝާމީ އަށް އަމާޒުކޮށް ސޯޝަލް މީޑިއާގައި ސާބިތު ނުހިފޭ ވާހަކަތައް ފަތުރައި މަލާމާތްކޮށް ހެދި އެވެ.
އާގްރާ އިން ހައްޔަރު ކުރި ތިން ދަރިވަރުން ވަނީ ޕާކިސްތާނު ޓީމަށް ތައުރީފުކޮށް ވަޓްސްއެޕް ސްޓެޓަސް ލިޔެފަ އެވެ. އެހެންވެ، އެ މީހުންގެ ކޮލެޖުން ސަސްޕެންޝަނެއް ދިނެވެ.
ފުލުހުން ބުނީ އެ ދަރިވަރުން ހައްޔަރު ކުރީ ވެރިކަން ކުރާ ބަރަތިޔަ ޖަނަތަ ޕާޓީ (ބީޖޭޕީ) މެމްބަރުންގެ ފަރާތުން ލިބުނު ޝަކުވާތަކާ ގުޅިގެން ކަމަށެވެ.
އެ މީހުންގެ އިތުރުން ވެސް ޕާކިސްތާނަށް ސަޕޯޓު ކުރި އެހެން މުސްލިމުންނާ މެދު އަންނަނީ އެކި ފިޔަވަޅުތައް އަޅަމުންނެވެ.
އެގޮތުން ރާޖަސްތާން ސްޓޭޓުގައި ސްކޫލު ޓީޗަރަކު ވަޒީފާއިން ވަކިކުރި އެވެ. ޕްރެސް ޓްރަސް އޮފް އިންޑިއާ އިން ބުނީ މިދިޔަ ބުދަ ދުވަހު އެ މީހާ ވެސް ހައްޔަރު ކުރި ކަމަށެވެ.
އުތުރު ޕަންޖާބް ސްޓޭޓުގައި ކަޝްމީރުގެ ދަރިވަރުންނަށް ހަމަލާދީފައި ވެ އެވެ. އޭގެ އިތުރުން އިންޑިއާ އިން ކޮންޓްރޯލް ކުރާ ކަޝްމީރުގައި ވެސް ދަރިވަރުންނާ ދެކޮޅަށް ވަނީ ޓެރަރިޒަމްގެ ތުހުމަތުކޮށްފަ އެވެ.
