ނިއު ދިއްލީ، އިންޑިއާ (އޮކްޓޯބަރު 28) - އަންނަ ހަފުތާގައި ފަށާ މޫސުމީ ބަދަލާ ގުޅޭ ބައިނަލްއަގްވާމީ ބޮޑު ސަމިޓު ކޮޕް26 ގައި އިންޑިއާ އިން ވަކާލާތު ކުރަނީ މޫސުމީ ބަދަލާ ގުޅޭ އިންސާފަށް ކަމަށް އެ ގައުމުން ބުނެފި އެވެ.
މޫސުމީ ބަދަލާ ގުޅޭ އިންސާފަކީ ފާއިތުވި ތަނުގައި ގިނަ އަދަދަކަށް ވިހަ ގޭސްތައް ޖައްވަށް ބޭރުކޮށް ދުނިޔެ ހޫނުވާން މަގުފަހިވާ ފަދަ އަމަލުތައް ހިންގި މުއްސަނދި ގައުމުތަކުން ބަދަލުގެ ގޮތުގައި ފަގީރު ގައުމުތަކަށް ފައިސާ ފޯރުކޮށްދިނުމެވެ.
އެކަން ހާސިލްކުރަން އާދީއްތަ ދުވަހު ފަށާ ކޮޕް26 ގައި އިންޑިއާ އިން މަސައްކަތް ކުރާނެކަން އިއުލާނު ކުރިއިރު، ޖައްވަށް ބޭރު ކުރާ ގޭސްތައް މަދު ކުރަން އަޅާނެ ފިޔަވަޅުތަކާ ބެހޭ ޕްލޭން އެ ގައުމުން އަދިވެސް ހުށަހަޅާފައެއް ނުވެ އެވެ.
އެންވާރަމަންޓް މިނިސްޓަރު ބުޕެންދެރް ޔާދަވް ވިދާޅުވީ "ރަނގަޅު ވަގުތާއި ރަނގަޅު ތަނުގައި" އަޅަން ޖެހޭ އިތުރު ފިޔަވަޅުތައް އަޅަން އިންޑިއާ އިން ވިސްނާ ކަމަށެވެ.
ބޮޑު ވަޒީރު ނަރެންދްރަ މޯދީ ވެސް ކޮޕް26 ސަމިޓުގައި ބައިވެރިވެވަޑައިގަންނަވަން ހަމަޖެހިފައި ވާއިރު، އިންޑިއާ އިން ބުނީ ނެޓް ޒީރޯ ހާސިލްކުރާނެ ސުންގަޑި އަށް ވުރެ މުހިއްމީ ކާބަން ކޮންޓްރޯލް ކުރުން ކަމަށެވެ. ނެޓް ޒީރޯ އަކީ ޖައްވަށް ބޭރު ކުރާ ކާބަން އާއި ޖައްވުން ނައްތާލާ ކާބަން ބެލެންސް ކުރުމެވެ.
"މުހިއްމު ކަމަކީ ނެޓް ޒީރޯ ހާސިލް ކުރުމުގެ ކުރިން އެޓްމޮސްފިއާއަށް ދޫކުރަނީ ކިހާ އަދަދެއްގެ ކާބަންތޯ ބެލުމެއް ނޫން،" އެންވާރަމަންޓް މިނިސްޓްރީގެ އެންމެ އިސް ޕާމަނަންޓް އޮފިޝަލް އާރް.ޕީ ގުޕްތާ ވިދާޅުވި އެވެ.
ތަފާސްހިސާބުން ދައްކާ ގޮތުގައި އިންޑިއާގެ ކޮންމެ ރައްޔިތަކު އަހަރެއްގެ މައްޗަށް 1.9 ޓަނުގެ ކާބަން އުފައްދަ އެވެ. ޔޫރަޕިއަން ޔޫނިއަންގައި އެ އަދަދު އުޅެނީ 7.1 ޓަނުގަ އެވެ. ޗައިނާގައި 8.4 ޓަން އަދި އެމެރިކާގައި 18 ޓަން ކާބަން އަހަރެއްގެ މައްޗަށް ކޮންމެ ރައްޔިތަކު އުފައްދަ އެވެ.
މިނިސްޓަރު ޔާދަވް ވިދާޅުވީ ދުނިޔެ ހޫނުވުން ކޮންޓްރޯލް ކުރަން ހިންގާ ކެމްޕެއިން ވަރުގަދަ ކުރުމާއި އެ ކެމްޕެއިނަށް ފަންޑު ކުރުމަކީ ސްކޮޓްލޭންޑުގެ ގްލާސްގޯގައި ފަށާ ކޮޕ26 ސަމިޓުގެ އެންމެ ބޮޑު އެއް މަގްސަދު ކަމަށެވެ.
"އިންޑިއާ އިން ނުކުންނާނީ ތަރައްގީވަމުންދާ ގައުމުތަކުގެ އަޑެއްގެ ގޮތުގައި. އިންޑިއާ ވާނީ މޫސުމީ ބަދަލާ ގުޅޭ އިންސާފަށް ވާސިލްވާން ހައްލު ހިފައިގެންދާ މަގަކަށް،" ކޮޕް26 ސަމިޓަށް ފުރާވަޑައިގެންނެވުމުގެ ކުރިން ޔާދަވް ނޫސްވެރިންނަށް ވިދާޅުވި އެވެ.
އާބާދީގައި 1.3 ބިލިއަން މީހުން ހިމެނޭ ހަލުވިކަމާ އެކު ތަރައްގީވަމުންދާ އިންޑިއާ އިން އަބަދުވެސް ވަކާލާތު ކުރަނީ މީގެ ކުރިން ސިނާއީ މަސައްކަތްތަކުން މަންފާ ލިބިގަތް ޔޫރަޕާއި އުތުރު އެމެރިކާ އިން މޫސުމީ ބަދަލާ ގުޅޭ ބިލުގެ ބޮޑު ބައި ދައްކަން ޖެހޭނެ ކަމަށެވެ.
ޔާދަވް ވަނީ މުއްސަނދި ގައުމުތަކުން ފައިސާގެ އެހީ ފޯރުކޮށްދޭނެ ކަމަށް ވީ ވައުދު ނުފުއްދާ މައްސަލާގައި ފަގީރު ގައުމުތަކުން ކަންބޮޑުވާ ސަބަބު ސާފުވާ ކަމަށް ވިދާޅުވެފަ އެވެ. މުއްސަނދި ގައުމުތަކުން ކުރިން ބުނީ 2020 ވަނަ އަހަރާ ހަމައަށް ދާން ވާ އިރަށް އަހަރަކު އެއް ބިލިއަން ޑޮލަރު ދޭނެ ކަމަށެވެ.
ދުނިޔޭގެ އެންމެ ކުރިއަރާފައިވާ ސޯލާ ހަކަތައިގެ ޕްރޮގްރާމް ހިންގާ އެއް ގައުމަކީ އިންޑިއާ އެވެ. އެމެރިކާގެ މޫސުމީ ކަންކަމާ ބެހޭ މަންދޫވު ޖޯން ކެރީ ވެސް ވަނީ އިރުގެ އަވިން ހަކަތަ އުފެއްދުމުގެ ޓެކްނޮލޮޖީގައި އިންޑިއާ އިން ހޯދަމުންދާ ކުރިއެރުންތަކަށް ތައުރީފު ކުރައްވާފަ އެވެ.
ނަމަވެސް އަދިވެސް އިންޑިއާގެ ކަރަންޓުގެ 70 ޕަސެންޓު އުފައްދަނީ ކޯލް އަންދައިގެންނެވެ. އެ ގައުމުގެ އެންމެ ޒަމާންވީ ކޯލް ހަކަތަ އުފައްދާ ސްޓޭޝަންތަކުގެ 14 ޕަސެންޓު ރޫޅާލުމަށް 40 ބިލިއަން ޑޮލަރަށް ވުރެ ގިނަ ފައިސާ ބޭނުންވެ އެވެ.
އެންވާރަމަންޓް މިނިސްޓްރީގެ އޮފިޝަލް ގުޕްތާ ވިދާޅުވީ ފަގީރު ގައުމުތަކަށް ފައިސާ ފޯރުކޮށްނުދޭ ނަމަ "އަމިއްލަ ހަރަދުގައި ސާފު ތަރައްގީ އަށް ބަދަލުވުމަކީ ވަރަށް އުނދަގޫ ކަމެކެވެ."
