ގދ. ހޯނޑެއްދޫގައި ނޭޗާ ޕާކެއް ތަރައްގީކުރަން ނިންމައި އެރަށު ކައުންސިލާއި ހުވަދޫ އެއިޑާ ދެމެދު އެއްބަސްވުމެއްގައި ސޮއިކޮށްފި އެވެ.
ހޯނޑެއްދޫގައި ނޭޗާ ޕާކެއް އަޅަން ނިންމާފައި މިވަނީ އެރަށުގެ ހުޅަނގު އުތުރުން އޮންނަ ކުޅިތަކުގެ ގުދުރަތީ ރީތިކަން ދަމަހައްޓައި، އެތަނަކީ އިޖުތިމާއީ ގޮތުންނާއި، އިގްތިސާދީ ގޮތުން ބޭނުންހިފޭނެ ތަނަކަށް ހެދުމުގެ މަގުސަދުގަ އެވެ.
ހޯނޑެއްދޫ ކައުންސިލުން ވަނީ ނޭޗް ޕާކް މެނޭޖްމެންޓް ޕްލޭނާއި އެއްގޮތަށް އެތަން ހިންގުމަށް ހަތް މެންބަރުންގެ މައްޗަށް އެކުލެވޭ "ހޯނޑެއްދޫ ނޭޗާ ޕާކް މެނޭޖްމެންޓް ކޮމިޓީ" ގެ ނަމުގައި ކޮމިޓީއެއް އެކުލަވާލާފަ އެވެ. އެކޮމިޓީގެ ލަފާއި އިރުޝާދުގެ ދަށުން ނޭޗާ ޕާކް ހިންގުމުގެ ހުރިހާކަމެއް ތަރުތީބުކޮށް ބަލަހައްޓަނީ ހުވަދޫ އެއިޑުންނެވެ.
ހުވަދޫ އެއިޑުން ބުނީ މިމަޝްރޫއުގެ ދަށުން، ކުޅީގެ ނެތެމުންދާ ގުދުރަތީ ރީތިކަން އާލާކުރުމަށް ހަމަޖެހިފައިވާ ކަމަށެވެ. އަދި ތައުލީމީ ދިރާސާކުރުމާއި، ހިތްފަސޭހަ މައިޒާނެއްގެ ގޮތުގައި ކުޅިތައް ބޭނުންކުރެވޭނެ ގޮތް ހަދާނެ ކަމަށެވެ.
ތިން އަހަރުގެ މުއްދަތަށް ހިންގޭ މިމަޝްރޫއު ނިމޭއިރު 3.9 މިލިއަން ރުފިޔާ ހަރަދުވާނެ އެވެ. ތިން އަހަރުން ޕާކު ތަރައްގީކުރުމުގެ މަޝްރޫއު ނިމުނު ނަމަވެސް އިތުރު ފަސް އަހަރަށް އެތަން ހިންގައި ބަލަހައްޓާނީ ހުވަދޫ އެއިޑުންނެވެ.
މިމަޝްރޫއަށް ހޯނޑެއްދޫ ކައުންސިލުން އެއްވެސް ހަރަދެއް ކުރަން ނުޖެހޭނެ ކަމަށާއި ޕާކު ތަރައްގީކުރުމަށް ރާވާފައި ވަނީ އެކިފަރާތްތަކުގެ އެހީތެރިކަން ހޯދައިގެން ކަމަށް ހުވަދޫ އެއިޑުން ބުނެ އެވެ.
ހޯނޑެއްދޫ ނޭޗާ ޕާކު ތަރައްގީވެގެން އަންނަ އިރު ރަށު ކައުންސިލުން ފާސްކޮށްފައިވާ ގޮތަށް 1،392 ފޫޓު ދިގުމިނުގެ ބޯޑްވޯކާއި 11 ވިޔުއިން ޕްލެޓްފޯމް ތަރައްގީކޮށް އެސަރަހައްދަށް ޒިޔާރާތްކުރާ ފަރާތްތަކަށް ހުޅުވާލެވޭނެ އެވެ.
އޭގެ އިތުރުން އާންމުންނަށް ބޭނުންކުރެވޭ ގޮތަށް ނޭޗާ ޕާކް ސަރަހައްދު ބައްޓަންކޮށް އެ ސަރަހައްދުގައި ތިން އަދި ތިން ޕެޑަލް ބޯޓް ބާއްވަން ވަނީ އެއްބަސްވެފަ އެވެ.
އެ ސަރަހައްދުގައި މީޓިން އަދި ހަފުލާތައް ބޭއްވޭނެ ގޮތަށް ނޭޗާ ޕާކު ޓަވަރެއް ގާއިމުކުރެވިގެން ދާނެ އެވެ.
މަޝްރޫއު ހިންގާ ސަރަހައްދު އާރޯކޮށް، ގަސް މަރުވެފައިވަ ސަރަހައްދުގެ 90 އިންސައްތަ ފެހިކުރަން ވަނީ ނިންމާފަ އެވެ. އެގޮތުން ކުޅީގައި ހެދޭ އެކިވައްތަރުގެ ގަސް ހިމެނޭހެން 2000 ގަސް އިންދައި އެސަރަހައްދު ސާފުކޮށް ޗަކަ ނަގަންޖެހޭ ސަރަހައްދުތަކުގެ ޗަކަ ނަގާނެ އެވެ.
ކުޅިތަކުގެ މުހިންމުކަމާ ގުޅޭގޮތުން ރައްޔިތުން ހޭލުންތެރިކުރުމާއި، ކުޅިތައް ހިމާޔަތްކޮށް ދެމެހެއްޓެނިވި ގޮތުގައި ބެލެހެއްޓުމުގެ ދާއިރާއިން ރަށުގެ މުއައްސަސާތަކާއި، މަދަނީ ޖަމްއިއްޔާތައް އަދި އާންމު ފަރުދުންނަށް އަމާޒުކޮށް ދެ ތަމްރީނު ޕްރޮގްރާމް ކުރިއަށްގެންދިއުމަށްވެސް ވަނީ ހަމަޖެހިފަ އެވެ.
ހުވަދޫ އެއިޑުން ވަނީ ކުޅި ހިމާޔަތްކޮށް ބެލެހެއްޓުން ރަށު ތަރައްގީގެ ޕްލޭންގައި ހިމެނުމަށް އެކަމަށް ބޭނުންވާ ގަވާއިދުތައް ހަދައި ތަންފީޒުކުރުމަށް ކައުންސިލަށް އެހީތެރިވާން ނިންމާފަ އެވެ.
ރަށުގެ ކުޅިތަކާއި، ގޮނޑުދޮށް އަދި މޫދުގެ ރީތި ގުދުރަތީ މާހައުލު ހިމާޔަތްކުރުމަކީ ކައުންސިލްގެ ވައުދެކެވެ. އަދި ދެމެހެއްޓެނިވި ގޮތަކަށް، އެތަންތަން ތަރައްގީކޮށް އާއިލާތަކަށް ހިތްހަމަޖައްސާލަން ދެވޭ ހިތްފަސޭހަ މައިދާންތަކަށް ބަދަލުކުރުމަށް ކައުންސިލުން ވަނީ ވައުދުވެފަ އެވެ.
