ހުއްދަ ނެތި ކޯޓުން ބޭރަށް ދާން ތަކުރާރުކޮށް މަސައްކަތްކޮށް, ޠާޣޫތަށް ގޮވި އަންހެނަކު ކޯޓުގެ ހުރުމަތް ކެނޑި ކަމުގެ ޖުށުގައި 15 ދުވަހަށް ޖަލަށްލާން ކުރިމިނަލް ކޯޓުން މިއަދު ހުކުމްކޮށްފި އެވެ.
ކުރިމިނަލް ކޯޓުން މިއަދު މެންދުރުފަހު މި ހުކުމް އިއްވާފައިވަނީ މާރާމާރީގެ މައްސަލައެއްގައި އެ ކޯޓަށް ބަންދު ޖެހުމަށް ގެންދިޔަ އައިމިނަތު އަބްދުއްމަޖީދު ކިޔާ އުމުރުން 30 އަހަރުގެ އަންހެނެއްގެ މައްޗަށެވެ.
އަންހެން މީހާ ހައްޔަރުކޮށްފައިވަނީ މީހަކާމެދު މާރާމާރީ ހިންގައި އެމީހާ ގައިގާ ދަތް އެޅި ކަމުގެ ތުހުމަތަށެވެ. ނަމަވެސް, އެ ތުހުމަތުތަކަށް އެ އަންހެން މީހާ އިންކާރު ކުރެ އެވެ. އަދި, ފުލުހުން ދައްކަނީ ޔޯލަ ވާހަކަތަކެއް ކަމާއި ކަން ހިނގާފައިވަނީ ޖަޒުބާތީ ކަމެއްގައި ހިނގި ޒުވާބެއްގެ ތެރެއިން ކަމަށް ކޯޓުގައި އެމީހާ މިއަދު ބުންޏެވެ.
އޭނާ އިތުރަށް ކޯޓުގައި ބުނި ގޮތުގައި އޭނާއަކީ ޑިޕްރެޝަން ހުންނަ މީހެކެވެ. އެކަމަށް ގަވައިދުން ބޭސް ކަމުން ދާއިރު, މާލޭގައި އުޅެމުންދަނީ ވެސް ދަތި ހާލަތުގައި ކަަމަށް ވަނީ ބުނެފަ އެވެ. ނަމަވެސް, އޭނާގެ ސިއްހީ ހާލަތު ގޯސް ނޫން ކަމަށް ވަނީ ބުނެފަ އެވެ.
އަންހެން މީހާ ބަންދު މަޖިލީހުގައި ގިނަ ވާހަކަތަކެއް ދައްކާފައިވާއިރު, އޭނާ ވަނީ ކޯޓުގެ ގިނަ އެންގުންތަކަށް ތަބާނުވެ, އެ ކޯޓުން ނުކުންނަން ތަކުރާރުކޮށް މަސައްކަތް ކޮށްފަ އެވެ. އަދި, ކުރިމިނަލް ކޯޓުން ބުނި ގޮތުގައި އެކި އެއްޗެހި ގޮވައި ޝަރީއަތުގެ މަޖިލީހުން ބޭރަށް ދާން އުޅެ ޠާޣޫތަށް އޭނާ ވަނީ ގޮވާފަ އެވެ.
ޠާޣޫތުގެ ލަފުޒީ މާނައަކީ ހައްދުފަހަނައަޅައިދިޔުމެވެ. މި ބަސް ބޭނުންކޮށް އުޅެނީ ބޮޑެތި ކާފަރުންނަށެވެ. އެގޮތުން ޠާޣޫތުންގެ އެންމެ އިސް މީހަކީ ޝައިތާނާ ކަމަށް ބުނެވެ އެވެ.
އެހެންވެ, ބަންދު މަޖިލީހުގައި އިންނެވި އެ ކޯޓުގެ ގާޒީ މުހައްމަދު މިސްބާހު ކަނޑައެޅުއްވީ ޠާޣޫތަށް ގޮވައި އަންހެން މީހާ ކުރި އަމަލަކީ ކޯޓުގެ ހުރުމަތް ކެނޑުމުގެ އަމަލެއްގެ ގޮތުގަ އެވެ. އެހެންވެ, އޭގެ އަދަބެއްގެ ގޮތުގައި އޭނާގެ މައްޗަށް 15 ދުވަހުގެ ޖަލު ހުކުމެއް ގާޒީ މިސްބާހު އިއްވެވީ އެވެ.
ކޯޓު ހުރުމަތް ކަނޑައަޅައިފިނަމަ, އެމީހަކަށް ވަގުތުން އަދަބު ކަނޑައެޅުމުގެ ބާރު ފަނޑިޔާރުންނަށް އޮވެ އެވެ.
