ނިއު ދިއްލީ، އިންޑިއާ (އޮކްޓޯބަރު 27) - ޕެގަސޫސް ސޮފްޓްވެއާ ބޭނުންކޮށްގެން އިންޑިއާ ސަރުކާރުން ނޫސްވެރިންނާއި، އިދިކޮޅު ސިޔާސީ ފަރާތްތަކާއި، އެކްޓިވިސްޓުންނަށް ޖާސޫސްކުރި ކަމަށް ބެލެވޭ މައްސަލައިގެ މިނިވަން ތަހުގީގަކަށް ސުޕްރީމް ކޯޓުން އަމުރުކޮށްފި އެވެ.
މި އަހަރުގެ ކުރީކޮޅު ލީކުކުރި ލިޔުންތަކުން އެނގުނު ގޮތުގައި އިޒްރޭލުގެ އެންއެސްއޯ ކުންފުނިން އުފެއްދި ސޮފްޓްވެއާގެ އެހީގައި ޖާސޫސްކުރި 45 ގައުމުގެ ތެރޭގައި އިންޑިއާ ހިމެނެ އެވެ. އެ ސޮފްޓްވެއާ އިން ވަނީ އިންޑިއާގެ 1،000 އަށް ވުރެ ގިނަ ފޯނު ނަންބަރަށް ޓާގެޓުކޮށްފަ އެވެ.
އިންޑިއާގެ އުއްތަމަ ފަނޑިޔާރު ވިދާޅުވީ މައްސަލައިގެ ތަހުގީގަކަށް އަމުރުކޮށް ދިނުމަށް އެދި ހުށަހެޅި ޕެޓިޝަނާ ދެކޮޅަށް ސަރުކާރުން އެއްޗެއް ނުބުނާ ކަމަށެވެ. އަދި ގައުމީ ސަލާމަތާ ގުޅުން ހުރި ކަމަށް ބުނެ ކޮންމެ ފަހަރަކު ސަރުކާރު "ހިލޭ ހުއްދައެއް" ނުދެވޭނެ ކަމަށް ވިދާޅުވި އެވެ.
އެއާއެކު ކޯޓުން އަމުރުކޮށްފައި ވަނީ ސައިބާ އަދި ކޮމްޕިއުޓާ ސައިންސްގެ ތަޖުރިބާކާރުން އެކަމާ ގުޅޭ ތަހުގީގެއް ފެށުމަށެވެ.
އާއްމު ގޮތެއްގައި ޕެގަސޫސް ސޮފްޓްވެއާ ވިއްކަނީ ހަމައެކަނި ސަރުކާރުތަކާއި ސެކިއުރިޓީ އެޖެންސީތަކަށެވެ. އެ ސޮފްޓްވެއާގެ އަސަރު ފޯނަކަށް ކުރުމުން، ފޯނުގައި ހުންނަ މެސެޖާއި، ފޮޓޯތަކާއި، ލޮކޭޝަން ޓްރެކް ކުރުމުގެ ބާރު ސޮފްޓްވެއާ ބޭނުންކުރާ ފަރާތަށް ލިބެ އެވެ.
އިންޑިއާ ސަރުކާރުން ވަނީ މިއީ ގައުމީ ސަލާމަތާ ގުޅިފައިވާ މައްސަލައެއް ކަމަށް ބުނެ، ޕެގަސޫސް ބޭނުންކުރިކަން ނުވަތަ ނުކުރާކަން ކަށަވަރުކޮށްދޭން ވެސް ދެކޮޅު ހަދާފަ އެވެ.
މިދިޔަ ޖުލައި މަހު ތުހުމަތުތައް ފެންމަތިވުމާއެކު އިދިކޮޅު ޕާލިމެންޓު މެމްބަރުން އިހުތިޖާޖު ކުރަން ފެށުމުން ޕާލިމެންޓު ސެޝަންތަކަށް ހުރަސްއެޅުނެވެ.
އިންޑިއާ އަށް ނިސްބަތްވާ 1،000 ނަންބަރަކަށް ޕެގަސޫސް ޓާގެޓުކުރި އިރު، އޭގެ ތެރެއިން 300 ނަންބަރު ނިސްބަތްވާ މީހުންގެ ވަނަވަރު ވަނީ ދެނެގަނެފަ އެވެ.
އޭގެ ތެރޭގައި އިދިކޮޅު ލީޑަރު ރާހުލް ގާންދީ ހިމެނިވަޑައިގަންނަވަ އެވެ. އޭގެ އިތުރުން ސިޔާސީ އެހެން ފަރާތްތަކާއި، ނޫސްވެރިންނާއި، އެކްޓިވިސްޓުން އަދި ސަރުކާރަށް ފާޑުކިޔާ މީހުން ހިމެނެ އެވެ.
އެ ނަންބަރުތަކުގެ ތެރޭގައި ހިމެނޭ އިތުރު މީހުންނަކީ އިންޑިއާގެ ކުރީގެ އުއްތަމަ ފަނޑިޔާރާ ދެކޮޅަށް ޖިންސީ ފުރައްސާރައިގެ ތުހުމަތު ކުރި އަންހެނަކާއި، ޓިބެޓްގެ ބުޑިސްޓު ލީޑަރުންނާއި، ޕާކިސްތާނުގެ ޑިޕްލޮމެޓުން އަދި ޗައިނާގެ ނޫސްވެރިންނެވެ.
ލީކުކުރި ލިޔުންތަކާ ގުޅޭ ދިރާސާގައި އުޅުނު މީޑިއާ ކުންފުނިތަކުގެ ތެރޭގައި ހިމެނޭ ވޮޝިންޓަން ޕޯސްޓުން ބުނީ ކާމިޔާބުކަމާއެކު ޖާސޫސް ކުރެވެނީ ކިހާ މިންވަރަކަށް ކަން ބުނަން ނޭނގޭ ކަމަށެވެ.
ނަމަވެސް އިންޑިއާގެ 20 ސްމާޓްފޯނުގެ ފޮރެންސިކް އެނެލިސިސްއިން ދެއްކި ގޮތުގައި ޕެގަސޫސްއިން 10 ފޯނަށް ޓާގެޓް ކުރި އެވެ. އޭގެ ތެރެއިން ކާމިޔާބުކަމާއެކު ހަތް ފޯނު ބޭނުންކޮށްގެން ޖާސޫސް ކުރެވުނެވެ.
