ޕެރިސް، ފްރާންސް (އޮކްޓޯބަރު 26) - ޕެރިސް އެގްރީމެންޓުގެ ދަށުން ޖައްވަށް ދޫކުރާ ކާބަން މަދު ކުރުމަށް ގައުމުތަކުން ހުށަހަޅާފައިވާ ކަންކަމާ އެކު އެދެވޭ ނަތީޖާއެއް ނުފެންނާނެ ކަމަށް އދ. އިން ބުނެފި އެވެ.
އަންނަ ހަފުތާގައި މޫސުމީ ބަދަލާ ގުޅޭ ބައިނަލްއަގްވާމީ ބޮޑު ސަމިޓު ކޮޕް26 ފަށަން ތައްޔާރުވަމުން ދާއިރު، އދ. އިން ބުނީ ގައުމުތަކުގެ ޕްލޭނަށް ބެލުމުން ފެންނަނީ ފިޔަވަޅު އެޅުމުގައި ލަސްކުރާ މަންޒަރު ކަމަށެވެ.
ޕެރިހުގައި 2015 ވަނަ އަހަރު ގައުމުތަކުން އެއްބަސްވީ ދުނިޔެ ހޫނުވުން 1.5 ޑިގްރީ ސެލްސިއަސް އަށް ވުރެ މަތިވިޔަ ނުދީ ހިފެހެއްޓުމަށް، ކާބަން ބޭރު ކުރުން މަދު ކުރުމަށެވެ.
އެ އެއްބަސްވުމުގެ ދަށުން ގައުމުތަކުން އަޅާނެ ފިޔަވަޅުތަކުގެ ގޮތުގައި ނޭޝަނަލީ ޑިޓާމައިންޑް ކޮންޓްރިބިއުޝަންސް (އެންޑީސީ) ކަނޑައަޅަން ޖެހެ އެވެ. ކޮންމެ ފަސް އަހަރަކުން އެންޑީސީތައް މުރާޖައާ ކުރަން ވެސް ޖެހެ އެވެ.
ކޮޕް26 ގެ ކުރިން ގައުމުތަކުން މުޅިން އާ ނުވަތަ މުރާޖައާކޮށްފައިވާ އެންޑީސީ މިހާތަނަށް ހުށަހެޅީ 143 ގައުމަކުންނެވެ. އެ ގައުމުތަކުގެ ޕްލޭނަށް ބަލާއިރު، 2030 ގެ ކުރިން ކާބަން މަދު ވާނީ ނުވަ ޕަސެންޓެވެ.
ނަމަވެސް އދ. އިން ބުނީ ޕެރިސް އެގްރީމެންޓުގައި ސޮއިކުރި ހުރިހާ ގައުމުތަކެއްގެ ޕްލޭނަށް ބަލައިފި ނަމަ، މި ގަރުނުގެ ތެރޭގައި 16 ޕަސެންޓުން ކާބަން އިތުރުވާނެ ކަމަށެވެ.
މޫސުމީ ބަދަލާ ގުޅޭ އެންމެ ފަހުގެ ދިރާސާތައް ބަލާ އިންޓަގަވަމެންޓަލް ޕެނަލް އޮން ކްލައިމެޓް ޗޭންޖު (އައިޕީސީސީ) އިން ބުނީ މި ގަރުނުގެ ތެރޭގައި 45 ޕަސެންޓު ކާބަން މަދުކުރެވިގެން މެނުވީ 1.5 ޑިގްރީ ސެލްސިއަސް އަމާޒު ހާސިލްނުވާނެ ކަމަށެވެ.
މިހާރު ގައުމުތަކުން ހުށަހަޅާފައިވާ ޕްލޭންތަކަށް ބަލައިފި ނަމަ، 2100 ވަނަ އަހަރާ ހަމައަށް ދާއިރު، ދުނިޔޭގެ ފިނިހޫނުމިން 2.7 ޑިގްރީ ސެލްސިއަސް އިން މަތިވާނެ އެވެ.
"ހޯދުންތަކުން ލިބޭ މެސެޖު ވަރަށް ސާފު. މޫސުމީ ބަދަލާ ގުޅިގެން ކުރާ މަސައްކަތް ދެ ގުނަ ކުރަން ޖެހޭ،" އދ. ގެ މޫސުމީ ބަދަލާ ގުޅޭ ވެރިޔާ ޕެޓްރީޝިއާ އެސްޕިނޯސާ ވިދާޅުވި އެވެ.
