ރާއްޖެ ޓީވީގައި ރޯކޮށްލި މައްސަލާގައި މިއަދުވެސް ހުކުމް ނުކުރެވި، އަޑުއެހުން ފަސްކޮށްފިއެވެ.
މިއަދު ބޭއްވުމަށް ތާވަލުކުރި އަޑުއެހުން ފަސްކުރީ މި މައްސަލާގައި ގޮތެއް ނިންމުމުގެ ކުރިން ގާޒީ ކަމެއް ސާފުކުރަން ބޭނުންފުޅުވާތީ ކަމަށް ކްރިމިނަލް ކޯޓުގެ މީޑިޔާ އޮފިޝަލް މި ނޫހާއި ވާހަކަދައްކަވަމުން ވިދާޅުވި އެވެ.
މިދިޔަ މަހުގެ 29 ވަނަ ދުވަހަށް ވެސް މި މައްސަލައިގެ އަޑުއެހުމެއް ތާވަލުކުރި އެވެ. އެހެންނަމަވެސް އެދުވަހުވެސް ހުކުމް ކުރުމަށް ބާއްވަން ނިންމި އަޑުއެހުން ކެންސަލް ކުރީ ދިފާއީ ވަކީލުންނާއި އެ މައްސަލަ ބައްލަވާ ގާޒީ އެހެން އަޑުއެހުމެއްގައި އިންނެވުމުގެ ސަބަބުން ކަމަށް ކްރިމިނަލް ކޯޓުން އޭރު ބުނެފައި ވެއެވެ.
މި މައްސަލާގައި ތުހުމަތު ކުރެވޭ ހ. ގަސްވާ މުހައްމަދު މީއާދުގެ މައްޗަށް ދައުލަތުން ކުރަނީ ޓެރަރިޒަމްގެ ދައުވާ އެވެ.
މި މައްސަލައިގެ ހުލާސާ ބަޔާން އިއްވުމުގެ އަޑުއެހުމުގައި ދައުލަތުގެ ވަކީލު ވިދާޅުވީ، ރާއްޖެޓީވީ ރޯކޮށްލި މީހުންގެ ތެރޭގައި މީއާދު ހިމެނޭކަން ސިއްރު ހެކިވެރިންގެ ހެކިބަހުން އެނގޭ ކަމަށެވެ. އަދި މީއާދުގެ މޫނުގައި މާސްކް އަޅަން ހުރިތަން ފެނުނު ކަމަށާއި، އޭނާ ބީކޭޓީ އިމާރާތަށް ވަދެގެން ދިޔަތަން ފެނުނުކަމަށް ވެސް ސިއްރު ހެކިން ބުނެފައިވާ ކަމަށެވެ.
އެހެންނަމަވެސް ދިފާއުން ދެކޭ ގޮތުގައި މި މައްސަލަ ސާބިތުކުރެވޭ ވަރަށް ދައުލަތުން ހެކި ހުށަހަޅާފައެއް ނުވެ އެވެ.
މި މައްސަލާގައި ހުުކުމް ކުރެވޭނެ ދުވަހެއް ކްރިމިނަލް ކޯޓުން ސާފުކޮށްދީފައެއް ނުވެ އެވެ. މި މައްސަލަ ބައްލަވަނީ ކްރިމިނަލް ކޯޓުގެ އިސްގާޒީ އެވެ. އިސްގާޒީ މި ވަގުތު ޗުއްޓީގައި ހުރުމުން މިއަދު މައްސަލައިގެ އަޑުއެހުން ކުރިއަށް ގެންދިއުމަށް ހަމަޖެހިފައި އޮތީ އެ ކޯޓުގެ ހިންގުމާއި ވަގުތީ ގޮތުން ހަވާލުވެ ހުންނެވި ގާޒީ، އަލީ އާދަމް އެވެ.
ރާއްޖެ ޓީވީގައި ރޯކޮށްލީ އޮކްޓޯބަރު 7، 2013 ގެ ފަތިހުގެ ވަގުތެއްގަ އެވެ. އެ ސްޓޭޝަންގައި ރޯކޮށްލުމުން 11.65 މިލިއަން ރުފިޔާގެ ގެއްލުން ލިބުނުކަމަށް ރާއްޖޭޓީވީން ބުނެފައި ވެއެވެ. އެ މައްސަލައިގައި ހަތަރު މީހަކަށް ދައުވާ ކުރުމަށް ޕީޖީ އޮފީހަށް އަށް ފޮނުވި ނަމަވެސް ދައުވާ އުފުލާފައިވަނީ އެންމެ މީހެއްގެ މައްޗަށެވެ.
