ހާރްތޫމް، ސޫދާން (އޮކްޓޯބަރު 27) - ސޫދާނުގައި ހިންގި އަސްކަރީ ބަގާވާތަށް ފަހު ހައްޔަރު ކުރި ބޮޑު ވަޒީރު އަބްދުﷲ ހަމްދޮކް މިނިވަންކޮށްފި އެވެ.
ބޮޑު ވަޒީރުގެ އޮފީހުން ބުނީ ގެޔަށް ދޫކޮށްލުމަށް ފަހު ސިފައިން ދަނީ "ހަމްދޮކްގެ އަމަލުތައް މޮނީޓާ ކުރަމުން" ކަމަށެވެ. ހޯމަ ދުވަހުގެ އަސްކަރީ ބަގާވާތުގައި ވަނީ ހުރިހާ މުއައްސަސާތަކެއް އުވާލާފަ އެވެ.
ބަގާވާތާ ގުޅިގެން އެމެރިކާ އިން ބުނީ ސޫދާނަށް ފޯރުކޮށްދޭ އެހީތައް ސަސްޕެންޑުކޮށްފައިވާ ކަމަށެވެ. ޔޫރަޕިއަން ޔޫނިއަން (އީޔޫ) އިން ވެސް ވަނީ އެގޮތަށް އަމަލުކުރާނެ ކަމުގެ އިންޒާރު ދީފަ އެވެ.
ސޫދާނުގެ މައްސަލާގައި އދ. ގެ ސަލާމަތީ މަޖިލީހުގެ ކުއްލި ބައްދަލުވުމެއް ބުދަ ދުވަހު އޮންނާނެ އެވެ. ބެލެވޭ ގޮތުގައި ބަގާވާތް ކުށްވެރި ކުރުމަށް ފަހު އެ ގައުމުތަކުން ބަޔާނެއް ނެރޭނެ އެވެ.
މިދިޔަ ސެޕްޓެމްބަރު މަހުގެ 21 ވަނަ ދުވަހު ވެސް ސޫދާނުގައި ހިންގަން އުޅުނު ބަގާވާތެއް ސަރުކާރުން ހުއްޓުވި އެވެ. އެކަމުގެ ފަހަތުގައި ތިބީ ކުރީގެ ރައީސްއާ ގުޅުން ހުރި މީހުންނެވެ.
ވިހި އަހަރު ވަންދެން ވެރިކަން ކުރި ރައީސް އުމަރް އަލް ބަޝީރުގެ ވެރިކަން ނިމުމަކަށް އައީ އޭޕްރިލް 2019 ގައި ބޮޑެތި އެއްވުންތަކަކަށް ފަހު ސިފައިން ހިންގި ބަގާވާތެއްގަ އެވެ.
އޭގެ ފަހުން ގާއިމްކޮށްފައި އޮތީ އާއްމުންނާއި ސިފައިންގެ މެދުގައި ބާރުތައް ހިއްސާކުރާ ސަރުކާރެކެވެ. ނަމަވެސް މިދިޔަ މަހު ހިންގަން އުޅުނު ބަގާވާތަށް ފަހު ސިފައިންނާއި ސަރުކާރުގެ އެހެން މެމްބަރުންނާ ދެމެދު ހަމަނުޖެހުން އުފެދުނެވެ.
ސަރުކާރު ވައްޓާލުމަށް ފަހު ސިފައިން ބާރުތައް އަތުލުމުން ސޫދާނުގެ ރައްޔިތުން ކުރަމުންދާ މުޒާހަރާތަކުގައި ވަނީ ހަމަނުޖެހުން ބޮޑުވެފަ އެވެ.
