ގާހިރާ، މިސްރު (އޮކްޓޯބަރު 26) - މީގެ ހަތަރު އަހަރު ކުރިން މިސްރުގެ ފައްޅިތަކަށް ދިން ނުރައްކާތެރި ޓެރަރިސްޓު ހަމަލާއާ ގުޅިގެން އިއުލާނު ކުރި ކުއްލި ނުރައްކަލުގެ ހާލަތު އުވާލައިފި އެވެ.
މިސްރުގައި ކުއްލި ނުރައްކަލުގެ ހާލަތު އިއުލާނު ކުރީ އޭޕްރިލް 2017 ގައި އިސްލާމިކް ސްޓޭޓް (އައިއެސް) ގްރޫޕާ ގުޅުން ހުރި ބަޔަކު ދެ ފައްޅިއަކަށް ހަމަލާދީ 40 މީހުން މަރާލުމާ ގުޅިގެންނެވެ.
މިސްރުގެ އާބާދީގެ 10 ޕަސެންޓު މީހުންނަކީ ނަސާރާ ދީނުގެ މީހުންނެވެ.
ރައްޔިތުންނާއި ވަފާތެރި އޮފިޝަލުންގެ މަސައްކަތާ އެކު މިސްރު މި ވަނީ މި ސަރަހައްދުގައި ސަލާމަތާއި ހަމަޖެހުން އޮތް ތަނަކަށް ވެފައި،" ރައީސް އަބްދުލް ފައްތާހް އަލް ސިސީ ފޭސްބުކްގައި ވިދާޅުވި އެވެ.
"މުޅި ގައުމުގައި އިއުލާނުކޮށްފައި އޮތް ކުއްލި ނުރައްކަލުގެ ހާލަތު އިއާދަނުކުރަން އަޅުގަނޑު ނިންމީ އެހެންވެ."
ކުއްލި ނުރައްކަލުގެ ހާލަތުގައި ފުލުހުންނަށް ހާއްސަ ބާރުތައް ލިބިދެ އެވެ. އެގޮތުން މީހުން ހައްޔަރުކޮށް ބަންދުގައި ބެހެއްޓުމާއި، ހިޔާލު ފާޅުކުރުމާއި އެއްވެ އުޅުމުގެ މިނިވަންކަން ހިފެހެއްޓެ އެވެ.
މިސްރުގައި ހަރުކަށި ފިކުރުގެ ގްރޫޕުތަކުން ބޮޑަށް ހަމަލާދެނީ އުތުރު ސައިނާ ޕެނިންސޫލާ ސަރަހައްދުގަ އެވެ. ނަމަވެސް ބައެއް ފަހަރު ގައުމުގެ އެހެން ހިސާބުތަކުގައި ވެސް ހަމަލާތައް ދެ އެވެ.
ފެބްރުއަރީ 2018 އިން ފެށިގެން މިސްރުގައި ހުއްޓުމެއް ނެތި ޓެރަރިސްޓުންނާ ދެކޮޅަށް ވަރުގަދަ އޮޕަރޭޝަންތައް ދަނީ ހިންގަމުންނެވެ.
