ހުޅުމާލޭ ފަޅުގައި އަޅާފައި އޮތް ސަފާރީއެއްގައި ބިދޭސީ އަންހެނަކަށް ޖިންސީ ގޯނާ ކުރިކަމަށް ބުނާ މައްސަލާގައި އަޑުއެހުންތައް ޝެޑިއުލްކުރެވެމުންދާ ކަމަށާއި، މިހާތަނަށް އެ މައްސަލައިގައި ބޭއްވުނީ އެންމެ ދެ އަޑުއެހުންކަމަށް ޕްރޮސެކިއުޓާ ޖެނެރަލްގެ އޮފީހުން ބުނެފި އެވެ.
ޕްރޮސެކިއުޓާ ޖެނެރަލްގެ އޮފީހުގެ ސްޕޯކްސްޕާސަން އަދި ޕަބްލިކް ޕްރޮސެކިއުޓާ އަހުމަދު ޝަފީއު ވިދާޅުވީ، އެ މައްސަލައިގައި އަޑުއެހުންތައް ހުޅުމާލެ މެޖިސްޓްރޭޓް ކޯޓުގައި ކުރިޔަށް ދާކަމަށެވެ.
"ޖުމްލަ ހަތް އަޑުއެހުމެއް ޝެޑިއުލް ކުރެވުނު، އަދި ދެ އަޑުއެހުން ބޭއްވުނީ. ގިނަ އަޑުއެހުންތައް ކެންސަލްވީ، ތުހުމަތުވާ ފަރާތުން ކޮވިޑަށް ޕޮޒިޓިވްވެ، ކޮވިޑާ ގުޅިގެން ދިމާވާ އެހެން ކަންކަމާ ގުޅިގެން،" ޝަފީއު ވިދާޅުވި އެވެ.
މިހާތަނަށް ބޭއްވުނު އަޑުއެހުންތަކުގެ ތެރެއިން އެއް އަޑުއެހުމެއްގައި ވަކީލަކު އައްޔަނުކުރުމަށް ކޯޓުން ފުރުސަތު ދިން ކަމަށް ޝަފީއު ވިދާޅުވި އެވެ.
އެ މައްސަލައިގައި ޕީޖީން ދައުވާކޮށްފައިވަނީ ލ. ގަން، ތުނޑި، ނޫރަންގެ، އަބްދުﷲ ޝާން އަށެވެ. އޭނާގެ މައްޗަށް ކުރަނީ ޖިންސީ ގޯނާކުރުމުގެ ކުށުގެ ދައުވާ އާއި އަނިޔާއެއް ދީފާނެކަމުގެ ބިރުދެއްކުމުގެ ކުށުގެ ދައުވާ އާއި ގައިގާ އަތްލުމުގެ ކުށުގެ ދައުވާ އެވެ.
އެ މައްސަލަ ހުޅުމާލެ މެޖިސްޓްރޭޓް ކޯޓުގައި ބައްލަވަނީ ގާޒީ ސިޔާމާ މުހައްމަދު އެވެ.
ހުޅުމާލެ ފަޅުގައި އަޅާފައި އޮތް ސަފާރީއެއްގައި ބިދޭސީ އަންހެނަކަށް ޖިންސީ ގޯނާ ކުރި މައްސަލަ ރިޕޯޓްކޮށްފައިވަނީ ޖޫން 26، 2020 ގަ އެވެ. އެ މައްސަލައިގަ ޝާންގެ މައްޗަށް ދައުވާކޮށްފައިވަނީ މިދިޔަ ޖެނުއަރީ މަސް ތެރޭގަ އެވެ.
އެ މައްސަލައިގައި އެންމެ ފުރަތަމަ ފެންމަތިިވީ ރޭޕްގެ ތުހުމަތެވެ. މައްސަލަ ރިޕޯޓްކުރި ދުވަހު ކްރައިމް ސީން އިން ފުލުހުން ވަނީ ޝާންގެ އިތުރުން އެހެން ފިރިހެނަކު ވެސް ހައްޔަރުކޮށްފަ އެވެ.
އެހެންނަމަވެސް ފަހުން އެ ދެ މީހުން ވެސް ދޫކޮށްލުމާ ގުޅިގެން އާންމުންގެ ފަރާތުން ބޮޑެތި ފާޑުކިޔުންތަކެއް ފުލުހުންނާއި ދައުލަތުގެ އިދާރާތަކަށް އޭރު އަމާޒުވި އެވެ.
އެ މައްސަލައިގައި އޭގެ ފަހުން ހިނގައިދިޔަ ކަންކަމަކީ، "އާންމު ޕަބްލިކް ތަނެއްގައި ވެސް ހުރެފައި ވެސް ބަޔެއްގެ ތެރޭގައި ހުރެފައި ވެސް މިީހަކަށް ކޮށްލެވިދާނެ ވަރުގެ ކަމެއް" ކަމަށް ހޯމް މިނިސްޓަރު އިމްރާން ރޭޑިއޯ ޕްރޮގްރާމެއްގައި ވިދާޅުވުމާ ގުޅިގެން، މިނިސްޓަރު އެ މައްސަލަ ކުޑަކުރަން މަސައްކަތް ކުރާކަމަށް ބުނެ ވެސް އާއްމުންގެ ބޮޑެތި ފާޑުކިޔުންތަކެއް އަމާޒުވެގެން ދިޔަ އެވެ.
އެ މައްސަލައިގައި ކުށުގެ ޝިކާރައަކަށްވި އަންހެން މީހާ ވަނީ އޭގެ ފަހުން ރާއްޖޭން ފުރައިގެން ގޮސްފަ އެވެ.
