ގައުމީ ފުޓްބޯޅަ ޓީމުގެ ކޯޗުކަމާ ހަވާލުވި އިޓަލީ ގައުމީ ޓީމާއި އިންޓަ މިލާނަށް ކުރިން ކުޅުނު މިޑްފީލްޑަރު ފްރެންޗެސްކޯ މޮރިއޭރޯގެ ބެލުމުގެ ގައުމީ ޓީމުގެ ޕްރެކްޓިސްތައް ރޭ ފަށައިފި އެވެ.
ގަލޮޅު ދަނޑުގައި ރޭ ޕްރެކްޓިސް ފެށިއިރު، ޓީމުގައި ހިމެެނެނީ މައިގަނޑު ގޮތެއްގައި މި މަހު 1-16 އަށް މާލޭގައި ކުރިއަށްދިޔަ އުރީދޫ ސާފް ޗެމްޕިއަންޝިޕަށް ނެގި ސްކޮޑެވެ. އެ ސްކޮޑުގައި ހިމެނޭ ބައެއް ކުޅުންތެރިން އަނިޔާގައި ތިބިއިރު، އަނެއް ބައި ކުޅުންތެރިން ތިބީ ބަހްރޭނުގައި މި ވަގުތު ކުރިއަށްދާ އޭޝިއާގެ 23 އަހަރުން ދަށުގެ މުބާރާތުގެ ކޮލިފައިންގައި ވާދަކުރަން ޒުވާން ގައުމީ ޓީމާ އެކުގަ އެވެ. ރޭގެ ޕްރެކްޓިހުގައި ޒުވާން ކީޕަރުންތަކެއް ވެސް ވަނީ ހިމަނައިފަ އެވެ.
ރާއްޖެ ގޮވައިގެން މޮރިއޭރޯ ނުކުންނާނެ ފުރަތަމަ މުބާރާތަކީ އަންނަ މަހު 7-18 އަށް ކޮލަމްބޯގައި ބާއްވާ މަހިންދުރަ ރާޖަޕަކްސަ ފޯ ނޭޝަންސް ކަޕް އެވެ. ރާއްޖެ އާއި ސްރީ ލަންކާގެ އިތުރުން ދެން އެ މުބާރާތުގައި ކުޅޭނީ ބަންގްލަދޭޝް އާއި ސީޝެލްސް އެވެ.
މޮރިއޭރޯ ހަވާލުވި ފަހުން ގައުމީ ޓީމު ކުޅޭ ފުރަތަމަ މެޗަކީ އަންނަ ހުކުރު ދުވަހު ކުރެއްދޫ ރިސޯޓްގައި ކުޅޭ ހާއްސަ އެކްސިބިޝަން މެޗެވެ.
ކޯޗިންގެ ދާއިރާ އަށް 2006 ވަނަ އަހަރު ނުކުތް މޮރިއޭރޯ ރާއްޖޭގެ ގައުމީ ޓީމާ އެކު މިދިޔަ ހަފްތާގައި ކޮންޓްރެކްޓްގައި ސޮއިިކުރުމަށް ފަހު އިޓަލީގެ ނޫހެއް ކަމަށްވާ ކަލްޗިއޯމެރްކާޓޯ އަށް ދިން އިންޓަވިއުއެއްގައި ބުނީ ވީޑިއޯތަކުން ފެންނަ މަންޒަރުތަކަށް ބަލާއިރު، ރާއްޖޭގެ ފުޓްބޯޅައިގެ ލެވަލް ރަނގަޅު ކަމަށާއި މަސައްކަތް ކުރެވޭނެ ރަނގަޅު ޕްލޭނެއް އެބައޮތް ކަމަށެވެ.
ގަލޮޅު ދަނޑުގައި ރޭ ބޭއްވި ގައުމީ ޓީމުގެ ޕްރެކްޓިހުގެ ތެރެއިން މޮރިއޭރޯ.-- ފޮޓޯ: ހުސެއިން ޝަޔާހު/ އަދަދު
ޔުއެފާ ޕްރޯ ލައިސަންސް ހާސިލްކޮށްފައިވާ ކޯޗު މޮރިއޭރޯ އަށް އޮތް އެންމެ ބޮޑު ޓާގެޓަކަށް ވާނީ އަންނަ އަހަރު ޖޫން މަހު ކުޅޭ ގޮތަށް މިހާރު ހަަމަޖެހިފައިވާ އޭޝިއަން ކަޕް ކޮލިފައިންގައި ރަނގަޅު ނަތީޖާތަކެއް ނެރެ، 2023 ވަނަ އަހަރު ޗައިނާގައި ބާއްވާ އޭޝިއަން ކަޕަށް ރާއްޖެ ކޮލިފައިކޮށްދިނުމެވެ. ކޮލިފައިން މެޗުތައް މިހާރު އޮތްގޮތުން ކުރިއަށްދާނީ ސެންޓްރަލައިޒްކޮށެވެ. ކުރިން ހަ މެޗު ކުޅެން ލިބޭ ގޮތަށް އޮތް އެ ކޮލިފައިންގައި މިހާރު ކުޅެން ލިބޭނީ ތިން މެޗެވެ.
ގައުމީ ޓީމާ އެންމެ ފަހުން ހަވާލުވި ބިދޭސީ ދެ ކޯޗުން ކަމަށްވާ ކްރޮއޭޝިއާގެ ޕީޓަ ސެގާޓާއި ނެދަލެންޑްސްގެ މާޓިން ކޫޕްމަން އަށް ވެސް ވަނީ އޭޝިއަން ކަޕަށް ކޮލިފައިކޮށްދިނުމުގެ ޓާގެޓް ދީފަ އެވެ. އެކަމަކު، އެ ހިސާބަށް ވާސިލްވުމުގެ ކުރިން އެކި މަސައްކަތްތައް ކުރުމުގައި ނާކާމިޔާބުވެ ކޯޗުކަން ގެއްލުނީ އެވެ.
ސެގާޓަށް ގައުމީ ކޯޗުކަން ގެއްލުނީ 2019 ވަނަ އަހަރުގެ ސައުތު އޭޝިއަން ގޭމްސްގެ ނަތީޖާތައް ދަށްވުމުންނެވެ. އަދި ކޫޕްމަން އަށް ގައުމީ ކޯޗުގެ ވަޒީފާ ގެއްލުނީ މިދިޔަ ޖޫން މަހު މަހު ނިމުނު ފީފާ ވޯލްޑް ކަޕް ކޮލިފައިން އަށް ފަހު އެވެ. ދާދި ފަހުން ނިމުނު ސާފް ޗެމްޕިއަންޝިޕްގައި ގައުމީ ޓީމުގެ ހެޑް ކޯޗުގެ ޒިންމާ އުފުލީ ދިވެހި ކޯޗު އަލީ ސުޒޭން އެވެ.
