ސޫދާނުގައި އަސްކަރީ ބަގާވާތެއް ހިންގައި ބޮޑު ވަޒީރާއި ސަރުކާރުގެ އެހެން އިސް ބޭފުޅުން ހައްޔަރުކޮށްފި އެވެ.
އިންފޮމޭޝަން މިނިސްޓްރީން ބުނީ ހައްޔަރުކުރި މީހުން ގެންދިޔަ ތަނެއް ސިފައިން ބުނެފައި ނުވާ ކަމަށާއި ބަގާވާތަށް ތާއީދުކޮށް ބަޔާނެއް ނެރެން ބޮޑު ވަޒީރު އަބްދުﷲ ހަމްދޮކް ދެކޮޅު ހެއްދެވި ކަމަށެވެ.
ސިފައިން މިހާތަނަށް އެއްވެސް އެއްޗެއް ބުނެފައި ނުވާއިރު، ސޫދާނުގެ ދައުލަތުގެ ޓީވީން ދައްކަމުންދާ ކޮންޓެންޓު ވެސް ބަދަލުކޮށްފައެއް ނުވެ އެވެ.
ސޫދަނީޒް ޕްރޮފެޝަނަލްސް އެސޯސިއޭޝަނުން ވަނީ ބަގާވާތާ ދެކޮޅަށް ރައްޔިތުން މަގުތަކަށް ނުކުތުމަށް ގޮވާލާފަ އެވެ. އިންޓަނެޓާއި ފޯނުގެ ހިދުމަތް ކަނޑަމުންދާ ކަމަށް ވެސް އެ ޖަމިއްޔާ އިން ބުންޏެވެ.
މިދިޔަ ސެޕްޓެމްބަރު މަހުގެ 21 ވަނަ ދުވަހު ވެސް ސޫދާނުގައި ހިންގަން އުޅުނު ބަގާވާތެއް ސަރުކާރުން ހުއްޓުވި އެވެ. އެކަމުގެ ފަހަތުގައި ތިބީ ކުރީގެ ރައީސްއާ ގުޅުން ހުރި މީހުންނެވެ.
ވިހި އަހަރު ވަންދެން ވެރިކަން ކުރި ރައީސް އުމަރް އަލް ބަޝީރުގެ ވެރިކަން ނިމުމަކަށް އައީ އޭޕްރިލް 2019 ގައި ބޮޑެތި އެއްވުންތަކަކަށް ފަހު ސިފައިން ހިންގި ބަގާވާތެއްގަ އެވެ.
އޭގެ ފަހުން ގާއިމްކޮށްފައި އޮތީ އާއްމުންނާއި ސިފައިންގެ މެދުގައި ބާރުތައް ހިއްސާކުރާ ސަރުކާރެކެވެ. ނަމަވެސް މިދިޔަ މަހުގެ ބަގާވާތަށް ފަހު ސިފައިންނާއި ސަރުކާރުގެ އެހެން މެމްބަރުންނާ ދެމެދު ހަމަނުޖެހުން އުފެދުނެވެ.
ދެ ފަރާތަށް ތާއީދު ކުރާ މީހުން ވެސް އެއްވުންތައް ބާއްވާފައި ވާއިރު، އަސްކަރީ ވެރިކަމެއް ބޭނުންވާ ކަމަށް ބުނެ އެތައް ހާސް ބަޔަކު މިދިޔަ ހަފުތާގައި މުޒާހަރާ ކުރި އެވެ.
