ކާބުލް، އަފްގާނިސްތާން (އޮކްޓޯބަރު 24) - އަފްގާނިސްތާނަށް ދިމާވެފައި ބަނޑުހައިހޫނުކަމާއި ވަޒީފާ ނުލިބުމުގެ މައްސަލަ ހައްލު ކުރުމަށް ހާއްސަ ޕްރޮގްރާމެއް ތާލިބާން ސަރުކާރުން ފަށައިފި އެވެ.
ހުރިހާ ބޮޑެތި ސިޓީތަކާއި އަވަށްތަކުގައި ހިންގަން ހަމަޖެހިފައިވާ ޕްރޮގްރާމުގެ ދަށުން ކާބުލްގައި އެކަނިވެސް 40،000 ފިރިހެނުންނަށް މަސައްކަތް ހަމަޖެހޭނެ ކަމަށް ތާލިބާނުންގެ ތަރުޖަމާނު ބުންޏެވެ.
"މިއީ ވަޒީފާ ނުލިބުމުގެ މައްސަލަ ހައްލު ކުރަން މުހިއްމު ފިޔަވަޅެއް،" ކާބުލްގައި އޮތް ޕްރެސް ކޮންފެރެންސެއްގައި ޒަބީހުﷲ މުޖާހިދު ބުންޏެވެ.
ފަގީރުކަމާއި، ވާރޭނުވެހި ގިނަ ދުވަސްވުމާއި، ކަރަންޓު ކެނޑުމާއި ފެއިލްވެފައިވާ އިގްތިސާދީ ނިޒާމަކާ ކުރިމަތިވެފައިވާ އަފްގާނިސްތާނުގެ ފިނި މޫސުން ވަރަށް އަވަހަށް ފަށާނެ އެވެ.
ތާލިބާނުން ތައާރަފު ކުރި "މަސައްކަތް ކުރުމުން ކާތަކެތި ލިބޭ ސްކީމް" ގައި ވަޒީފާ އަދާ ކުުރާ މީހުންނަށް އުޖޫރައަކަށް ފައިސާގެ ބަދަލުގައި ލިބޭނީ ކާބޯތަކެއްޗެވެ.
އެ ސްކީމް ބޮޑަށް އަމާޒުކޮށްފައި ވަނީ މިހާރު ވަޒީފާއެއް ނެތް އަދި ފިނި މޫސުމުގައި ބަނޑަށް ޖެހުމުގެ ނުރައްކާ އޮތް މީހުންނަށެވެ.
ދެ މަސް ދުވަހަށް ކުރިއަށް ގެންދާ ޕްރޮގްރާމުގެ ދަށުން ކާބުލްގައި 11،600 ޓަނުގެ ގޮދަން ބަހާނެ އެވެ. އެހެން ހިސާބުތަކުގައި ބަހާނީ 55،000 ޓަނުގެ ގޮދަނެވެ.
ކާބުލްގައި ކުރަން ޖެހޭނެ މަސައްކަތްތަކުގެ ތެރޭގައި ފެން ވަޅުތައް ކޮނުމާއި ފިނި މޫސުމަށް ތައްޔާރުވުމުގެ ގޮތުން ކުރަން ޖެހޭ މަސައްކަތްތައް ހިމެނެ އެވެ.
އެ ޕްރޮގްރާމް ލޯންޗު ކުރުމަށް ބޭއްވި ރަސްމިއްޔާތުގައި މުޖާހިދާއި އެގްރިކަލްޗަރު މިނިސްޓަރު އަބްދުލް ރަހްމާން ރާޝިދު އަދި ކާބުލްގެ މޭޔަރު ހަމްދުﷲ ނޮމާނީ ބައިވެރިވި އެވެ.
