ޒިނޭގެ މައްސަލަތަކުގައި ޑީއެންއޭ ހަދައިގެން ލިބޭ ހެކި ކުށް ސާބިތު ކުރުމުގައި ބޭނުން ކުރެވިދާނެ ކަމަށް ދިވެހިރާއްޖޭގެ ސުޕްރީމް ކޯޓުން ނިންމުމަކީ އިންސާފާއި ހަމައަށް ވާސިލްވުމަށްޓަކައި އެޅުނު ތާރީހީ ފިޔަވަޅެއް ކަމަށް މޯލްޑިވްސް ރީފޯމް މޫވްމެންޓް (އެމްއާރްއެމް) އިން ބުނެފި އެވެ.
ސުޕްރީމް ކޯޓުގެ އެ ނިންމުމާ ގުޅިގެން މި ނޫހުން ލިޔުނު ހަބަރު ޓްވިޓާގައި ހިއްސާކުރަމުން އެމްއާރުއެމްއިން ބުނީ ޑީއެންއޭ ހެއްކެއްގެ ގޮތުގައި ބޭނުން ކުރެވޭނެ ކަމަށް ކަނޑައެޅުމަކީ އަންހެނުންނާއި ކުޑަކުދިންގެ ހައްގުތައް ރައްކާތެރިކުރުމަށް ލިބުނު ބޮޑު ބާރެއް ކަމަށެވެ.
އެ ޕާޓީގެ ރައީސް ފާރިސް މައުމޫން "އަދަދު" އަށް ވިދާޅުވީ އެ ނިންމުމަށް އެމްއާރްއެމްއިން ތާއީދު ކުރާ ކަމަށާއި އެކަމަށް މަރުހަބާ ކިޔާ ކަމަށެވެ.
އެ ޕާޓީގެ ނައިބު ރައީސް އައިމިނަތު ނާދިރާ ވިދާޅުވީ ޑީއެންއޭ ހެއްކެއްގެ ގޮތުގައި ބޭނުން ކުރެވޭ ގޮތަށް ކަނޑައެޅުމަކީ ބޭރުފުށަށް ޝަރީއަތް ހިންގައިގެން އިންސާފާއި ހަމައަށް ވާސިލްވާން ދަތި މައްސަލަތަަކުގައި ހައްގުތައް ކަށަވަރުކުރުމަށް ލިބުނު އިތުރު ޔަގީން ކަމެއް ކަމަށެވެ.
"ސައިންޓިފިކަލީ އެ ނިންމުމާއި ގުޅިގެން ބައެއް މައްސަލަތައް ސާބިތުކުރަން ފަސޭހަވެ، އިންސާފާއި ހަމައަށް ވާސިލްވެވޭނެ ކަމަށް އަޅުގަނޑުމެން ގަބޫލުކުރަނީ. މިސާލަކަށް ކުއްޖާގެ ބައްޕަ ސާބިތުކުރުމުގެ މައްސަލަތަކުގައި ހާއްސަކޮށް، ކޮންމެ ކުއްޖަކަށްވެސް ލިބޭ ހައްގު ކަށަވަރުކުރަން ފަސޭހަވާނެ، ހަމައެއާ އެކު ނުކުޅެދުންތެރިކަން ހުންނަ ކުދިންނާއި ގުޅުންހުރި މައްސަލަތަކުގައި ވެސް، ޒިނޭ، ރޭޕް، އަދި ޖިންސީ ގޯނާގެ މައްސަލަތަކުގައި ވެސް. އަދި އެހެން މައްސަލަތަށްވެސް ލިބުނު ބާރެއް މިއީ،" ނާދިރާ ވިދާޅުވި އެވެ.
އިސްލާމް ދީނުގައި ޒިނޭގެ ކުށް ސާބިތުވާން ހަތަރު ފިރިހެނުންގެ ހެކިބަސް ބޭނުންވާ ކަމަށް ބުނެ ދ. ކުޑަހުވަދޫ މެޖިސްޓްރޭޓް ކޯޓާއި ހައި ކޯޓުން ތައުފީގުގެ މައްޗަށް ކުށް ސާބިތުނުވާ ކަމަށް ކަނޑައަޅާފައި އޮއްވާ ފަނޑިޔާރު ހުސްނުއްސުއޫދު ރިޔާސަތުގައި އިންނަވައި މިއަދު ނިންނެމީ އިތުރު ގަރީނާއާއެކު ޑީއެންއޭއަކީ ކުށް ސާބިތު ކުރުމަށް ބޭނުން ކުރެވިދާނެ ހެއްކެއް ކަމަށެވެ.
