ޓައިޕޭ، ޓައިވާން (އޮކްޓޯބަރު 24) - ޓައިވާނުގެ އިރު އުތުރަށް އާދީއްތަ ދުވަހު އައި ބާރުގަދަ ބިންހެލުމެއްގެ އަސަރު ވެރިރަށް ޓައިޕޭ އަށް ވެސް ކޮށްފައިވާ ކަމަށް ރިޕޯޓުތައް ބުނެފި އެވެ.
ޓައިވާންގެ ސެންޓްރަލް މޫސުމާ ބެހޭ ބިޔުރޯ އިން ބުނީ ބިންހެލުން އައި 6.5 މެގްނިޓިއުޑްގެ ބާރު މިނުގައި ކަމަށެވެ. އެމެރިކާގެ ޖިއޮލޮޖިކަލް ސާވޭ އިން ބުނީ އެއީ 6.2 މެގްނިޓިއުޑްގެ ބިންހެލުމެއް ކަމަށެވެ.
ބިންހެލުން އައިސްފައި އިރުއުތުރު ޔިލާން ކައުންޓީ އަށް ޓައިވާން ގަޑިން މެންދުރު 01:11 ގައި ބިމުގެ 67 ކިލޯމީޓަރު އަޑިންނެވެ.
ޓައިޕޭގައި ތިބި ބައެއް ނޫސްވެރިން ބުނީ ބިންހެލުމުގެ އަސަރު 30 ސިކުންތު ވަންދެން ކުރި ކަމަށާއި މިއީ މި އަހަރުގެ މިހާތަނަށް އެ ހިސާބަށް އައި އެންމެ ބާރުގަދަ ބިންހެލުން ކަމަށެވެ.
ފުރަތަމަ ބިންހެލުމަށް ފަހު 5.4 މެގްނިޓިއުޑްގެ އާފްޓާޝޮކެއް ވެސް ވަނީ އައިސްފަ އެވެ. އެއާއެކު ރައްކާތެރިވުމުގެ ގޮތުން ޓައިޕޭގެ ރޭލު ދަތުރުތައް ވަނީ މެދުކަނޑާލާފަ އެވެ.
ޓައިވާން އޮންނަނީ ބިމުގެ އަޑިން ދެ ޓެކްޓޯނިކް ޕްލޭޓް ގުޅޭ ހިސާބުގައި ކަމުން ވަރަށް ގިނައިން ބިންހެލުންތަކާ ކުރިމަތިވެ އެވެ.
އާދީއްތަ ދުވަހު އައި މެގްނިޓިއުޑްގެ ބިންހެލުންތަކުގައި ބޮޑެތި ގެއްލުންވުން އެކަށީގެންވެ އެވެ. އެކަމަކު އެކަން ބިނާ ވަނީ ބިންހެލުން އަންނަ ތަނާއި، ފުން މިނަށެވެ.
މީގެ ކުރިން 2018 ވަނަ އަހަރު ފަތުރުވެރިންގެ މެދުގައި މަގްބޫލު ހުއަލިއެން އަށް އައި 6.4 މެގްނިޓިއުޑް ބިންހެލުމުގައި 17 މީހުން މަރުވެ، 300 އަށް ވުރެ ގިނަ މީހުންނަށް އަނިޔާވި އެވެ.
ޓައިވާނުގެ ތާރީހުގައި ކުރިމަތިވި އެންމެ ބޮޑު ގުދުރަތީ ކާރިސާ އަކީ 1999 ގައި 7.6 މެގްނިޓިއުޑް ބިންހެލުމެއްގެ ސަބަބުން 2،400 މީހުން މަރުވި ހާދިސާ އެވެ.
