ބެއިރޫތު، ލުބްނާން (އޮކްޓޯބަރު 23) - ކާބުލްގެ ބައެއް ހިސާބުތަކުން ކަރަންޓު ކެނޑެން މެދުވެރިވި ހަމަލާގެ ޒިންމާ އިސްލާމިކް ސްޓޭޓް (އައިއެސް) އިން އުފުލައިފި އެވެ.
މިދިޔަ ބުރާސްފަތި ދުވަހު ކަރަންޓު ކެނޑުނީ ކަރަންޓު ފޯރުކޮށްދޭ ނެޓްވޯކަކަށް ހަމަލާދީ ބޮމެއް ގޮއްވާލުމުންނެވެ. ފަހަކަށް އައިސް ތާލިބާނުން އަފްގާނިސްތާނުގައި ދޭ ހަމަލާތައް ވަނީ އިތުރުކޮށްފަ އެވެ.
އޯގަސްޓު މަހު ވެރިކަމަށް އައި ތާލިބާނުން ގައުމުގެ ކަންކަން ހަމައަކަށް އަޅުވަން މަސައްކަތް ކުރަމުން ދާއިރު، ކަރަންޓު ކެނޑުމުގެ ސަބަބުން އިތުރު ގޮންޖެހުންތަކާ ކުރިމަތިވާނެ އެވެ.
ޓެލެގްރާމް ޗެނަލްތަކުގައި އާއްމު ކުރި ބަޔާނެއްގައި އައިއެސް އިން ބުނީ އެ ގްރޫޕުގެ މެމްބަރުންތަކެއް ކާބުލް އަށް ކަރަންޓު ފޯރުކޮށްދޭ ލައިންތަކަށް އަމާޒުކޮށް ބޮމެއް ގޮއްވާލި ކަމަށެވެ.
އެ ހަމަލާގައި ގެއްލުން ލިބުނީ ކާބުލް އާއި ބައެއް އެހެން ޕްރޮވިންސްތަކަށް ކަރަންޓު ފޯރުކޮށްދޭ ހައި ވޮލްޓޭޖް ސަޕްލައި ލައިނަކަށެވެ. އެއީ ކައިރި އެހެން ގައުމުތަކުން އިމްޕޯޓު ކުރާ ކަރަންޓެވެ.
އަފްގާނިސްތާނުގައި ކަރަންޓުގެ ހިދުމަތް ފޯރުކޮށްދެނީ އުޒްބެކިސްތާނާއި ތަޖިކިސްތާން ފަދަ ގައުމުތަކުން އިމްޕޯޓުކޮށްގެންނެވެ. އެހެންކަމުން އެ ގައުމުތަކާ ގުޅޭ ގޮތަށް ގާއިމްކޮށްފައިވާ ކަރަންޓު ލައިނުތަކަށް މީގެ ކުރިން ވެސް ޓެރަރިސްޓުން ހަމަލާދީފައި ވެ އެވެ.
އައިއެސްއާ ދެކޮޅަށް މަސައްކަތް ކުރާނެ ކަމަށް ތާލިބާނުން ބުނި ނަމަވެސް، އެ ގްރޫޕުން ހިންގާ ޓެރަރިސްޓު ހަރަކާތްތައް ހުއްޓުވުމަށް ތާލިބާން ސަރުކާރު ވަނީ ނުކުޅެދިފަ އެވެ.
އައިއެސް އާއި ތާލިބާނުންނަކީ ސުންނީ މުސްލިމުންގެ ދެ ގްރޫޕެވެ. އަދި ދެ ގްރޫޕުގައި ވެސް ހަނގުރާމަވެރިން ހަރަކާތްތެރިވެ އެވެ. ނަމަވެސް މި ދެ ގްރޫޕުގެ މެދުގައި ރަނގަޅު ގުޅުމެއް ނެތެވެ.
ދީނުގެ ކަންކަމާއި އަސްކަރީ ސްޓްރެޓެޖީއާ ގުޅޭ ކަންކަމުގައި ވެސް ތާލިބާނުންނާއި އައިއެސް ގެ ހިޔާލު ތަފާތެވެ. އެއާއެކު ދެ ގްރޫޕުން ވެސް ދައުވާ ކުރަނީ އެ މީހުންނަކީ "އިސްލާމީ ޖިހާދު" ގެ ހަގީގީ ބައިވެރިން ކަމަށެވެ.
ދެ ގްރޫޕުގެ ދެމެދުގައި އޮންނަ ހިޔާލު ތަފާތުވުމުގެ ސަބަބުން ކުރިމަތިލުންތައް ވެސް ހިނގާފައި ވެ އެވެ. އެގޮތުން 2019 ވަނަ އަހަރު ތާލިބާނުން ވަނީ އައިއެސް ގެ މައްޗަށް ކުރި ހޯދާފަ އެވެ. އައިއެސް އިން ނެރޭ ބަޔާންތަކުގައި ތާލިބާނުންނަށް މުހާތަބުކޮށްފައި ވަނީ ކާފަރުންގެ ގޮތުގަ އެވެ.
