އދ، އެމެރިކާ (އޮކްޓޯބަރު 21) - ޔަމަނު ހަނގުރާމައިގައި ހަމަލާ ބަދަލު ކުރުން ވަރުގަދަ ނުކުރަން އދ. ގެ ސަލާމަތީ މަޖިލީހުން ގޮވާލައިފި އެވެ.
ސަލާމަތީ މަޖިލީހުގެ 15 ގައުމު އެއްބަސްވެގެން ނެރުނު ބަޔާނެއްގައި ބުނީ "ބޮޑު ބަނޑުހައި ހޫނުކަމެއް" ޔަމަނުގައި ފެތުރުމުގެ ބިރު އެބަ އޮތް ކަމަށެވެ.
"ހުރިހާ ފަރާތަތަކުން ވެސް ހަމަލާތައް މައިތިރިކޮށް، މިހާރުން މިހާރަށް ސުލްހަ ގެނައުމަށް" އެ ބަޔާނުގައި ގޮވާލާފައި ވެ އެވެ. މަރިބް ސިޓީ ހިފަން ހޫތީން ދޭ ހަމަލާތައް ހުއްޓާލަން ވެސް ގޮވާލި އެވެ.
އޭގެ އިތުރުން ހަނގުރާމައިގައި ކުޑަކުދިން ބޭނުން ކުރުމާއި ޖިންސީ އަނިޔާތައް ދެމުންދާ މައްސަލައިގައި ވެސް ސަލާމަތީ މަޖިލީހުގެ ގައުމުތަކުން ކަންބޮޑުވުން ފާޅުކުރި އެވެ.
ގައުމުތަކުން ޔަމަނު ސަރުކާރަށް ހޮވާލީ ތެޔި ހިފައިގެން އަންނަ މަނަވަރުތަކަށް ގަވާއިދުން ހޮދެއިދާ ބަނދަރަށް ވަދެވޭނެ ގޮތް ހެދުމަށާއި އިންސާނީ އެހީ ހުއްޓުމެއް ނެތި ރައްޔިތުންނާ ހަމައަށް ފޯރާނެ ގޮތް ހެދުމަށެވެ.
އޭގެ އިތުރުން "ސޭފާ އޮއިލް ޓޭންކަރާ" މެދު ގައުމުތަކުން ކަންބޮޑުވުން ފާޅުކުރި އެވެ. ހޮދެއިދާ ކައިރީގައި އޮތް 45 އަހަރުވީ ތެޔޮ އުފުލާ އެ ބޯޓު ގޮވުން ނުވަތަ އަޑިއަށް ދިޔުމުގެ ނުރައްކާ އެބަ އޮތެވެ.
އދ. ގެ ސަލާމަތީ މަޖިލީހުން ބުނީ އެ ބޯޓާ މެދު ފިޔަވަޅެއް ނޭޅި ދިގުލައިގެން ދިޔުމުގެ ޒިންމާ އުފުލަން ޖެހޭނީ ހޫތީ ހަނގުރާމަވެރިން ކަމަށެވެ. އެއީ ބޯޓުގެ އެސެސްމަންޓު ހަދަން އދ. ގެ އޮފިޝަލުންނަށް ހޫތީން ހުރަސްއަޅަމުން ދާތީ އެވެ.
ޔަމަނުގެ ހަތް އަހަރުވީ ހަނގުރާމަ ފެށީ އިންތިހާބީ ސަރުކާރާ ދެކޮޅަށް އިރާނުގެ އެހީއާ އެކު ހޫތީ ހަނގުރާމަވެރިން ތެދުވެ، ވަކި ސަރުކާރެއް ގާއިމްކުރުމުންނެވެ.
ދެހާސް ސާދަ ވަނަ އަހަރު ވެރިރަށް ސަނާ ހިފުމާއެކު ސައުދީ ކޯލިޝަނުން ޔަމަނު ސަރުކާރުގެ ފައުޖަށް އެހީތެރިކަން ފޯރުކޮށްދޭން ފެށި އެވެ. މިހާތަނަށް އެތައް ހާސް ބަޔަކު މަރުވެ، އެތައް މިލިއަން ބަޔެއްގެ ގެދޮރު ގެއްލިފައި ވެ އެވެ.
ޔަމަނުގެ އާބާދީގެ 30 މިލިއަން މީހުންގެ ތެރެއިން 80 ޕަސެންޓު މިހާރު ބަރޯސާވަނީ ބޭރުގެ އެހީ އަށެވެ. އދ. އިން ޔަމަނުގެ ހާލަތު ސިފަކުރަނީ ދުނިޔެއަށް ދިމާވެފައިވާ އެންމެ ބޮޑު އިންސާނީ ކާރިސާގެ ގޮތުގަ އެވެ.
