ބާލިން، ޖަރުމަނުވިލާތް (އޮކްޓޯބަރު 20) - "ޓެރަރިސްޓު" ލަޝްކަރެއް ހަދައިގެން ޔަމަނުގެ ދާހިލީ ހަނގުރާމައިގެ ތެރެއަށް ވަންނަން އުޅުނު ކަމުގެ ތުހުމަތަށް ޖަރުމަނުގެ ކުރީގެ ދެ ސިފައިންގެ މީހުން ހައްޔަރުކޮށްފި އެވެ.
ޖަރުމަނުގެ ޕްރޮސެކިއުޓަރުން ބުނީ އެ ދެ މީހުން ވަނީ "100 އާއި 150 އާ ދެމެދުގެ އަދަދަކަށް މީހުން ހިމެނޭ އަސްކަރީ ޔުނިޓެއް އުފައްދަން" ފިޔަވަޅުތަކެއް އަޅާފައި ކަމަށެވެ. އެއީ އެރެންޑް އެޑޯލްފް ޖީ އަދި އަޝިމް އޭ ނަމަކަށް ކިޔާ ދެ މީހުންނެވެ. ދެ މީހުންނަކީ ވެސް ޖަރުމަނުގެ ރައްޔިތުންނެވެ.
ތުހުމަތު ކުރެވޭ ގޮތުގައި މި އަހަރުގެ ކުރީކޮޅު އެ މީހުން ވަނީ "ޓެރަރިސްޓު ގްރޫޕުގެ" ކަންކަން ރާވަން ފަށާފަ އެވެ. މީހުން ރެކްރޫޓް ކުރުމުގައި އުޅުނު އެރެންޑް އެޑޯލްފް ޖީ ހަތް މީހަކަށް ގުޅި ކަމަށާއި ބޭނުމަކީ ޔަމަނުގެ ދާހިލީ ހަނގުރާމައިގެ ތެރެއަށް ވަނުން ކަމަށް ޕްރޮސެކިއުޓަރުން ބުންޏެވެ.
ތުހުމަތު ކުރެވޭ ދެ މީހުން ވެސް ތިބީ އެ މީހުންގެ މިޝަންގައި މީހުން މެރުމަށް ތައްޔާރަށް ކަމަށާއި އެގޮތުން އާއްމުން މަރަން ޖެހުމަކީ ވެސް އެކަށީގެންވާ ކަމެއްގެ ގޮތުގައި އެ މީހުން ދެކުނު ކަމަށް ޕްރޮސެކިއުޓަރުން ބުންޏެވެ.
އެ މީހުން އުއްމީދުކޮށްގެން ތިބީ ސައުދީ އަރަބިއްޔާ އިން އެ މިޝަނަށް ފައިސާ ހޯދުމަށެވެ. އެގޮތުން ލަޝްކަރުގެ ކޮންމެ މެމްބަރަކަށް މަހު މުސާރައިގެ ގޮތުގައި 46،000 ޑޮލަރު ދޭން ރޭވި އެވެ.
އާޝިމް އޭ އަށް ތުހުމަތު ކުރެވެނީ ސައުދީ އަރަބިއްޔާގެ ސަރުކާރަށް ގުޅައި ބައްދަލުވުމަކަށް އެދުނު ކަމަށެވެ. ނަމަވެސް ސައުދީ ސަރުކާރުން ޖަވާބު ނުދޭ ކަމަށް ޕްރޮސެކިއުޓަރުން ބުންޏެވެ.
ޔަމަނުގެ ދާހިލީ ހަނގުރާމައިގައި އިރާނުން އެހީވާ ހޫތީ ހަނގުރާމަވެރިންނާ ދެކޮޅަށް ޔަމަނު ސަރުކާރުގެ ފައުޖަށް އެހީވަނީ ސައުދީގެ އަސްކަރީ ކޯލިޝަނުންނެވެ.
ޔަމަނުގެ ހަތް އަހަރުވީ ހަނގުރާމަ ފެށީ އިންތިހާބީ ސަރުކާރާ ދެކޮޅަށް އިރާނުގެ އެހީއާ އެކު ހޫތީ ހަނގުރާމަވެރިން ތެދުވެ، ވަކި ސަރުކާރެއް ގާއިމްކުރުމުންނެވެ.
ދެހާސް ސާދަ ވަނަ އަހަރު ވެރިރަށް ސަނާ ހިފުމާއެކު ސައުދީ ކޯލިޝަނުން ޔަމަނު ސަރުކާރުގެ ފައުޖަށް އެހީތެރިކަން ފޯރުކޮށްދޭން ފެށި އެވެ. މިހާތަނަށް އެތައް ހާސް ބަޔަކު މަރުވެ، އެތައް މިލިއަން ބަޔެއްގެ ގެދޮރު ގެއްލިފައި ވެ އެވެ.
ޔަމަނުގެ އާބާދީގެ 30 މިލިއަން މީހުންގެ ތެރެއިން 80 ޕަސެންޓު މިހާރު ބަރޯސާވަނީ ބޭރުގެ އެހީ އަށެވެ. އދ. އިން ޔަމަނުގެ ހާލަތު ސިފަކުރަނީ ދުނިޔެއަށް ދިމާވެފައިވާ އެންމެ ބޮޑު އިންސާނީ ކާރިސާގެ ގޮތުގަ އެވެ.
