މޮސްކޯ، ރަޝިއާ (އޮކްޓޯބަރު 20) - ދުނިޔޭގެ ގައުމުތަކުން ތާލިބާން ސަރުކާރު ބަލައިގަންނަން އެދޭ ނަމަ ވައުދު ވެފައިވާ ގޮތަށް އަފްގާނިސްތާނުގައި އިންސާނީ ހައްގުތައް ދިނުމަށް ރަޝިއާ އިން ބާރު އަޅައިފި އެވެ.
ރަޝިއާގެ އިސްނެގުމަށް ބުދަ ދުވަހު 10 ގައުމެއްގެ ބައިވެރިވުމާއެކު މޮސްކޯގައި ތާލިބާނުންނާއެކު މަޝްވަރާ ބައްދަލުވުންތައް ބޭއްވި އެވެ. ރަޝިއާގެ މަންދޫބު ޒާމިރު ކަބުލޯވް ވިދާޅުވީ ތާލިބާނުން ބަލައިގަންނާނީ އިންސާނީ ހައްގުތައް ދޭން ފެށުމުން ކަމަށެވެ.
ތާލިބާނުން ވަނީ އިންސާނީ ހައްގުތަކާއި ހުރިހާ ފަރާތެއްގެ ބައިވެރިވުން ހިމެނޭ ވެރިކަމެއް ހިންގުމުގައި ކުރިއެރުންތަކެއް ހޯދަމުންދާކަމުގެ ޔަގީންކަން ގައުމުތަކަށް ދީފަ އެވެ.
ބައްދަލުވުމަށް ފަހު ކަބުލޯވް ބައިނަލްއަގްވާމީ މުޖުތަމައަށް ގޮވާލީ "ތަފާތު ކުރުން ނުގެންގުޅެ" އަފްގާނިސްތާނުގެ ރައްޔިތުންނަށް އެހީތެރިކަން ފޯރުކޮށްދިނުމަށެވެ.
"އަފްގާނިސްތާނުގައި އޮތް އާ ސަރުކާރު އެންމެންނަށް ކަމަކު ނުދޭ. އެކަމަކު އެ ސަރުކާރަށް އަދަބު ދިނުމުން، އަދަބު އެ ދެވެނީ ހުރިހާ ރައްޔިތުންނަށް."
ބައްދަލުވުމުގައި ބައިވެރިވި 10 ގައުމު ގުޅިގެން ނެރޭ ބަޔާނެއްގައި އަފްގާނިސްތާނަށް އެހީވާން ފައިސާ ހޯދުމާ ގުޅޭ ކޮންފެރެންސެއް ބޭއްވުމަށް އދ. އަށް ގޮވާލަން ވަނީ ނިންމާފަ އެވެ.
ކަބުލޯވްގެ ވާހަކަތާ ގުޅިގެން ތާލިބާނުން މިހާތަނަށް ވަކި އެއްޗެއް ބުނެފައެއް ނުވެ އެވެ. ނަމަވެސް ތާލިބާނުންގެ ޑެޕިއުޓީ ބޮޑު ވަޒީރު އަބްދުލް ސަލާމް ހަނަފީ ބުދަ ދުވަހު ބުނީ މިހާރު ވެސް އޮތީ "އެންމެންގެ ބައިވެރިވުން ހިމެނޭ" ސަރުކާރެއް ކަމަށެވެ.
"ބޭރުގެ އަސްކަރީ އެހީ ބޭނުމެއް ނުވޭ. އަފްގާނިސްތާނަށް ބޭނުން ވަނީ ސުލްހަ ގާއިމްކުރަން އެހީ. ބޭނުން ވަނީ އަލުން ބިނާ ކުރުމާއި އަލުން ވަޒަންވެރިވުން."
ޗައިނާ އާއި ޕާކިސްތާން ހިމެނޭ ގޮތަށް ބުދަ ދުވަހު ބޭއްވި ބައްދަލުވުމަކީ މިދިޔަ އޯގަސްޓު މަހު ތާލިބާނުން ވެރިކަމަށް އައުމަށް ފަހު އެ މީހުންނާއެކު ބޭއްވި އެންމެ ބޮޑު އެއް ބައްދަލުވުމެވެ.
މިދިޔަ ހަފުތާގައި އެމެރިކާ އާއި ޔޫރަޕިއަން ޔޫނިއަން (އީޔޫ) އާއެކު ތާލިބާނުންގެ ބައްދަލުވުންތައް އޮތެވެ. އޭގެ ކުރިން ތާލިބާނުން ވަނީ ތުރުކީގެ އޮފިޝަލުންނާ ބައްދަލުކޮށްފަ އެވެ.
ބައްދަލުވުންތަކަށް ފަހު އީޔޫ އިން ބުނީ އަފްގާނިސްތާނަށް ކުރިމަތިވެފައިވާ އިންސާނީ ކާރިސާ އިން އަރައިގަތުމަށް 1.2 ބިލިއަން ޑޮލަރުގެ އެހީ ފޯރުކޮށްދޭނެ ކަމަށެވެ.
