އުމުރުން 18 އަހަރުން ދަށުގެ ކުޅުންތެރިޔަކާ އެކު ޖިންސީ ގުޅުން ހިންގިކަމުގެ ތުހުމަތާއި، އެހެން ކުޅުންތެރިންނަށް ޖިންސީ ގޯނާކުރި ކަމަށް ބުނާ މައްސަލާގައި ހައްޔަރުކުރި ގައުމީ ކްރިކެޓް ޓީމުގެ ކުރީގެ ކޯޗު މުހައްމަދު އާސިފް ހާންގެ ޝަރީއަތުގައި އިއްޔެއަށް ތާވަލުކުރި އަޑުއެހުންވެސް ހެކިން ހާޒިރު ނުކުރެވުމުގެ ސަބަބުން ކެންސަލްކޮށްފި އެވެ.
ޕާކިސްތާނަށް އުފަން އެކަމަކު ދެކުނު އެފްރިކާގެ ރަށްވެހިކަން ހޯދާފައިވާ މުހައްމަދު އާސިފް އަމީން ހާންގެ މައްޗަށް އޭނާ ކޯޗު ކޮށްދިން ކުދިންތަކަކާ މެދު ބަދުއަހުލާގީ އަމަލު ހިންގި ކަމަށް ތުހުމަތު ކުރެވޭ މައްސަލައިގައި ނުވަ ދައުވާއެއް އުފުލީ ޑިސެމްބަރު 5، 2019 ގަ އެވެ.
ޕީޖީ އޮފީހުގެ ތަރުޖަމާނު އަދި ޕަބްލިކް ޕްރޮސެކިއުޓާ އަދި އަހުމަދު ޝަފީއު "އަދަދު" އަށް ވިދާޅުވީ 2019 ވަނަ އަހަރުގެ ތެރޭގައި މި މައްސަލައާއި ގުޅިގެން ކްރިމިނަލް ކޯޓުގައި ތިން އަޑުއެހުމެއް ބޭއްވިފައިވާއިރު، މިދިޔަ އަހަރު ފަސް އަޑުއެހުމެއް ބޭއްވިފައިވާ ކަމަށެވެ. އަދި މިއަހަރު މިހާތަނަށް ހަތަރު އަޑުއެހުމެއް ތާވަލް ކުރެވިފައި ވީނަމަވެސް ކުރިއަށް ގެންދެވުނީ ދެ އަޑުއެހުމެއް ކަމަށް ވިދާޅުވި އެވެ.
އިއްޔެގެ އަޑުއެހުމަށް ހެކިވެރިން ހާޒިރު ނުކުރެވިގެން ކެންސަލް ކޮށްފައިވާއިރު، މިމަހުގެ ކުރީކޮޅު ބޭއްވުނު އަޑުއެހުމެއްގައި ވަނީ ހެކިވެރިއެއްގެ ހެކިބަސް ނަގާފަ އެވެ. އެ އަޑުއެހުން ބޭއްވުނީ މައްސަލައިގެ އަޑުއެހުމެއް ނުބޭއްވޭތާ އަށް މަސް ދުވަސް ފަހުންނެވެ.
އާސިފް ފުރަތަމަ ހައްޔަރުކުރީ ރާއްޖެއިން ފުރަން ވެލާނާ އިންޓަނޭޝަނަލް އެއާޕޯޓުގައި ހުއްޓައި 2019 ވަނަ އަހަރުގެ އޮކްޓޯބަރު މަހުގެ ފަސް ވަނަ ދުވަހު އެވެ. އޭނާ ހައްޔަރުކުރީ 18 އަހަރުން ދަށުގެ ކުދިންނާއި އަދި 18 އަހަރުން މަތީގެ އަންހެނުންނަށް ޖިންސީ ގޯނާކޮށް ފުރައްސާރަ ކުރި ކަމުގެ ތުހުމަތުގަ އެވެ.
ނަމަވެސް އޭނާ ހައްޔަރުކުރިތާ 24 ގަޑިއިރު ތެރޭގައި ކޯޓަށް ހާޒިރުކޮށްފައި ނުވާތީ އޭނާ ދޫކޮށްލުމަށް ކްރިމިނަލް ކޯޓުން އަމުރުކުރިއެވެ. އޭނާ ދޫވި ނަމަވެސް، އޭރު އޭނާގެ ޕާސްޕޯޓް ހިފަހައްޓައި ފުރުން ވަނީ މަނާކޮށްފަ އެވެ.
އެ މައްސަލާގައި އާސިފް ފަހުން ހައްޔަރުކުރީ ހައިކޯޓުގެ އަމުރެއްގެ ދަށުން ނޮވެމްބަރު މަހުގެ ހަތް ވަނަ ދުވަހު އެވެ. އެއީ އެފަދަ އަމުރެއް ކްރިމިނަލް ކޯޓުން ނުލިބުމުން ދައުލަތުގެ ފަރާތުން އެ މައްސަލަ ހައިކޯޓުގައި އިސްތިއުނާފު ކުރުމުން، އޭނާ ހައްޔަރުކުރަން ހައިކޯޓުން އަމުރު ދިނުމުންނެވެ.
