މޮސްކޯ، ރަޝިއާ (އޮކްޓޯބަރު 20) - އަފްގާނިސްތާނުގައި ވެރިކަން ކުރަމުންދާ ތާލިބާނާއެކު މަޝްވަރާ ކުރުމަށް ދުނިޔޭގެ 10 ގައުމެއްގެ އޮފިޝަލުން ރަޝިއާ އަށް ހިނގައްޖެ އެވެ.
ޗައިނާ އާއި ޕާކިސްތާން ހިމެނޭ ގޮތަށް ބާއްވާ މި ބައްދަލުވުމަކީ މިދިޔަ އޯގަސްޓު މަހު ތާލިބާނުން ވެރިކަމަށް އައުމަށް ފަހު އެ މީހުންނާއެކު ބާއްވާ އެންމެ ބޮޑު އެއް ބައްދަލުވުމެވެ.
ރަޝިއާގެ އިސްނެގުމަށް މި ބައްދަލުވުން ރޭވިއިރު، މިދިޔަ ހަފުތާގައި އެ ގައުމުގެ ރައީސް ލެޑިމިއަ ޕޫޓިން ވިދާޅުވީ އިސްލާމިކް ސްޓޭޓް (އައިއެސް) މެމްބަރުން އަފްގާނިސްތާނަށް ޖަމާވާން ފަށައިފި ކަމަށެވެ.
ބުދަ ދުވަހު ފަށާ ބައްދަލުވުމުގައި ރަޝިއާގެ ފަރާތުން ބައިވެރިވެވަޑައިގަންނަވަނީ ފޮރިން މިނިސްޓަރު ސާގެއި ލެވްރޯވް އެވެ. ތާލިބާން ވަފުދުގައި އެންމެ އިސްކޮށް ހުންނާނީ ޑެޕިއުޓީ ބޮޑު ވަޒީރު އަބްދުލް ސަލާމް ހަނަފީ އެވެ.
މިދިޔަ ހަފުތާގައި އެމެރިކާ އާއި ޔޫރަޕިއަން ޔޫނިއަން (އީޔޫ) އާއެކު ތާލިބާނުން ބޭއްވި ބައްދަލުވުންތަކުގައި ވެސް އިސްކޮށް ހުރީ ހަނަފީ އެވެ. އޭގެ ކުރިން ތާލިބާނުން ވަނީ ތުރުކީގެ އޮފިޝަލުންނާ ބައްދަލުކޮށްފަ އެވެ.
ބައްދަލުވުންތަކަށް ފަހު އީޔޫ އިން ބުނީ އަފްގާނިސްތާނަށް ކުރިމަތިވެފައިވާ އިންސާނީ ކާރިސާ އިން އަރައިގަތުމަށް 1.2 ބިލިއަން ޑޮލަރުގެ އެހީ ފޯރުކޮށްދޭނެ ކަމަށެވެ.
ރަޝިއާގެ ފޮރިން މިނިސްޓްރީން ބުނީ އެ ގައުމުން އިސްވެ ފަށާ ބައްދަލުވުންތަކުގެ އެންމެ ބޮޑު ބޭނުމަކީ ވެސް އަފްގާނިސްތާނަށް އެހީ ފޯރުކޮށްދެވޭނެ ގޮތްތައް ބެލުން ކަމަށެވެ.
އެޖެންޑާގައި އިތުރަށް ހިމެނެނީ "ހުރިހާ ފަރާތްތަކެއްގެ ބައިވެރިވުން ހިމެނޭ ސަރުކާރެއް ހެދުމާއި" އައިއެސްގެ ނުރައްކާ އޮތް މިންވަރާ ގުޅޭ ވާހަކަތަކެވެ.
މީގެ ކުރިން ވެސް ރަޝިއާ އިން ވަނީ ތާލިބާނުންގެ އިސް އޮފިޝަލުން އެ ގައުމަށް ގެނެސް ބައްދަލުވުންތައް ބާއްވާފަ އެވެ. ނަމަވެސް ތާލިބާނުންނަކީ ޓެރަރިސްޓް ޖަމާއަތެއް ކަމަށް ރަޝިއާ އިން ދެކެ އެވެ.
