ޖިނާއީ އިޖުރާއަތުގެ ގާނޫނު ފާސް ކުރުމަށް ރައްޔިތުންގެ މަޖިލީހުގައި ބޭއްވި ކޮމިޓީތަކުގެ ޔައުމިއްޔާ ހޯދަން ކުރިމިނަލް ކޯޓުން އެދުނީ ކުރީގެ ޓުއަރިޒަމް މިނިސްޓަރު އަލީ ވަހީދުގެ މައްޗަށް ހިންގާ ޖިންސީ އަނިޔާ ކުރުމާއި ރޭޕު ކުރަން އުޅުމުގެ ޝަރީއަތުގެ ބޭނުމަށްކަން އެނގިއްޖެ އެވެ.
ޖިނާއީ އިޖުރާއަތުގެ ގާނޫނު ފާސް ކުރިއިރު މަޖިލީހުގައި ދެކެވުނު ވާހަކަތައް ހޯދުމަށް ކްރިމިނަލް ކޯޓުން އެދިފައިވާ ކަމަށް އިއްޔެ ބޭއްވި ރައްޔިތުންގެ ސަލާމަތާ ބެހޭ ކޮމެޓީގެ ބައްދަލުވުމުގައި އެ ކޮމެޓީގެ މުގައްރިރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް އޮތީ ވިދާޅުވެފަ އެވެ.
"އަދަދު" އަށް ކަށަވަރުވެފައިވާ ގޮތުގައި ކްރިމިނަލް ކޯޓުން މަޖިލީހުގެ ޔައުމިއްޔާތައް ހޯދަނީ އަލީ ވަހީދުގެ ފަރާތުން ޝަރީއަތަށް ހުށަހެޅި ނުކުތާއަކާ ގުޅިގެންނެވެ. އޭނާގެ މައްޗަށް އުފުލާ ދައުވާތައް ބާތިލް ކުރުމަށް އެދިވަޑައިގެން، އަލީ ވަހީދުގެ ފަރާތުން ކޯޓަށް ހުށަހަޅާފައިވާ ޕްރީ ޓްރަޔަލް މޯޝަންގައި ބުނެފައި ވަނީ އޭނާގެ މައްޗަށް ދައުލަތުން ދައުވާ އުފުލާފައި ވަނީ ޖިނާއީ އިޖުރާއަތުގެ ގާނޫނުގެ 82 ވަނަ މާއްދާއާ ހިލާފަށް ކަމަށެވެ. މަޖިލިސް ކޮމިޓީގެ ޔައުމިއްޔާތައް ހޯދަނީ މި ނުކުތާއާ ގުޅިގެން ޖިނާއީ އިޖުރާއަތުގެ ގާނޫނުގެ 82 ވަނަ މާއްދާ މާނަކުރުމަށް ކަމަށް 'އަދަދު' އަށް ވަނީ އެނގިފަ އެވެ.
އަލީ ވަހީދުގެ މައްޗަށް ދައުވާ އުފުލާފައި ވަނީ ޖިނާއީ އިޖުރާއަތުގެ ގާނޫނުގެ 82 ވަނަ މާއްދާގެ (ބ) އާ ހިލާފަށް ކަމަށް އޭނާގެ ފަރާތުން ޝަރީއަތުގައި ބުނެފައި ވެއެވެ.
titledesc
އަލީ ވަހީދުގެ މައްޗަށް ދައުވާކޮށްފައިވަނީ މި މާއްދާއާ ހިލާފަށްކަމަށް އޭނާގެ ފަރާތުން ބުނާ ސަބަބަކީ ކުށުގެ އަމަލެއްގެ ގޮތުން އަލީ ވަހީދު ކުރީ ކޮން އަމަލެއްކަން ދައުވާގައި ސާފުކޮށް ބަޔާންކޮށްފައި ނެތުމާއި، ކުށުގެ އަމަލު ހިނގި ތާރީހާއި ވަގުތު ބަޔާންކޮށްފައި ނެތުމާއި، އެ ކުށަކީ މީހަކާ ދެކޮޅަށް ކުރެވުނު ކުށެއް ކަމަށް ބުނާއިރު އަނިޔާލިބުނު މީހުންގެ ނަން ސިއްރު ކުރުމެވެ.
މި ނުކުތާއަށް ޖަވާބު ދެމުން ދައުލަތުން ބުނެފައި ވަނީ އަނިޔާލިބުނު މީހުންގެ މައުލޫމާތު ދައުވާގައި ހިމަނާފައި ނުވަނީ އެ މީހުންނަކީ މި މައްސަލައިގައި ހެކިބަސްދޭނޭ ފަރާތްތަކަކަށްވާތީ ޖިނާއީ އިޖުރާއަތުގެ ގާނޫނުގެ 131 ވަނަ މާއްދާގެ (ނ) ގެ ދަށުން ހެކި ސިއްރު ކުރުމުގެ ބޭނުމަށް ކަމަށެވެ. އަދި ދައުވާގައި ހާދިސާ ހިނގި ސީދާ ތާރީހާއި ވަގުތު ބަޔާންކޮށްފައި ނެތްނަމަވެސް، އެ ހާދިސާ ހިނގި މުއްދަތު ޖުމުލަކޮށް ބަޔާންކޮށްފައި ވާނޭކަމަށްވެސް ދައުލަތުން ބުނެފައި ވެއެވެ.
މި މައްސަލައިގައި މިހާރު އޮތީ ޝަރީއަތުގެ ކުރިން ހުށަހަޅާ ހުށަހެޅުންތަކާމެދު ގޮތް ނިންމުމެވެ. އަލީ ވަހީދު ލަންޑަނުގައި ހުންނަވައިގެން ކުރިމިނަލް ކޯޓުގައި ބައެއް އަޑުއެހުންތަކުގައި ބައިވެރިވެ، ޝަރީއަތް ކުރިއަށް ގެންގޮސްފައި ވެއެވެ. އެހެންނަމަވެސް އަލީ ވަހީދު ރާއްޖެއިން ބޭރުގައި ހުއްޓާ އެ މައްސަލައިގެ އަޑުއެހުންތައް އޮންލައިންކޮށް ކުރިއަށް ނުގެންދެވޭނޭ ކަމަށް ސުޕްރީމް ކޯޓުން ކަނޑައެޅުމުން އެ މައްސަލައިގެ އަޑުއެހުންތައް މިހާރު ވަނީ މެދުކެނޑިފަ އެވެ.
އަލީ ވަހީދު މިވަގުތު ހުންނެވީ އިނގިރޭސިވިލާތުގަ އެވެ. އޭނާ ތުރުކީ މަގުން ލަންޑަނަށް ވަޑައިގެންނެވީ ފުރުން މަނާ ކުރުމަށް ކްރިމިނަލް ކޯޓުން ނެރެފައިވާ އަމުރު ބާތިލް ކުރުމާއެކު އެވެ. އޭނާގެ މައްޗަށް ޝަރީއަތް ހިންގުމަށް ރާއްޖެ ވަޑައިގަތުމަށް މިހާރު ކޯޓުން ވެސް ވަނީ އަންގައިފަ އެވެ.
