މީގެ ތިން ދުވަސް ކުރިން މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) އިން ފަށައިގެން ކުރިއަށް އެ ގެންދާ "ބުކް ފެއާ"ގެ އެންމެ ސަޅީ އެތަނުގެ "ވައިބް" އެވެ. ދަނާލު ކުރިމައްޗަށް ހުރި ދޮރާށިން އިމާރާތައް ވަންނަން އޮންނަ ހޯލްވޭ ގެ ދެ އަރިމަތީގައި މޭޒުތަކެއް އަތުރައިގެން ފޮތް ވިއްކަން ތިބީ ހުސް ދިވެހި ލިޔުންތެރިންނެވެ. ޅެންވެރިންނެވެ. އެމީހުން ޝޯކޭސް ކުރަން ތިބީ، އެމީހުން ލިޔުނު ފޮތްތަކާއި މައުރަޒުން މޭޒު ނުލިބުނު ދިވެހި ލިޔުންތެރިންގެ ފޮތްތަކާއި އެތަނުން ފެނި ރައްޓެހިވި އެހެން ލިޔުންތެރިންގެ ފޮތްތަކެވެ. ދިވެއްސަކަސް، އިނގިރޭސި އަކަސް، އެތަނުގައި އޮތީ ހުސް "ދިވެހި" ފޮތެވެ.
"ދެރަ ކަމަކީ މި ތަންކޮޅު ކުޑަ ކަން. މިއަށްވުރެ ބޮޑުކޮށް، މިއަށްވުރެ ގިނަ ލިޔުންތެރިންނަށް މޭޒު ލިބުނު ނަމަ ވަރަށް ފުރިހަމަވީސް. އެކަމަކު މިހާރު ވެސް ވަރަށް ތަފާތު މާހައުލެއް މި އޮތީ. އަޅުގަނޑުމެން ލިޔާ މީހުން އެންމެން އެއްތަނަކުން ދިމާވީމަ ވަރަށް ތަފާތު އުފާވެރިކަމެއް މި ލިބުނީ،" ކުޑަކުދިންގެ ވާހަކަ ފޮތް ސީރީޒް، ޑިންޑިން ކޮއެލްގެ މުސައްނިފް، ލީނާ އަލީ ބުންޏެވެ.
މޭޒުތައް ގުޅުވައިގެން ދިހަވަރަކަށް ފޫޓުގެ ބޮޑު އެއް މޭޒަށް ހަދާފައި ހުރި އެތަނުގައި އެކަނިވެސް ހައެއްކަ ލިޔުންތެރިންގެ ފޮތް ހިމަނާފައިވެ އެވެ. ފޮތްތަކަށް އޮތީ، ކުޑަކުދިންގެ ވާހަކަ ފޮތްތަކުން ފެށިގެން ގޮސް ލޯބީގެ ދިވެހި ވާހަކަ އާއި ތަރުޖަމާ ފޮތްތަކާއި އިލްމީ ފޮތްތަކެވެ. އަދަބީ ދީނީ އަދި ޅެންވެރިންގެ ފޮތް ވެސް މައުރަޒުގައި ހިމަނާފައިވެ އެވެ. ކޮންމެ ފޮތެއްގެ ބޭރުގައި ބުކްޝޮޕް ތަކުން ފޮތް ލިބެން ހުރި އަގާއި، ފެއާ އިން ފޮތް ގަނެވެން ހުރި އެންމެ ހެޔޮ އަގު ގަނޑުކޮޅެއްގައި ލިޔެ ހަރުކޮށްފައި ވެ އެވެ.
އެމްއެންޔޫ ބުކްފެއާ ގެ ތެރެއިން
"އާންމުކޮށް ރާއްޖޭގައި ބާއްވާ ބޮޑެތި ފެއާ ތަކުގައި ގިނަ ފުރުސަތު ދޭނީ ބުކްޝޮޕްތަކަށް. އޭގެ ބަދަލުގައި ލިޔުންތެރިން އަމިއްލަ އަށް ފޮތް ހިފައިގެން އައިސް މިގޮތަށް ވިއްކާ އިރު މި ފައިދާ ވަނީ ލިޔުންތެރިޔާ އަށް ވެސް. ގަންނަ މީހާ އަށް ވެސް ފޮތް އަގުހެޔޮކޮށް ލިބޭތީ އެ ފައިދާ އެބަ ލިބޭ،" ލީނާ ބުންޏެވެ.
އޭނާ ބުނީ، ހުސް ދިވެހި ލިޔުންތެރިންގެ ފެއާ އަކަށް ވާތީ ދިވެހި ލިޔުންތެރިން ލިޔެފައި ހުންނަ އިނގިރޭސި ފޮތްތަކާއި، ދިވެހި ފޮތްތައް އެއްތަނަކުން ބަލައިލަން ލިބުމަކީ ދިވެހި ފޮތް ކިޔަން ޝައުގުވެރިވާ މީހުންނަށް ބޭނުންވާ ފޮތް ހޯދަން ލިބޭނެ ވަރަށް ފަސޭހަ ފުރުސަތެއް ކަމަށެވެ.
އެމްއެންޔޫ ބުކް ފެއާ ގެ ތެރެއިން
"ހާއްސަކޮށް، ކުޑަކުދިންގެ ދިވެހި ފޮތް ގަންނަން ވަރަށް އުނދަގޫވޭ ގިނަ ބެލެނިވެރިންނަށް ވެސް، ޓީޗަރުންނަށް ވެސް. މި ފެއާ އިން ހަމަ ޔަގީނުން ވެސް އެކަން އެބަ ފަސޭހަކޮށްދެވޭ،" ޑިންޑިން ކޮއެލް އިން ފެށިގެން، ދޮންތި ސީރީޒް އާއި މާހީމާހީ ފަދަ ފޮތްތައް އަތުރާފައިވާ މޭޒު ކައިރީގައި ހުރި ލީން ބުންޏެވެ.
ލީނާ ފާހަގަކުރީ، މައުރަޒުގެ ތެރެއިން ލިޔުންތެރިންގެ ގުޅުން ބަދަހިވި މިންވަރެވެ.
"އަޅުގަނޑުމެން މޭޒު ކައިރީގައި ވެސް މިހާރު މި ތިބެނީ ޑިއުޓީ ބަހާލައިގެން،" ލީނާ ބުންޏެވެ.
އިޖްތިމާއީ ތަރައްގީ ފަދަ ދާއިރާތަކަށް ލިޔުއްވާ އަހުމަދު ޝިޔާމް ވެސް ފާހަގަކުރީ ހަމަ އެއް މައްސަލަ އެވެ. ގިނަ ލިޔުންތެރިންނަށް މޭޒު ލިބޭ ގޮތަށް، ބޮޑު ތަނެއްގައި މިހާރަށްވުރެ ބޮޑު ފެއާ އެއްގެ ގޮތުގައި މި ކޮންސެޕްޓުގެ ފެއާ ބޭއްވުމުގެ މުހިއްމުކަން ފާހަގަކުރި އެވެ.
"ދިވެހި ލިޔުންތެރިންގެ މަސައްކަތް ކުރިއަރުވަން މިކަހަލަ ފުރުސަތު ވަރަށް ބޮޑަށް އެބަ ބޭނުންވޭ. މިތަނަށް ބެއްޔަސް އެބަތިބި ވަރަށް އަލަށް ލިޔަން ފެށި މީހުން ވެސް. އެއީ އެފަދަ ލިޔުންތެރިންނަށް ވެސް ލިބޭ ބޮޑު ފުރުސަތެއް،" ޝިޔާމް ބުންޏެވެ.
ޅެންވެރިޔާ އާއިޝަތު ހުސެއިން ވެސް ފާހަގަކުރެއްވީ ވެސް އެކަމެވެ.
އެހެންވީމަ، މާދަމާ ރޭ 10:00 ގެ ނިޔަލަށް އެމްއެންޔޫ ގައި އޮތް މި ބުކް ފެއާ ވަރަށް ސަޅި އެވެ.
