ނޭޕްލްސް، އިޓަލީ (އޮކްޓޫބަރު 18) - އިޓާލިއަން ލީގުގައި ރޭ ޓޮރީނޯ އަތުން 1-0 އިން މޮޅުވެ، ސައްތަ އިން ސައްތަ ރެކޯޑް ދަމަހައްޓައި ނަޕޯލީ ލީގުގެ އެއް ވަނަ އަށް އަލުން ޖެހިލައިފި އެވެ.
ނަޕޯލީ މި މެޗަށް ނުކުތްއިރު އެއް ވަނައިގައި އޮތީ ހޮނިހިރު ދުވަހުގެރޭ މޮޅުވި އޭސީ މިލާން އެވެ. ޔޫރަޕްގެ ވަރުގަދަ ފަސް ލީގަށް ބަލާއިރު މި ވަގުތު ކުޅުނު ހުރިހާ މެޗަކުން މޮޅުވެފައި އޮތީ ނަޕޯލީ އެކަންޏެވެ. ސައްތަ އިން ސައްތަ ރެކޯޑަކާ އެކު ނަޕޯލީ އެއް ވަނައިގައި އޮތީ އަށް މެޗުން 24 ޕޮއިންޓާ އެކު އެވެ. މިލާން ދެ ވަނައިގައި އޮތީ އަށް މެޗުން 22 ޕޮއިންޓާ އެކު އެވެ.
ނަޕޯލީ ދަނޑުގައި ރޭ ކުޅުނު މެޗުގެ 26 ވަނަ މިނިޓްގައި ލީޑުނަގަން ނަޕޯލީގެ ކެޕްޓަން ލޮރެންޒޯ އިންސީނިއޭ ޖެހި ޕެނަލްޓީ ޓޮރީނޯގެ ކީޕަރު ވަންޖާ މިލިންކޮވިޗް-ސަވިޗް ވަނީ މަތަކޮށްފަ އެވެ.
ދެ ވަނަ ހާފްގައި ޖިއޮވާނީ ޑި ލޮރެންޒޯ ޖެހި ގޯލެއް ވަނީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ބަލައިނުގަންނަން ނިންމައިފަ އެވެ.
މެޗުން ނަޕޯލީ މޮޅުވި ގޯލު ޖެހީ 81 ވަނަ މިނިޓްގައި ނައިޖީރިއާގެ ފޯވާޑް ވިކްޓަ އޮސިމްހެއިން އެވެ.
ލީގުގައި ރޭ ހޯސޭ މޮރީނިއޯގެ ރޯމާ ކުޅުނު މެޗުން ރަށުންބޭރުގައި ވަނީ ޔުވެންޓަސް އަތުން ބަލިވެފަ އެވެ. މެޗުގައި ފެނިގެންދިޔަ ހަމައެކަނި ގޯލު ޖެހީ 16 ވަނަ މިނިޓްގައި މޮއިސޭ ކީން އެވެ.
ރޯމާ އަށް އެއްވަރުކޮށްދޭން އެންމެ ރަނގަޅު ފުރުސަތު ލިބުނީ ޖޯޑަން ވެރެޓޫޓް އަށެވެ. އޭނާ ފޮނުވާލި ޕެނަލްޓީ ޔުވެންޓަސްގެ ޕޮލިޝް ކީޕަރު ވޮޒްޝިއޭ ޝެޒްނީ ވަނީ މަތަކޮށްފަ އެވެ. އޭގެ އިތުރުުން ރޯމާގެ ޓެމީ އަބްރަހަމް އާއި ޖިއަންލޫކާ މަންޗިނީ ޖެހި ބޯޅަތައް ވެސް ޝެޒްނީ ވަނީ ހުއްޓުވައިފަ އެވެ.
ލީގުގައި ޖެހިޖެހިގެން ހަތަރު ވަނަ މެޗުން ހޯދި މޮޅާ އެކު ޔުވެންޓަސް އޮތީ އަށް މެޗުން 14 ޕޮއިންޓާ އެކު ލީގުގެ ހަތް ވަނައިގަ އެވެ.
