ދާކާ، ބަންގްލަދޭޝް (އޮކްޓޯބަރު 14) - ބަންގްލަދޭޝްގައި ދީނީ ހަމަނުޖެހުން ބޮޑުވެ ހިނގި ކުރިމަތިލުންތަކުގައި ހަތަރު މީހެއްގެ ގަޔަށް ފުލުހުން ބަޑި ޖަހައި މަރާލައިފި އެވެ.
މުސްލިމުންގެ މެޖޯރިޓީ އޮންނަ ބަންގްލަދޭޝްގައި ގިނަ ބަޔަކު ބުރާސްފަތި ދުވަހު މުޒާހަރާ ކުރަން ނުކުމެ، ހިންދޫ ފައްޅިތަކުގައި ހުޅުޖެހި އެވެ. ފުލުހުން ވަނީ އެ މީހުންގެ ތެރެއަށް ބަޑި ޖަހައިފަ އެވެ.
ފަސް ސަތޭކައެއްހާ މީހުން ފައްޅިތަކުގައި ހުޅު ޖަހަން ފެށީ ހިންދޫ ފެސްޓިވަލެއްގައި ރާމާމަކުނު ކަލާނގެ ކަކޫ މަތީގައި ކީރިތި ގުރުއާނުގެ މުސްހަފެއް ބާއްވާ ވީޑިއޯއެއް އާއްމުވުމުންނެވެ.
ފުލުހުން ބުނީ ދެކުނު ހާޖީގަންޖް އަވަށުގައި އެއްވި މީހުންގެ ތެރެއަށް ބަޑި ޖެހުމުން ހަތަރު މީހަކު މަރުވި ކަމަށާއި 24 މީހުންނަށް އަނިޔާވި ކަމަށެވެ. އޭގެ ތެރޭގައި 15 ފުލުހުން ހިމެނެ އެވެ.
މިދިޔަ ބުދަ ދުވަހު ވެސް ހަމަނުޖެހުން ހިނގައި ހިންދޫ ދެ މީހުން މަރުވެ، 150 އަށް ވުރެ ގިނަ މީހުންނަށް އަނިޔާވި އެވެ. އެ ދުވަހު 80 އަށް ވުރެ ގިނަ ފައްޅި އަށް ހަމަލާދިނެވެ.
ފުލުހުން ބުނީ ދައުރުވަމުންދާ ވީޑިއޯ އިން ފެންނަ ފައްޅި އަށް ވެސް ހަމަލާ ދިން ކަމަށާއި އެ ތަނުން 40 މީހުން ހައްޔަރުކޮށްފައިވާ ކަމަށެވެ.
ބައެއް ހިންދޫންގެ ގެތަކަށް ވެސް ހަމަލާ ދޭން އުޅޭ ކަމުގެ ތުހުމަތުތަކާ އެކު ހޯމް މިނިސްޓަރު އަސަދުއްޒަމާން ހާން ވިދާޅުވީ ކުށްވެރިން ހިފައި ހައްޔަރު ކުރާނެ ކަމަށެވެ.
ސަރުކާރުން ނެރުނު ބަޔާނެއްގައި ބުނީ ހަމަނުޖެހުމާ ގުޅޭ ފުރިހަމަ ތަހުގީގެއް ހިންގާނެ ކަމަށާއި ދީނީ ހަމަޖެހުމާއި ސުލްހަ އަދި ސަލާމަތަށް އިސްކަން ދިނުމަށް ބާރު އަޅާ ކަމަށެވެ.
ހިންދޫ ފެސްޓިވަލާ ދިމާކޮށް ބަންގްލަދޭޝްގެ 64 ޑިސްޓްރިކްޓުގެ ތެރެއިން 22 ޑިސްޓްރިކްޓަށް ޕެރެމިލިޓަރީ ބޯޑަރު ގާޑުން ސެކިއުރިޓީ ބަލަހައްޓަން ފޮނުވާފައި ވެ އެވެ.
ބަންގްލަދޭޝްގެ ނޫސްތަކުން ރިޕޯޓު ކުރާ ގޮތުގައި ދައުރުވަމުންދާ ވީޑިއޯ އާއްމު ކުރި ކަމަށް ތުހުމަތު ކުރެވޭ ފަޔާޒް ނަމަކަށް ކިޔާ މީހަކު ފުލުހުން ވަނީ ހައްޔަރުކޮށްފަ އެވެ.
ބަންގްލަދޭޝްއާ އަވައްޓެރި ހިންދޫ މެޖޯރިޓީ އޮންނަ އިންޑިއާ އިން ވަނީ ބަންގްލަދޭޝްގައި ހިނގަމުންދާ ހަމަނުޖެހުންތަކާ ގުޅޭ ގޮތުން ކަންބޮޑުވުން ފާޅުކޮށްފަ އެވެ.
ބަންގްލަދޭޝްގެ 169 މިލިއަން މީހުންގެ ތެރެއިން 10 ޕަސެންޓަކީ ހިންދޫންނެވެ. ސޯޝަލް މީޑިއާގައި ފެތުރޭ ވާހަކަތަކާ ހެދި މީގެ ކުރިން ވެސް އެ މީހުންނަށް ހަމަލާތައް އަމާޒުވެ އެވެ.
