މާލޭގެ މޭޔަރުކަމަށް ޑރ. މުހައްމަދު މުއިއްޒު ވަޑައިގަތުމަށްފަހު، ލާމަރުކަޒީ ގާނޫނުން ލިބުނު ބާރުވެރިކަން އެންމެ ފުރިހަމަ ގޮތުގައި ތަޖުރިބާ ކުރައްވަން ބޭނުންވި އެވެ. ސަރުކާރުން އޭރު ހުރީ ވަކި ގޮތަކަށް ސިޔާސަތު ތަކެއް ރާވާފަ އެވެ. ތަންފީޒު ކުރުމުގެ މަސައްކަތްތައް އޮތީ ފެށިފަ އެވެ. ލާމަރުކަޒީ ގާނޫނުން މާލޭ ސިޓީ ކައުންސިލްއަށް ލިބޭ ބާރުތަކާއެކު، ކައުންސިލްގެ ވިސްނުމަށް މަސައްކަތް ކުރަން ފެށުމުން ނުކުންނަން ފެށީ ވަރަށް ގިނަ މައްސަލަތަކެވެ. ސަރުކާރާއި މާލެ ސިޓީ ކައުންސިލްގެ ފިކުރު ތަފާތުވެ، ގިނަ ކަންކަމުގައި ވިސްނުން ދިމާ އިދިކޮޅު ކަމުންނެވެ. ނަތީޖާއަކަށްވީ މާލެ ސިޓީގެ އިހްތިސޯސް ހިނގާ ތަނަކަށް ސަރުކާރުން ބަސްކިޔާނަމަ މޭޔަރު ހިތްނުތަނަވަސްވެ، ކޯޓަށް ދާނެ ކަމުގެ އިންޒާރު ދެއްވަން ފެއްޓެވުމެވެ.
ގުޅީފަޅުގައި ވިޔަފާރީ ބަނދަރެއް ތަރައްގީކުރަން ސަރުކާރުން ނިންމާފައި ވަނިކޮށް، އެއީ މާލެ ރައްޔިތުންގެ މަސްލަހަތު އެކުލެވޭ ކަމެއް ކަމަށް ބުނެ އެ މަޝްރޫއު ބަދަލުކުރަން މުއިއްޒު ބޭނުންވި އެވެ. ބޯހިޔާވަހިކަމުގެ މަންޒިލަކަށް އެތަން ހެދުމަށް ވަކާލާތުކޮށް، އެ މަޝްރޫއު ހުއްޓުވަން ސަރުކާރު ގޮވައިގެން ކޯޓަށް ދާނެ ކަމަށް ވެސް އިންޒާރު ދެއްވި އެވެ.
ސްޓެލްކޯ އާއި އެމްޑަބްލިއުއެސްސީން ބަންދުކޮށް، އެ ދެ ކުންފުނީގެ އިމާރާތުގެ ގޯތީގެ ތެރެއަށް ވައްދާފައިވާ މަގުތަކެއް ހުޅުވާލަން އެއްމަހުގެ މުހުލަތެއް ދިނުމަށްފަހު، ނުހުޅުވައިފި ނަމަ ކޯޓަށް ގޮސްގެންވެސް، އެ މަގުތައް ހުޅުވާނެ ކަމަށް ވިދާޅުވެ އިންޒާރު ދެއްވި އެވެ.
މީގެ އިތުރުން އެޗްޑީސީގެ ދަށުން ހުޅުމާލޭގައި ދެމުން އަންނަ މުނިސިޕަލް ސާވިސް ސިޓީ ކައުންސިލަށް ބަދަލުކުރަން ކުރަމުން އަންނަ މަސައްކަތަށް ކުރިއެރުމެއް ނުލިބޭނަމަ، އެ މައްސަލަވެސް ކޯޓަށް ހުށަހަޅުއްވާނެ ކަމަށް ވިދާޅުވި އެވެ.
އެހެންނަމަވެސް މީގެ ތެރެއިން އެއްވެސް މައްސަލައެއް މިހާތަނަށް ކޯޓަށް ހުށަހަޅާފައި ނުވާއިރު، މިހާރު މޭޔަރުގެ ރާގު މިވަނީ ބަދަލުވެފަ އެވެ. "އަދަދު" އަށް ދެއްވި އިންޓަވިއުއެއްގައި މުއިއްޒު ވިދާޅުވީ ކޯޓަށް ގެންގޮސްގެން ދެބަސްވުންތަކަށް ހައްލުކުރުމުގެ ބަދަލުގައި މަޝްވަރާގެ މޭޒުން އެކަންކަމަށް ހައްލު ގެނައުމަށް މިހާރު މަސައްކަތް ކުރައްވަމުން ގެންދާ ކަމަށެވެ. އަދި ކޯޓަށް ނުގޮސް އެފަދަ މައްސަލަތައް ހައްލު ކުރެވޭނެ ކަމަށް ގަބޫލުކުރައްވާ ކަމަށްވެސް މޭޔަރު ވިދާޅުވި އެވެ.
ބޯހިޔާވަހިކަމުގެ މަޝްރޫއުއަކާއި އެކު ގުޅީފަޅުގައި ޕޯޓް އަޅަން އެއްބަސްވުން
ސަރުކާރުގެ ޕްލޭނާ އެއްގޮތަށް ގުޅީފަޅުގައި ވިޔަފާރި ބަނދަރެއް ތަރައްގީ ކުރުމަށްފަހު ދެން އޮތް ސަރަހައްދު ބޯހިޔާވަހިކަމަށް ހާއްސަކުރާ ގޮތަށް އެ މަޝްރޫއުގެ ޕްލޭން ބަދަލުކުރުމަށް އެދިފައިވާނެ ކަމަށް މުއިއްޒު ވިދާޅުވި އެވެ. އަދި އެކަމުގައި މަޝްވަރާ ކުރައްވަމުން ގެންދަވާ ކަމަށާއި، ރައީސް އޮފީހަށް އެކި ފަހަރު މަތިން ސިޓީ ފޮނުއްވާފައިވާނެ ކަން ފާހަގަކުރެއްވި އެވެ.
"ކޯޓަށް ދާން އަޅުގަނޑުމެން ފާސްކުރިން. އެކަމަކު ޕާސަނަލީ އަޅުގަނޑު ގަބޫލެއް ނުކުރަން މި މައްސަލާގައި ކޯޓަށް ދާން ޖެހޭނެ ކަމަށް. އަޅުގަނޑުމެން ބޭނުންވަނީ ސަރުކާރާ ނެގޯޝިއޭޓްކޮށްގެން (މަޝްވަރާކޮށްގެން) އެ މަޝްރޫގެ ޕްލޭނަށް އަޅުގަނޑުމެން ބޭނުންވާ ބަދަލުތައް ގެންނަން."
މުއިއްޒު ވިދާޅުވީ އެ ހިޔާލަށް ސަރުކާރުން އަދި އިޖާބައެއް ދީފައި ނުވިނަމަވެސް، އެ މަޝްރޫއުގެ ޕްލޭންއަށް ބަދަލުތަކެއް ގެންނާނެ ކަމުގެ އުންމީދު އެބައޮތް ކަމަށެވެ.
ގުޅިފަޅު ތަރައްގީކުރުމުގެ މާސްޓަ ޕްލޭން އާންމުކޮށްފައިވާއިރު، ޕޯޓަކާއި އިންޑަސްޓްރިއަލް ވިލެޖެއްގެ އިތުރުން ހިއްކާ ބިމުގެ 15 ޕަސެންޓް ބޯހިޔާވަހިކަމަށް ހާއްސަކުރަން ސަރުކާރުން އޮތީ ނިންމައިފަ އެވެ. އެހެންނަމަވެސް މުއިއްޒު ވަނީ އެ އިންސައްތަ އިތުރުކޮށް، ބޯހިޔާވަހިކަމަށް ބޮޑު ސަރަހައްދެއް ކަނޑައަޅައި ދިނުމަށް ގޮވާލައްވާފަ އެވެ.
މަގުތަކުގެ މައްސަލަވެސް ކޯޓަށް ނުގޮސް މަޝްވަރާކޮށްގެން ހައްލުވާނެ
ސްޓެލްކޯ އާއި އެމްޑަބްލިއުއެސްސީން ބަންދުކޮށް، އެ ދެ ކުންފުނީގެ އިމާރާތުގެ ގޯތީގެ ތެރެއަށް ވައްދާފައިވާ މަގުތަކެއް ހުޅުވާލަން ކޯޓަށް ދާނެ ކަމަށް ދެއްވި އިންޒާރުވެސް މުއިއްޒު ވަނީ އަނބުރާ ގެންދަވާފަ އެވެ. މޭޔަރު ވިދާޅުވީ މަޝްވަރާކޮށްގެން އެކަންވެސް ހައްލު ކުރެވޭނެ ކަމަށް ގަބޫލުކުރައްވާ ކަމަށެވެ. އަދި ސަރުކާރުގެ މުއަސަސާތަކާއި ގުޅިގެން އެކުގައި މަސައްކަތްކުރެއްވޭތޯ ބައްލަވަމުން ގެންދަވާކަމަށްވެސް މުއިއްޒު ވިދާޅުވި އެވެ.
އެހެން ދެންނެވިޔަސް އަޅުގަނޑުމެން ބޭނުންވަނީ ވީހާވެސް ބޮޑަށް ވާހަކަދެކެވިގެން އެކަމަށް ހައްލެއް ގެންނަން
ހުޅުވަން އަންގާފައިވާ މަގުތަކަކީ ސްޓެލްކޯގެ ހެޑް އޮފީހާއި ކުޑަކުދިންގެ ޕާކާ ދެމެދު އޮންނަ ކުޑަ ގޯޅި އާއި ހެޑް އޮފީހާއި ޕާކްގެ ފަހަތަށް އޮންނަ މަގެވެ. އަދި، ސްޓެލްކޯގެ ހެޑް އޮފީސް ފަހަތަށް އޮތް ކޮއްޓާ ޖެހިގެން އޮންނަ ދޮންއަދަރާދަ ހިނގުމުގެ ބައެކެވެ.
އެ މަގުތަކާއި ގޯޅިތައް އެކި ބޭނުންތަކަށް ދާއިމީކޮށް ބަންދުކޮށްފައިވާތީ އެކަން ހުއްޓާލަން ސިޓީ ކައުންސިލުން އެންގި ނަމަވެސް އެ ގޯޅިތައް ހުޅުވައި ނުދެވޭނެ ކަމަށް ސްޓެލްކޯއިން ބުނެ އެވެ. އެއީ އެ މަގުތައް ހުޅުވައިފިނަމަ މާލޭގައި ކަރަނޓު ދިނުމަށް ހުރަސްތަކެއް ކުރިމަތިވާނޭތީ ކަމަށް އެ ކުންފުނިން ފާހަގަކުރި އެވެ.
ސްޓެލްކޯ އާއި އެމްޑަބްލިއުއެސްސީގެ މަސައްކަތްތަކަށް ފަސޭހަ ކުރުމުގެ ގޮތުން ބަންދުކޮށްފައިވާ މަގުތައް ހުޅުވާލަން ކައުންސިލުން އަންގާފައިވާއިރު، ސްޓެލްކޯއިން އަންނަނީ އެ މަގުތައް ބަންދުކުރުމަށްފަހު އެ ސަރަހައްދުގައި މަސައްކަތްތައް ވެސް ކުރަމުންނެވެ.
