ސްރީނަގަރް، ކަޝްމީރު (އޮކްޓޯބަރު 11) - އިންޑިއާ އިން ކޮންޓްރޯލް ކުރާ ކަޝްމީރުގައި ހަތިޔާރު އެޅި ބަޔަކު ދިން ހަމަލާތަކުގައި އިންޑިއާ ސިފައިންގެ ފަސް މީހުން މަރުވެއްޖެ އެވެ.
ބަޑީގެ ހަމަލާތައް ދިނީ އިންޑިއާ އާއި ޕާކިސްތާނާ ދެމެދުގައި ކަޝްމީރު ފަޅިކޮށްލާ ލައިން އޮފް ކޮންޓްރޯލް (އެލްއޯސީ) ކައިރީގަ އެވެ. މިއީ އެލްއޯސީ ކައިރީގައި ހަމަލާ ބަދަލު ކުރުން ހުއްޓާލަން މިދިޔަ ފެބްރުއަރީ މަހު ޕާކިސްތާނާއި އިންޑިއާ އިން އެއްބަސްވި ފަހުން އެ ތަނުގައި ދިން އެންމެ ބޮޑު ހަމަލާ އެވެ.
ނަވާރަ ސަތޭކަ ސާޅީސް ހަތް ވަނަ އަހަރު އިންޑިއާ އާއި ޕާކިސްތާން މިނިވަންވުމާއެކު ދެ ގައުމުގެ މެދުގައި ކަޝްމީރު އޮންނަނީ ފަޅިކޮށްލާފަ އެވެ. ނަމަވެސް ދެ ގައުމުން ވެސް މުޅި އެ ސަރަހައްދަށް އެއްކޮށް ދައުވާ ކުރެ އެވެ.
އިންޑިއާ އިން ކޮންޓްރޯލް ކުރާ ކަޝްމީރުގައި ހަތިޔާރު ހިފައިގެން އުޅޭ ގްރޫޕުތަކުން ބޭނުން ވަނީ ޕާކިސްތާނުގެ ދަށަށް ކަޝްމީރު އެއްކޮށް ބަދަލު ކުރުމަށެވެ. އެކަން ހާސިލް ކުރުމަށް އިންޑިއާ ސިފައިންނަށް އެ މީހުން ހަމަލާދޭތާ 30 އަހަރަށް ވުރެ ގިނަ ދުވަސްވެއްޖެ އެވެ.
އެ ހަމަނުޖެހުމުގައި އެތައް ހާސް ބަޔަކު މިއަދާ ހަމައަށް މަރުވެފައި ވާއިރު، އިންޑިއާ އިން ތުހުމަތު ކުރަނީ ހަތިޔާރު ހިފައިގެން އުޅޭ ގްރޫޕުތަކަށް ޕާކިސްތާނުން އެހީވާ ކަމަށެވެ.
އިންޑިއާއާ ދެކޮޅު ގްރޫޕަކުން ދިން ހަމަލާތަކުގައި ދާދި ފަހުން އާއްމުންގެ ގިނަ ބަޔަކު މަރުވެފައި ވެ އެވެ. މިދިޔަ ހަފުތާގައު ހަ ދުވަސް ތެރޭ ހަތް މީހެއްގެ ގަޔަށް ބަޑި ޖަހައި މަރާލި އެވެ.
ހަމަލާތަކާ ގުޅިގެން ތުހުމަތު ކުރެވޭ 500 އެއްހާ މީހުން ހައްޔަރުކޮށްފައި ވާއިރު، މައި ސަރުކާރުން ފޮނުވި ޓެރަރިޒަމާ ދެކޮޅު އިސް ޖާސޫސީ އޮފިޝަލެއް މިހާރު އަންނަނީ ސްރީނަގަރްގައި ހަރަކާތްތެރިވަމުންނެވެ.
