ކޮލޮމްބޯ، ސްރީލަންކާ (އޮކްޓޯބަރު 11) - ބޭރު ފައިސާގެ ދަތިކަން ދިމާވެ ކާބޯތަކެއްޗާއި ބޭސް އަދި އެހެން ޒަރޫރީ ސާމާނު ލިބުން ދަތިވެފައިވާ ލަންކާގައި ތަކެތީގެ އަގު މަތިވިޔަ ނުދީ ހިފެހެއްޓުމަށް ސަރުކާރުން އެކަށީގެންވާ މަސައްކަތެއް ނުކުރާ ކަމަށް ރައީސް އެއްބަސްވެވަޑައިގެންފި އެވެ.
"އަޅުގަނޑާއި ސަރުކާރާ މެދު ރައްޔިތުން ހިތްހަމަނުޖެހިދާނެ. އެއީ ރައްޔިތުން ބޭނުންވާ ނަތީޖާ ނެރެދެވިފައި ނުވާތީ،" ރައީސް ގޮތަބަޔަ ރާޖަޕަކްސަ ވިދާޅުވި އެވެ.
"އެކަން އަޅުގަނޑު ބަލައިގަންނަން. އަޅުގަނޑު އެކަންޏެއް ނޫން، ހުރިހާ މިނިސްޓަރުންނާއި މަޖިލީހުގެ ހުރިހާ މެމްބަރުން ވެސް އެކަން ބަލައިގަންނަން ޖެހޭނެ،" ލަންކާ ސިފައިން އުފެދުނުތާ 72 އަހަރު ފުރުން ފާހަގަކުރުމުގެ ގޮތުން ދެއްކެވި ވާހަކައިގައި ގޮތަބަޔަ ވިދާޅުވި އެވެ.
ބޭރު ފައިސާގެ ދަތިކަމާ ހެދި 21 މިލިއަން މީހުން ދިރިއުޅޭ ލަންކާއަށް ތަކެތި އިމްޕޯޓް ކުރަން ވަނީ ހުރަސްތަކާ ދިމާވެފަ އެވެ. އެއާއެކު ސަރުކާރުން ކުއްލި ހާލަތު އިއުލާނުކޮށް، ބައެއް ތަކެތި ރޭޝަން ކުރި އެވެ.
މިދިޔަ ހުކުރު ދުވަހު ސަރުކާރުން ވަނީ ޒަރޫރީ ކާބޯތަކެތީގެ އަގު ކޮންޓްރޯލް ކުރަން އެޅި ފިޔަވަޅު އުވާލާފަ އެވެ. ކައްކަން ބޭނުން ކުރާ ގޭހުގެ އަގު ހޯމަ ދުވަހުން ފެށިގެން އަނެއްކާ ވަނީ 85 ޕަސެންޓު އުފުލިފަ އެވެ. ފުށާއި ސިމެންތީގެ އަގު ވެސް 10 ޕަސެންޓު އުފުލުނެވެ.
ދައުލަތުގެ ޕެޓްރޯލިއަމް ކޯޕޮރޭޝަން ކުންފުނިން ބުނީ މި އަހަރުގެ ފުރަތަމަ އަށް މަސް ދުވަހު ލިބިފައިވާ 350 މިލިއަން ޑޮލަރުގެ ގެއްލުމާ ހެދި ހުރިހާ ބާވަތެއްގެ ތެޔޮ ރީޓެއިލްކޮށް ވިއްކާ އަގު އިތުރަށް އުފުލަން ސަރުކާރުގައި އެދެން ނިންމާފައި ކަމަށެވެ.
އިގްތިސާދީ މާހިރުންނާއި ބައިނަލްއަގްވާމީ ރޭޓިން އޭޖެންސީތަކުން ބުނީ ލަންކާގެ އިގްތިސާދީ މައްސަލަ ފެންމަތިވީ ކޮވިޑް ބަލިމަޑުކަމުގެ ވެސް ކުރިންނެވެ.
ނޮވެމްބަރު 2019 ގައި ގޮތަބަޔަ ވެރިކަމާ ހަވާލުވެވަޑައިގެންނެވި އިރު ބޭރު ފައިސާގެ ރިޒާވްގެ ގޮތުގައި 7.5 ބިލިއަން ޑޮލަރު ހުއްޓެވެ. ނަމަވެސް މިދިޔަ ސެޕްޓެމްބަރު މަސް ނިމުނު އިރު، އެ އަދަދު ވަނީ 2.5 ބިލިއަނަށް ވެއްޓިފަ އެވެ. އެއާއެކު ލަންކާގެ ބޭރުގެ ދަރަނި ނުދެއްކިދާނެ ކަމުގެ ބިރު އެބަ އޮތެވެ.
ވެރިކަމަށް ވަޑައިގެންނެވިތާ ކުޑަ ދުވަސްކޮޅެއްގެ ތެރޭގައި ގޮތަބަޔަ ވަނީ އިންވެސްޓްމަންޓް އިތުރުކޮށް އިގްތިސާދު ވަރުގަދަވާނެ ކަމުގެ އުއްމީދުގައި ސޭލްސް ޓެކްސް 50 ޕަސެންޓު ކުޑަކޮށް، އާމްދަނީން ނަގާ ޓެކްސާއި ކުންފުނިތަކުގެ ފައިދާ އިން ނަގާ ޓެކްސް ވެސް ކުޑަކޮށްފަ އެވެ.
ނަމަވެސް ސަރުކާރުން އުއްމީދު ކުރި ގޮތާ ހިލާފަށް މިދިޔަ އަހަރު ލަންކާގެ އިގްތިސާދުގެ މަސައްކަތް ވަރަށް ގޯހެވެ. އަދި 3.6 ޕަސެންޓުން އިގްތިސާދު ކުޑަވި އެވެ. އެންމެ ބޮޑަށް ނޭދެވޭ އަސަރު ކުރީ ބަލިމަޑުކަމާ ހެދި ފަތުރުވެރިކަން ހުއްޓުމުންނެވެ.
ބޭރު ފައިސާގެ ދަތިކަމާ ހެދި މޭ 2020 ވަނަ އަހަރުން ފެށިގެން ޒަރޫރީ ނޫން މުދާ އެތެރެ ކުރުން މަނާކުރި އެވެ.
