އުރީދޫ ސާފް ޗެމްޕިއަންޝިޕްގައި އިއްޔެ ކުޅުނު މެޗުގައި ސްރީ ލަންކާއާ ދެކޮޅަށް ބަދަލުކުރަން ޖެހުނު ގައުމީ ޓީމުގެ އެއް ވަނަ ގޯލްކީޕަރު މުހައްމަދު ފައިސަލް އަށް ކުރިއަށް އޮތް އިންޑިއާ މެޗުގައި ކުޅެވުމުގެ ފުރުސަތު އެބައޮތް ކަމަށް ބުނެފި އެވެ.
ފައިސަލް، 33، ފަލަމަސްގަނޑަށް އަނިޔާވީ އިއްޔެގެ މެޗުގެ ފުރަތަމަ ހާފުގެ 26 ވަނަ މިނިޓްގަ އެވެ. ފައިސަލްގެ ބަދަލުގައި ކުޅެން އަރައި ކީޕަރު މުހައްމަދު ޝަފީއު (ޗެކް) ވަނީ ރަނގަޅު ކުޅުމެއް ދައްކައިފަ އެވެ. މިއީ ޝަފީއު ގައުމީ ޖޯޒީގައި ކުޅުނު ފުރަތަމަ މެޗެވެ.
ގައުމީ ޓީމުގެ ޑޮކްޓަރު އަބްދުﷲ ރާފިއު (ރާއްޕެ)، މިއަދު "އަދަދު" އަށް ބުނީ ފައިސަލްގެ ފަލަމަސްގަނޑަށް ލިބިފައިވާ އަނިޔާއިން ރިކަވާވެ، ބުދަ ދުވަހުގެރޭ އިންޑިއާއާ ދެކޮޅަށް ކުޅެވުމުގެ ފުރުސަތު އެބައޮތް ކަމަށެވެ.
"ފައިސަލް އަށް ލިބުނީ މަސްލް އިންޖަރީއެއް. ސީރިއަސްއެއް ނޫން. ރިކަވާވެގެން އިންޑިއާ މެޗުގައި ކުޅެވޭނެ ކަމަށް މި ބަލަނީ،" ރާއްޕެ ބުންޏެވެ.
ފައިސަލް މިއަދު އޭނާގެ ސޯޝަލް މީޑިއާ މެދުވެރިކޮށް ދިން މެސެޖްގައި ބުނެފައިވަނީ އެންމެންގެ ހެޔޮ ދުއާ އަށް ޝުކުރު އަދާކުރާ ކަމަށާއި އަނިޔާގެ ކަންކަން ދެނެގަންނަން ހެދި ޓެސްޓުތަކުގެ ނަތީޖާ ރަނގަޅު ކަމަށެވެ. އަދި ފައިސަލް ވަނީ އިއްޔެ ގައުމީ ޖޯޒީގައި އަލަށް ކުޅުނު ޝަފީއު އާއި ޒުވާން ތަރި ހަސަން ރާއިފް އަހުމަދު (ހަންނަ) އަށް މަރުހަބާ ކިޔައިފަ އެވެ.
މިދިޔަ ސީޒަނުގެ ފަހުކޮޅުގައި ފައިސަލް އަށް އަނިޔާވެގެން އޭނާ އަށް ޖޫން މަހު ގައުމީ ޓީމުގެ ވޯލްޑް ކަޕް ކޮލިފައިންގެ މެޗުތަކުގައި ވެސް ކުޅެވުނީ ވަރަށް މަސައްކަތް ކޮށް ރަނގަޅަށް ފިޓްވެގެންނެވެ.
ފައިސަލް އަކީ ފަހަަކަށް އައިސް ގައުމީ ޓީމުގެ އެއް ނަމްބަރު ކީޕަރުގެ ގޮތުގައި ތަފާތު ދައްކަމުން އަންނަ އިތުބާރު ހޯދާފައިވާ ކީޕަރެކެެވެ.
ރާއްޖޭން 2018 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރިއިރު، މުބާރާތުގެ މޮޅު ކުުޅުންތެރިއަކަށް ހޮވުނީ ފައިސަލް އެވެ. އޭނާ ވަނީ މި ފަހަރުގެ މުބާރާތުގައި ފުރަތަމަ ދެ މެޗުގައި ރާއްޖެ ގޯލު ބެލެހެއްޓުމުގައި ރަނގަޅު ކުޅުމެއް ދައްކައިފަ އެވެ.
ލީގު ބުރުގެ އެއް ވަނައިގައި އޮތް ނޭޕާލް އާއި ދެ ވަަނައިގައި އޮތް ރާއްޖެ އަށް ވަނީ ތިން މެޗުން ހަ ޕޮއިންޓް ލިބިފަ އެވެ. ނޭޕާލް ކުރީގައި އޮތީ ހެޑް ޓު ހެޑް ގަވާއިދުންނެވެ. ތިން ވަނައިގައި އޮތީ ތިން މެޗުން ފަސް ޕޮއިންޓާ އެކު އިންޑިއާ އެވެ. ހަތަރެއްގައި އޮތީ ތިން މެޗުން ހަތަރު ޕޮޮއިންޓް ހޯދައިގެން ބަންގްލަދޭޝް އެވެ. އެންމެ ފުލުގައި އޮތް ލަންކާ މުބާރާތް ނިންމާލީ ހަތަރު މެޗުން ޕޮއިންޓަކާ އެކު އެވެ.
ބުދަ ދުވަހުގެރޭ އިންޑިއާއާ އެއްވަރުކޮށްލައިގެން ވެސް ރާއްޖެ އަށް ފައިނަލަށް ދެވިދާނެ އެވެ.
