ކާބުލް، އަފްގާނިސްތާން (އޮކްޓޯބަރު 11) - އިސްލާމިކް ސްޓޭޓް (އައިއެސް) ޓެރަރިސްޓު ގްރޫޕުން އަފްގާނިސްތާނުގެ މިސްކިތަކަށް ހަމަލާދީފައި ވަނިކޮށް، ހޮޓާތަކަށް އަމާޒުކޮށް ހަމަލާއެއް ދިނުމުގެ ނުރައްކާ އެބަ އޮތް ކަމަށް އެމެރިކާ އާއި އިނގިރޭސިވިލާތުން ބުނެފި އެވެ.
މިދިޔަ އޯގަސްޓު މަހު ވެރިކަމަށް އައި ތާލިބާނުންނަށް މި ވަގުތު ދިމާވެފައި އޮތް އެންމެ ބޮޑު އެއް ގޮންޖެހުމަކީ ވާދަވެރި އައިއެސްގެ ހަރަކާތްތަކެވެ. އިގްތިސާދީ އަދި އިންސާނީ ކާރިސާއެއް ދިމާވެފައި ވަނިކޮށް އައިއެސް ކޮންޓްރޯލް ކުރަން ވެސް ފިޔަވަޅު އަޅަން ވަނީ ޖެހިފަ އެވެ.
"ސެރީނާ ހޮޓަލްގައި ތިބި އަދި ކައިރި ސަރަހައްދުގައި ތިބި އެމެރިކާ ރައްޔިތުން އަވަހަށް ދުރަށް ދިޔުމަށް އަންގަން،" އެމެރިކާގެ ސްޓޭޓް ޑިޕާޓްމަންޓުން ނެރުނު އެލާޓެއްގައި ބުންޏެވެ.
"ހަމަލާއެއްގެ ނުރައްކާ ބޮޑުވެފައިވާ ކަމަށް ބެލެވޭތީ ހޮޓަލްތަކުގައި ނުތިބުމަށް އަންގަން. ވަކިން ހާއްސަކޮށް ކާބުލްގެ ސެރީނާ ހޮޓެލް ފަދަ ތަންތަން ފާހަގަކުރެވޭ،" އިނގިރޭސިވިލާތުގެ ފޮރިން، ކޮމަންވެލްތު އެންޑް ޑިވެލޮޕްމަންޓު އޮފީހުން ބުންޏެވެ.
ތާލިބާނުން ވެރިކަމަށް އައުމާއެކު ގިނަ އަދަދެއްގެ ބޭރު ރައްޔިތުން އަފްގާނިސްތާން ދޫކޮށް ދިޔަ ނަމަވެސް، އެހީދޭ ޖަމާއަތްތަކުގެ މީހުންނާއި ނޫސްވެރިން ވެރިރަށް ކާބުލްގައި އަދިވެސް މަސައްކަތް ކުރަމުން ދެ އެވެ.
ވިޔަފާރިވެރިންނާއި ބޭރު ގައުމުތަކުގެ ރައްޔިތުންގެ މެދުގައި މަގްބޫލު ލަގްޒަރީ ސެރީނާ ހޮޓަލަށް މީގެ ކުރިން ދެ ފަހަރެއްގެ މަތިން ތާލިބާނުން ހަމަލާދީފައި ވެ އެވެ.
އެގޮތުން, 2014 ވަނަ އަހަރުގެ ރިޔާސީ އިންތިހާބުގެ ކުރިން ބަޑި ހިފައިގެން ތިބި ހަތަރު ކުއްޖަކު ސެކިއުރިޓީ ފޫއަޅުވާލައި ހޮޓަލުގެ ތެރެއަށް ވަދެ، ނުވަ މީހުން މަރާލި އެވެ. އޭގެ ތެރޭގައި އޭއެފްޕީގެ ނޫސްވެރިއަކާއި އޭނާގެ އާއިލާ މެމްބަރުން ހިމެނެ އެވެ.
އޭގެ ކުރިން 2008 ގައި އެ ހޮޓަލުގައި އަމިއްލަ އަށް މަރުވެގެން ދިން ބޮމުގެ ހަމަލާއެއްގައި ހަ މީހަކު މަރުވި އެވެ.
