ރިއޯ ޑި ޖަނެއިރޯ (އޮކްޓޫބަރު 11) - ގަތަރު ވޯލްޑް ކަޕް ކޮލިފައިންގައި ރޭ ދެކުނު އެމެރިކާގެ ޒޯންގައި ބްރެޒިލް ކުޅުނު މެޗުން 0-0 އިން ކޮލަމްބިއާއާ ލަނޑެއް ނުޖެހި އެއްވަރުވިއިރު، އާޖެންޓީނާ އިން 3-0 އިން އުރުގުއޭ ބަލިކޮށް މުހިއްމު މޮޅެއް ހޯދައިފި އެވެ.
ދެކުނު އެމެރިކާގެ ކޮލިފައިން ތާވަލަށް ބަލާއިރު، ކޮލިފައިންގައި ބްރެޒިލްގެ ސައްތަ އިން ސައްތަ ރެކޯޑަށް ނިމުން އައިސް އެ ޓީމު އެއް ވަނައިގައި އޮތީ 10 މެޗުން 28 ޕޮއިންޓާ އެކު އެވެ. ދެ ވަނައިގައި އާޖެންޓީނާ އޮތީ ނުވަ މެޗުން 19 ޕޮއިންޓް ހޯދައިގެންނެވެ. ވެެނެޒުއޭލާ އަތުން ރޭ ބަލިވި ކަމުގައި ވިޔަސް ތިން ވަނައިގައި އޮތީ އެކުއެޑޯ އެވެ. އެކުއެޑޯ އަށް ވަނީ 11 މެޗުން 16 ޕޮއިންޓް ލިބިފަ އެވެ. އުރުގުއޭ ހަތަރެއްގައި އޮތީ 10 މެޗުން 16 ޕޮއިންޓް ހަމަކޮށްގެންނެވެ.
ބްރެޒިލަށް ގޯލެއް ޖަހައިދޭން އެންމެ ހުސް ފުރުސަތުތައް ލިބުނީ އިނގިރޭސި ޕްރިމިއާ ލީގުގައި ކުޅޭ ފްރެޑް އާއި ރަފީނިއާ އަށެވެ. ކޮލަމްބިއާގެ ގޯލުގައި ހުރި ޑޭވިޑް އޮސްޕީނާ ހުރި ގޯލަށް ބްރެޒިލަށް ގޯލެއް ވައްދާލެވޭ ގޮތެއް ނުވި އެވެ. އަނެއް ކޮޅުން ބްރެޒިލްގެ ތަރި ނޭމާ ހުއްޓުވަން ކޮލަމްބިއާގެ ޑިފެންޑަރުން ވެސް ވަނީ މޮޅު ކުޅުމެއް ދައްކައިފަ އެވެ.
ކޮލަމްބިއާގެ ރަފައެލް ބޯރޭ އޭރިއާ ބޭރުން ބްރެޒިލް ގޯލަށް ނުރައްކާކުރަން މަސައްކަތް ކުރި ނަމަވެސް ކީޕަރު އެލިސަން ބެކާ ވަނީ އެ ބޯޅަ ހުއްޓުވައިފަ އެވެ.
އާޖެންޓީނާ އިން ރޭ އަމިއްލަ ދަނޑުގައި އުރުގުއޭއާ ދެކޮޅަށް ވަނީ މެޗު ޑޮމިނޭޓްކޮށްފަ އެވެ. އެ މެޗުގެ 38 ވަނަ މިނިޓްގައި ޖިއޮވާނީ ލޮ ސެލްސޯ ދިން ބޯޅަ އަކުން އާޖެންޓީނާ އަށް ގޯލު ހުޅުވައިދިނީ ލިއޮނަލް މެސީ އެވެ. ފުރަތަމަ ހާފު ނިމުމުގެ ކުރިން ރޮޑްރީގޯ ޑެ ޕޯލް އާޖެންޓީނާގެ ތިން ވަަނަ ގޯލު ޖަހައިދިނެވެ. އެންމެ ފަހުން ބޭއްވި ކޮޕަ އެމެރިކާގެ ޗެމްޕިއަންކަން ހޯދި އާޖެންޓީނާގެ ތިން ވަނަ ގޯލު ޖެހީ ލޮ ސެލްސޯ ދިން ބޯޅައަކުން ލަޓާރޯ މާޓީނޭޒް އެވެ.
