ނިއު ދިއްލީ، އިންޑިއާ (އޮކްޓޯބަރު 10) - ދަނޑުވެރިންގެ މުޒާހަރާއެއްގައި އަށް މީހުން މަރުވި މައްސަލާގައި އިންޑިއާ ރައްޔިތުން ނުރުހުން ފާޅުކުރިތާ ހަފުތާއެއް ފަހުން، އެ މައްސަލާގައި މިނިސްޓަރުގެ ދަރިފުޅު ހައްޔަރުކޮށްފި އެވެ.
ފުލުހުން ބުނީ ޖޫނިއާ ހޯމް އެފެއާޒް މިނިސްޓަރު އަޖޭ މިޝްރާގެ ދަރިފުޅު އަޝިޝް މިޝްރާ ހައްޔަރު ކުރީ އުއްތަރް ޕްރަދޭޝް ސްޓޭޓުން ހޮނިހިރު ދުވަހުގެ ރޭ ކަމަށެވެ. އޭނާގެ މައްޗަށް މަރުގެ ތުހުމަތު ކުރެވެނީ ދަނޑުވެރިކަމުގެ ގާނޫނާ ދެކޮޅަށް އެ ސްޓޭޓުގެ ލަހިމްޕޫރް ހޭރީ ޑިސްޓްރިކްޓުގައި ބޭއްވި އެއްވުމަކުން ބަޔަކު މަރުވުމުންނެވެ.
މިޝްރާ އާއި އޭނާގެ ބައްޕަ އަޖޭ މިޝްރާގެ ބެލުމުގެ ދަށުގައިވާ ކާރުތަކެއް، ދަނޑުވެރިންގެ ގައިގައި ޖައްސައި ހަތަރު މީހަކު މަރާލި ކަމަށް ދަނޑުވެރިން ބުނެފައިވެ އެވެ.
އެ މައްސަލާގައި މުޒާހަރާގެ ބައިވެރިން ރުޅިގަދަވެ، ކާރުތަކެއްގައި ހުޅު ޖެހުމުން އިތުރު ހަތަރު މީހުން މަރުވި އެވެ. އޭގެ ތެރޭގައި ޑްރައިވަރަކާއި ނޫސްވެރިއަކު ވެސް ހިމެނެ އެވެ.
ޑެޕިއުޓީ އިންސްޕެކްޓާ ޖެނެރަލް ކުމާރް އަގްރަވާލް ވިދާޅުވީ އަޝިޝް މިޝްރާ ހައްޔަރު ކުރީ ސުވާލު ކުރުމަށް ހޭދަކުރި ދިގު މުއްދަތުގައި އެއްބާރުލުން ދީފައި ނުވާތީ އާއި ނުގުޅޭ ޖަވާބުދެމުން ދާތީ ކަމަށެވެ.
ހޯމަ ދުވަހު އޭނާ ކޯޓަށް ހާޒިރު ކުރުމަށް ފަހު 90 ދުވަހުގެ ތެރޭގައި ދައުވާ އުފުލަން ޖެހޭނެ އެވެ. މިޝްރާ އާއި އޭނާގެ ބައްޕަ ވެސް ވަނީ ތުހުމަތުތައް ދޮގުކޮށްފަ އެވެ.
މިދިޔަ ހުކުރު ދުވަހު އިންޑިއާގެ ސުޕްރީމް ކޯޓުން ބުނީ މި މައްސަލާގައި ފުލުހުންގެ ތަހުގީގާ މެދު ހިތްހަމަނުޖެހޭ ކަމަށާއި މިޝްރާ ހައްޔަރުކޮށްފައި ނުވާ ސަބަބާ މެދު ސުވާލު އުފެދޭ ކަމަށެވެ.
ދަނޑުވެރިކަމުގެ ސިނާއަތުން އެކަށީގެންވާ ފައިދާއެއް ނުލިބޭ ކަމަށާއި އެ ސިނާއަތް އޮތީ އިސްލާހު ކުރަން ޖެހިފައި ކަމަށް ސަރުކާރުން ބުނެ އެވެ.
އެ ވާހަކަތަކުގެ ތެރެއިން ހެދި ދަނޑުވެރިކަމާ ގުޅޭ ގާނޫނުތަކުގެ ސަބަބުން ދަނޑުވެރިންނަށް ގެއްލުން ވާނެ ކަމަށާއި ދަނޑުވެރިން ކޮންޓްރޯލް ކުރާނީ ބޮޑެތި ކުންފުނިތަކުން ކަމަށް ބުނެ މިދިޔަ އަހަރުގެ ނޮވެމްބަރު މަހުން ފެށިގެން ދަނީ މުޒާހަރާ ކުރަމުންނެވެ.
