މީގެ އަހަރުތަކެއް ކުރިން މެދުއިރުމަތީގައި ފެތުރުނު "އަރަބް ސްޕްރިންގް" އިންގިލާބުގައި ޑިމޮކްރަސީއަކަށް ބަދަލުވި ހަމައެކަނި ގައުމު، ޓިއުނީޝިއާގެ ރައީސްއާ ދެކޮޅަށް 6،000 އަށް ވުރެ ގިނަ މީހުން މުޒާހަރާކޮށްފި އެވެ.
ޗެކްޕޮއިންޓުތަކާއި ސެކުއިރިޓީ ސްކްރީނިން ވަރުގަދަ ކުރި ނަމަވެސް، މިއީ ފަހުގެ ތާރީހެއްގައި ޓިއުނީޝިއާގައި ބޭއްވި އެންމެ ބޮޑު އެއްވުމެވެ. ރައީސް ކައިސް ސައީދަށް ތާއީދު ކުރާ މީހުންނާއި ދެކޮޅު މީހުން ވެސް ކޮންމެ އާދީއްތަ ދުވަހަކު އެއްވާތާ ދުވަސްތަކެއް ވެއްޖެ އެވެ.
އުމުރުން 63 އަހަރުގެ ރައީސް ސައީދަކީ 2019 ވަނަ އަހަރުގެ ރިޔާސީ އިންތިހާބުގައި ބޮޑު އަގުލަބިއްޔަތަކުން ވެރިކަމަށް ވަޑައިގެންނެވި ސިޔާސީ ދާއިރާއަށް މުޅިން އާ ބޭފުޅެކެވެ. އޭގެ ކުރިން ސައީދަކީ ގާނޫނު ކިޔަވައިދެއްވި ލެކްޗަރާ އެކެވެ.
ރައީސަށް ލިބިގެންވާ ބާރުގެ ބޭނުންކޮށް ބޮޑު ވަޒީރު މަގާމުން ދުރުކޮށް، ޕާލިމެންޓު ސަސްޕެންޑު ކުރީ ޖުލައި 25 ވަނަ ދުވަހު އެވެ. ރައީސްގެ އަމަލުތަކަކީ "ބަގާވާތެއް" ކަމަށް ސިފަކޮށް އިދިކޮޅު ފަރާތްތަކުން އަންނަނީ ފާޑުކިޔަމުންނެވެ.
އެގޮތަށް އަމަލު ކުރެއްވީ ޕާލިމެންޓު ތެރޭގައި އޮތް ސިޔާސީ ޒުވާބުތަކާ ހެދި ވެރިކަން ހިންގުމަށް ދަތިވެފައި ވަނިކޮށެވެ. އޭގެ ފަހުން ކޮރަޕްޝަނާ ދެކޮޅަށް ފެށި ބޮޑު ކެމްޕެއިނެއްގެ ދަށުން ގިނަ ސިޔާސީ ފަރާތްތަކާއި ވިޔަފާރިވެރިންނާއި ޖުޑިޝަރީއާ ގުޅޭ މީހުން ހައްޔަރުކޮށް، ގޭބަންދުކޮށް، ގައުމުން ފުރުން ވަނީ މަނާކޮށްފަ އެވެ.
އާ ސަރުކާރެއް އެކުލަވާލުމަށް ސިޔާސީ ޕާޓީތަކުން ސައީދަށް ޕްރެޝަރު ކުރަމުން ދިޔަ ނަމަވެސް، އެކަން ކުރާނެ ގޮތުގެ މަގުޗާޓެއް އަދިވެސް އިއުލާނެއް ނުކުރައްވަ އެވެ.
މީގެ ދެ ހަފުތާ ކުރިން ރައީސްއާ ދެކޮޅަށް އެއްވީ 2،000 މީހުންނެވެ. ނަމަވެސް ފުލުހުން ބުނީ އިއްޔެގެ އެއްވުމަށް 6،000 މީހުން ޖަމާވި ކަމަށެވެ. ރައީސް އަށް ތާއީދުކޮށް މިހާތަނަށް ބޭއްވި އެންމެ ބޮޑު އެއްވުމުގައި ބައިވެރިވީ 3،000 މީހުންނެވެ.
މެދުއިރުމައްޗާއި އުތުރު އެފްރިކާގެ ގައުމުތަކުގައި 2010 ވަނަ އަހަރު ހިނގި "އަރަބް ސްޕްރިންގް" އިންގިލާބުތަކަށް ފަހު ކާމިޔާބުކަމާއެކު ޑިމޮކްރެސީ ހިނގަމުންދާ ހަމައެކަނި ގައުމަކީ ޓިއުނީޝިއާގެ ގޮތުގައި މީގެ ކުރިން އޮތީ ބެލެވިފަ އެވެ.
ނަމަވެސް ޑިމޮކްރަސީ ގެނެވުނާ 10 އަހަރު ފަހުން، އެ ގައުމުގެ 12 މިލިއަން މީހުން ދެކޭ ގޮތުގައި މާ ބޮޑު ތަފާތެއް ފެނިފައެއް ނުވެ އެވެ. އެގޮތުން ދިރިއުޅުމުގެ ފެންވަރަށް ކުރިއެރުމެއް އައިސްފައި ނުވާ ކަމަށާއި ސިޔާސީ ތަޅާފޮޅުމުގެ ސަބަބުން ހިތްހަމަނުޖެހޭ ކަމަށް ރައްޔިތުން ބުނެ އެވެ.
އޭގެ އިތުރުން އެންމެ ފަހުން އުވާލި ސަރުކާރުން ވަނީ ގިނަ ކަންކަމުގައި ފެއިލްވެފައި ކަމަށާއި އޭގެ ތެރޭގައި ކޮވިޑް ކޮންޓްރޯލް ކުރުމުން ހިމެނޭ ކަމަށް ރައްޔިތުން ދެކެ އެވެ. އާބާދީގެ ނިސްބަތުން ބަލާއިރު، ދުނިޔޭގައި ކޮވިޑް ޖެހިގެން އެންމެ ގިނަ މީހުން މަރުވެފައިވާ އެއް ގައުމަކީ ޓިއުނީޝިއާ އެވެ.
މީގެ 10 އަހަރު ކުރިން ހިންގި އިންގިލާބަށް ފަހު ބަރުލަމާނީ ނިޒާމުގެ ވެރިކަމެއް އޮންނަ ޓިއުނީޝިއާގައި ނުވަ ސަރުކާރު މަސައްކަތް ކޮށްފައި ވެ އެވެ. ސިޔާސީ ކޯޅުމާ ހެދި ބައެއް ސަރުކާރުތައް އުވުނީ އެންމެ ދެ ތިން މަސް ތެރޭގަ އެވެ.
ނަމަވެސް ޕާލިމެންޓުގައި ހިމެނޭ އެންމެ ބޮޑު ކޯލިޝަންގެ މައި ޕާޓީ، އިނަހްދާއިން ބުނީ ގާނޫނު އަސާސީ އަށް ބަދަލު ގެނައުން ބަލައިނުގަންނާނެ ކަމަށާއި ރައްޔިތުންގެ ފެންނަ ނުފެންނަ ވޯޓަކަށް ގޮސްގެން ވެސް ވެރިކަން ކުރުމުގެ ނިޒާމު ބަދަލު ކުރުން ބަލައިނުގަންނާނެ ކަމަށެވެ.
