ޖިންސީ ފުރައްސާރައިގެ ދައުވާތަކެއް ކޮށްފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ހިފެހެއްޓުމަށް އަމުރެއް ނެރެވެން ނެތް ކަމަށް ހައިކޯޓުން ނިންމި ނިންމުން ސުޕްރީމް ކޯޓުގައި އިސްތިއުނާފު ނުކުރަން ނިންމައިފި އެވެ.
ޕަބްލިކް ޕްރޮސިކިއުޓާ އަހުމަދު ޝަފީއު މިއަދު ވިދާޅުވި ގޮތުގައި, އަލީ ވަހީދުގެ ޕާސްޕޯޓް މައްސަލާގައި ސުޕްރީމް ކޯޓަށް ނުދާން ނިންމާފައިވީ ނަމަވެސް, ގާނޫނީ އެހެން ފަރުވާތައް ހޯދުމަށް އެ އޮފީހުން މަސައްކަތް ކުރާނެ އެވެ.
އަލީ ވަހީދުގެ ޕާސްޕޯޓާ ގުޅޭ ގޮތުން މިފަހުން ހައިކޯޓުން ނިންމި ނިންމުމަކީ އެކަމާ ގުޅޭ އެ ކޯޓުގެ ތިންވަނަ ނިންމުމެވެ. ހައިކޯޓުން މިފަހަރު ނިންމި ގޮތުގައި ފުރައިގެން ގޮސްފައިވާ މީހެއްގެ ޕާސްޕޯޓް ހިފަހައްޓާނެ ބާރެއް ފަނޑިޔާރުންނަށް ގާނޫނުން ލިބިދީފައެއް ނެތެވެ.
އަލީ ވަހީދުގެ ޕާސްޕޯޓްގެ ފަސްފަހަތް
އަލީ ވަހީދުގެ މައްސަލާގައި އެންމެ ފުރަތަމަ ވެސް ކްރިމިނަލް ކޯޓުގެ އަމުރެއްގެ ދަށުން އަލީ ވަހީދުގެ ޕާސްޕޯޓް ހިފެހެއްޓި އެވެ. ނަމަވެސް، އަލީ ވަހީދު ބޭސްފަރުވާއަށް ރާއްޖޭން ބޭރަށް ދިޔުމުގެ ހުއްދަދީ، ކުރިމިނަލް ކޯޓުން އެ އަމުރު ފަހުން ބާތިލުކުރި އެވެ.
އޭގެފަހުން ވެސް އަލީ ވަހީދު ރާއްޖެ ވަޑައިގެންފައިނުވާތީ ފުލުހުން މެދުވެރިކޮށް އަލީ ވަހީދުގެ ޕާސްޕޯޓް އަލުން ހިފެހެއްޓުމަށް ޕްރޮސިކިއުޓާ ޖެނަރަލްގެ އޮފީހުން އެދުނެވެ. ނަމަވެސް، އެ އަމުރު ނެރެދޭނެ ތަނެއް ނެތް ކަމަށް ކުރިމިނަލް ކޯޓުން ނިންމުމުން މައްސަލަ ހައިކޯޓުގައި އިސްތިއުނާފުކުރި އެވެ.
ޕްރޮސިކިއުޓާ ޖެނަރަލްގެ އޮފީހުން ހުށަހެޅި އެ މައްސަލަ ބަލައިނުގަތުމަށް ހައިކޯޓު އޭރު ނިންމި އެވެ. އެއީ އަލީ ވަހީދުގެ ޣައިރު ހާޒިރުގައި މައްސަލަ ނުގެންދެވޭނެ ކަމަށް ބުނެ އެވެ. ހައިކޯޓުގެ އެ ނިންމުން ސުޕްރީމް ކޯޓުގައި ދައުލަތުން އިސްތިއުނާފުކުރުމުން, އެ ކޯޓުން ވަނީ އެ މައްސަލައަކީ ހައިކޯޓުން ބަލަން ޖެހޭ މައްސަލައެއް ކަމަށް ކަނޑައަޅައި, އެކަމަށް އަމުރުކޮށްފަ އެވެ.
ނަމަވެސް, ހައިކޯޓުން މައްސަލަ އަލުން ބެލުމުން ފާހަގަވީ ޕްރޮސިކިއުޓާ ޖެނަރަލްގެ ފަރާތުން ހިފަހައްޓަން އެދިފައިވަނީ ޓޫރިޒަމް މިނިސްޓަރުގެ ހައިސިއްޔަތުން އަލީ ވަހީދުގެ އަތުގައި އޮތް ޑިޕްލޮމެޓިކް ޕާސްޕޯޓް ކަމެވެ. އެއީ މިހާރު ކެންސަލްކޮށްފައިވާ ޕާސްޕޯޓަކަށްވާތީ އެ ހިފަހައްޓަން އަމުރު ނެރެގެން ނުކުންނާނެ ނަތީޖާއެއް ނޯންނާނެ ކަމަށް ހައިކޯޓުން ކަނޑައެޅި އެވެ.
ނަމަވެސް, އެ އަމުރު ނެރެނުދޭން ކުރިމިނަލް ކޯޓުން ދެއްކި ސަބަބުތައް ގޯސްކޮށް ކަމަށް ކަނޑައެޅި ހައިކޯޓުން އޮތީ ނިންމާފަ އެވެ. އެހެންވެ, އަލުން މައްސަލަ ކުރިމިނަލް ކޯޓަށް ޕްރޮސިކިއުޓާ ޖެނަރަލްގެ ފަރާތުން ހުށަހެޅީ އެވެ.
އެކަމަކު, އެ ކޯޓުން ބުނީ ޕާސްޕޯޓް ހިފަހައްޓާނެ ހާލަތެއް ނެތް ކަމަށެވެ. ހައިކޯޓުގެ ފަހުގެ ނިންމުން އައީ ކުރިމިނަލް ކޯޓުގެ އެ ނިންމުން ޕްރޮސިކިއުޓާ ޖެނަރަލްގެ ފަރާތުން އެ ކޯޓުގައި އިސްތިއުނާފުކުރުމުންނެވެ.
