ފާރޯ، ޕޯޗުގަލް (އޮކްޓޫބަރު 10) - ޔޫރަޕްގެ ގައުމީ ޓީމަކަށް އެންމެ ގިނަ މެޗު ކުޅެދިނުމުގެ ރެކޯޑް ކްރިސްޓިއާނޯ ރޮނާލްޑޯ އަށް ލިބުނު މެޗުގައި ރޭ އޭނާ ގޯލެއް ޖަހައި ގަތަރު އަތުން ޕޯޗުގަލް 3-0 އިން މޮޅުކޮށްދޭން އެހީތެރިވެދީފި އެވެ.
ރޭގެ މެޗާ އެކު އުމުރުން 36 އަހަރުގެ ރޮނާލްޑޯ ވަނީ ގައުމީ ޓީމަށް 181 މެޗު ކުޅެދީފަ އެވެ. ކުރިން ޔޫރަޕްގެ ގައުމުތަކުގެ ތެރެއިން ގައުމީ ޓީމަށް އެންމެ ގިނަ މެޗު ކުޅެދިނުމުގެ ރެކޯޑް އޮތީ ސްޕެއިނަށް 180 މެޗު ކުޅެދިން ސާޖިއޯ ރާމޯސް އަތުގަ އެވެ.
ގައުމީ ޓީމަށް އެންމެ ގިނަ މެޗު ކުޅެދިނުމުގެ ރެކޯޑް އޮތީ މެލޭޝިއާގެ ސޯ ޗިން އެން އަތުގަ އެވެ. އޭނާ ވަނީ 1984 ވަނަ އަހަރު ރިޓަޔާކުރުމުގެ ކުރިން މެލޭޝިއާ ގައުމީ ޓީމަށް 195 މެޗު ކުޅެދީފަ އެވެ.
ޕޯޗުގަލް އިން ރޭގެ މެޗުގެ ފުރަތަމަ ހާފުގައި ލީޑުނެގީ ރޮނާލްޑޯ ޖެހި ގޯލުންނެވެ. މިއީ ގައުމީ ޓީމަށް ރޮނާލްޑޯ ޖަހައިދިން 112 ވަނަ ގޯލެވެ. ގައުމީ ޓީމަށް އެންމެ ގިނަ ގޯލު ޖަހައިދިނުމުގެ ދުނިޔޭގެ ރެކޯޑް އޮތީ ރޮނާލްޑޯ އަތުގަ އެވެ. ކުރިން މި ރެކޯޑް އޮތީ 109 ގޯލު ޖަހައިގެން ލިސްޓު ކުރީގައި އޮތް އީރާންގެ ލެޖެންޑަރީ ފޯވާޑް އަލީ ދާއީ އަތުގަ އެވެ.
މެޗުގެ ދެ ވަނަ ހާފްގައި ޕޯޗުގަލްގެ އަނެއް ދެ ގޯލު ޖެހީ ފަހަތަށް ކުޅޭ ހޯސޭ ފޮންޓް އާއި އާރްބީ ލައިޕްޒިގުގެ ފޯވާޑް އަންޑްރޭ ސިލްވާ އެވެ.
ޕޯޗުގަލް ދެން ކުޅޭ މެޗުގައި އަންގާރަ ދުވަހު ބައްދަލުކުރާނީ ވޯލްޑް ކަޕް ކޮލިފައިންގައި ލަގްޒެމްބާގާ އެެެވެ.
