ކުންދޫޒް، އަފްގާނިސްތާން (އޮކްޓޯބަރު 9) - އަފްގާނިސްތާނުގެ ކުންދޫޒް ސިޓީގައި ހުކުރު ދުވަހު ޝިއައީންގެ މިސްކިތަކަށް މީހަކު އަމިއްލައަށް މަރުވެގެން ދިން ހަމަލާއެއްގައި 55 މީހުން މަރުވެއްޖެ އެވެ.
އަފްގާނިސްތާނުގެ މައިނޯރިޓީންގެ ގޮތުގައި ހިމެނޭ ޝިއައީންގެ ތެރެއިން ގިނަ ބަޔަކަށް އެ ހަމަލާގައި އަނިޔާވި އެވެ. ހަމަލާގެ ޒިންމާ އުފުލީ ތާލިބާން ސަރުކާރާ ވާދަވެރި އިސްލާމިކް ސްޓޭޓް (އައިއެސް) އެވެ.
ހަރުކަށި ފިކުރުގެ އައިއެސް އިން މީގެ ކުރިން ވެސް ވަނީ ޝިއައީންނަށް އަމާޒުކޮށް ގިނަ ހަމަލާތަކެއް ދީފަ އެވެ. އަފްގާނިސްތާނުގެ މެޖޯރިޓީއަކީ ސުންނީ މުސްލިމުންނެވެ.
އައިއެސްގެ ޓެލެގްރާމް ޗެނަލްތަކުގައި އާއްމުކުރި ބަޔާނެއްގައި ބުނީ މިސްކިތަށް ޖަމާވި ޝިއައީންގެ ތެރެއަށް ދިޔަ އައިއެސްގެ މެމްބަރަކު ގޮއްވާލީ ޖެކެޓުގައި ހަރުކޮށްފައި ހުރި ބޮމެއް ކަމަށެވެ.
ބޮން ގޮއްވައި އަމިއްލަ އަށް މަރުވި މީހާ އަކީ މުހައްމަދު އަލް އުއިގުރީގެ ގޮތުގައި އައިއެސް އިން ފާހަގަކުރި އެވެ. އޭނާއަކީ ބެލެވޭ ގޮތުގައި ޗައިނާގެ މައިނޯރިޓީ މުސްލިމް އުއިގާ ދަރިކޮޅުގެ މީހެކެވެ.
ކުންދޫޒް ޕްރޮވިންޝަލް ހޮސްޕިޓަލުން ބުނީ މަރުވެފައިވާ 35 މީހުންނާއި އަނިޔާވެފައިވާ 55 މީހުން އެ ތަނަށް ގެންދިޔަ ކަމަށެވެ. ޑޮކްޓާޒް ވިތައުޓް ބޯޑާޒް އިން ބުނީ މަރުވެފައިވާ 20 މީހުންނާއި އަނިޔާވެފައިވާ ގިނަ ބަޔަކު އެ މީހުންގެ ހޮސްޕިޓަލަށް ވެސް ގެންދިޔަ ކަމަށެވެ.
ތާލިބާން ސަރުކާރުން ކުންދޫޒް އަށް ކަނޑައަޅާފައި ހުންނަ ޑިރެކްޓާ އޮފް ކަލްޗާ އެންޑް އިންފޮމޭޝަން މަތީއުﷲ ރޯހާނީ ބުނީ ހަމަލާގައި 143 މީހުންނަށް އަނިޔާވި ކަމަށެވެ.
ތާލިބާނުން ކުންދޫޒް އަށް ކަނޑައަޅާފައި ހުންނަ ސެކިއުރިޓީ ޗީފް މައުލާވީ ދޯސްތު މުހައްމަދު ބުނީ އައިއެސް އިން އުޅެނީ ސުންނީންނާއި ޝިއައީންނާ ދެމެދު ހަމަނުޖެހުން އުފައްދަން ކަމަށެވެ.
"ޝިއައީ އަހުންނަށް ދޭން ބޭނުންވާ ޔަގީންކަމަކީ މުސްތަގުބަލުގައި އެ މީހުންނަށް ތާލިބާނުންގެ ރައްކާތެރިކަން ލިބޭނެކަން އަދި މިފަދަ މައްސަލަތަކާ ދިމާނުވާނެކަން،" އޭނާ ބުންޏެވެ.
ކުންދޫޒްގެ އާއްމުން ބުނީ ހަމަލާ ދިނީ ހުކުރު ނަމާދު ވަގުތާ ދިމާކޮށް ކަމަށާއި އޭރު މިސްކިތުގެ އެތެރޭގައި 300 އާއި 400 އާ ދެމެދުގެ އަދަދަކަށް މީހުން ތިބި ކަމަށެވެ.
