ބާލިން، ޖަރުމަނު (އޮކްޓޯބަރު 7) - އިސްލާމިކް ސްޓޭޓް (އައިއެސް) ޓެރަރިސްޓް ގްރޫޕާ ގުޅުނު އަށް އަންހެނުންނާއި އެ މީހުންނާ ގުޅުން ހުރި 23 ކުޑަކުދިން އުތުރު ސީރިއާ އިން އަނބުރާ ޖަރުމަނަށް ގެންގޮސްފި އެވެ.
މިއީ 2019 ވަނަ އަހަރަށް ފަހު އައިއެސްއާ ގުޅުން ހުރި އެހާ ގިނަ އަދަދެއްގެ ބަޔަކު އަނބުރާ ޖަރުމަނަށް ގެންދިޔަ ފުރަތަމަ ފަހަރެވެ.
"ކުޑަކުދިންނަށް ދިމާވެފައިވާ ހާލަތަށް އެ ކުދިން ޒިންމާ ނަގާކަށް ނުޖެހޭނެ. އެކަމަކު އެ ކުދިންގެ މައިންނަށް އެ މީހުންގެ އަމަލުތަކަށް ޖަވާބުދާރީ ވާން ޖެހޭނެ،" ޖަރުމަނުގެ ފޮރިން މިނިސްޓަރު ހެއިކޯ މާސް ނެރުނު ބަޔާނެއްގައި ވިދާޅުވި އެވެ.
ޖަރުމަނަށް އައުމާއެކު އޭގެ ތެރެއިން ގިނަ ބަޔަކު ބަންދުކޮށްފައިވާ ކަމަށް ބަޔާނުގައި ވެ އެވެ. ޖަރުމަނުގެ އިތުރުން ޑެންމާކުން ވެސް ވަނީ ތިން އަންހެނުންނާއި 14 ކުދިން އަނބުރާ ގެންގޮސްފަ އެވެ. އެއީ އެމެރިކާގެ އަސްކަރީ އެހީއާ އެކު ހިންގި އޮޕަރޭޝަނެކެވެ.
މާސް ވިދާޅުވީ ރައްކާތެރިކަން ބޭނުންވާ މީހުންތަކެއް، ވަކިން ހާއްސަކޮށް ކުޑަކުދިންތަކެއް، ޖަރުމަނަށް ގެނެސް އެހީވެވޭތީ އުފާކުރައްވާ ކަމަށެވެ.
"އެއީ ގިނައިން ބަލި ކުދިން ނުވަތަ ޖަރުމަނުގައި ބެލެނިވެރިއަކު ތިބި ކުދިންނާއި އެ ކުދިންގެ ބޭބެއިންނާއި ދައްތައިންނާއި މަންމައިން،" ފޮރިން މިނިސްޓްރީން ބުންޏެވެ.
އެ އެންމެން ޖަރުމަނަށް އަނބުރާ ގެންދިޔެއީ އިރުއުތުރު ސީރިއާގައި ކުރުދީން ކޮންޓްރޯލް ކުރާ ހިސާބުގައި ހުންނަ ރޯޖް ރެފިއުޖީ ކޭމްޕުންނެވެ.
ބިލްޑް ނޫހުން ރިޕޯޓު ކުރި ގޮތުގައި ފޮރިން މިނިސްޓްރީ އާއި ފުލުހުންގެ އޮފިޝަލުން ސީރިއާ އަށް ދަތުރު ކުރީ އެމެރިކާގެ އަސްކަރީ ޖެޓެއްގަ އެވެ. އެ މީހުން ގޮސް ކުޑަކުދިންނާއި އަންހެނުންތައް ގޮވައިގެން ޖެޓުގައި ކުވެއިތުގައި މަޑު ކުރުމަށް ފަހު، ފްރެންކްފާޓަށް ދިޔައީ ބުދަ ދުވަހު އެވެ.
އޭގެ ތެރޭގައި ހިމެނެނީ އުމުރުން 30 އަހަރާި 38 އަހަރާ ދެމެދު އަންހެނުންނެވެ. އެ އެންމެންނަކީ ވެސް ޖަރުމަނުގެ އެކި ހިސާބުތަކަށް ނިސްބަތްވާ އަންހެނުން ކަމަށް ޑާ ސްޕީގަލް ނޫހުން ބުންޏެވެ.
މާޗް 2019 ގައި އައިއެސްގެ ބާރު ނެތި ދިޔުމުން އެ މީހުންނާ ގުޅުން ހުރި ގައިދީންނާ މެދު އަމަލު ކުރާނެ ގޮތަކާ މެދު ގައުމުތަކުގެ މެދުގައި ހިޔާލު ތަފާތުވުން އެބަ އޮތެވެ.
ޔޫރަޕުގެ ގިނަ ގައުމުތަކުން އެ ގައުމެއްގެ ރައްޔިތުން އަނބުރާ ގެންދަނީ ވަކިވަކި ކޭސްތައް ރިވިއު ކުރުމަށް ފަހު، ހާލަތާއި ނުރައްކާ ވަޒަން ކުރުމަށް ފަހު އެވެ.
ޖަރުމަނުން އެންމެ ފަހުން މިފަދަ އޮޕަރޭޝަނެއް ހިންގީ ޑިސެމްބަރު 2020 ގައި ފިންލޭންޑްއާ އެކު އެވެ. އެ ފަހަރު ފަސް އަންހެނުންނާއި 18 ކުދިން އަނބުރާ ގެންދިޔަ އެވެ.
