ޑުބާއީ، ޔޫއޭއީ (އޮކްޓޯބަރު 6) - ޔަމަނުގެ ހަނގުރާމަ ނިމުމަކަށް ގެންނަން "ހުރިހާ ފަރާތްތަކެއް ހިމެނޭ ސިޔާސީ ހައްލަކަށް" އދ. އިން ޔަމަނަށް ކަނޑައަޅާފައި ހުންނަ ހާއްސަ މަންދޫބު ހާންސް ގްރުންޑްބާގް އެ ގައުމަށް ކުރެއްވި ފުރަތަމަ ދަތުރަށް ފަހު ގޮވާލައްވައިފި އެވެ.
ޔަމަނުގެ އުތުރުގައި އޮންނަ މުހިއްމު ސިޓީއެއް ކަމަށްވާ މަރިބް ހިފަން އިރާނުގެ ތާއީދާއެކު އުޅޭ ހޫތީންނާއި ސައުދީ އަސްކަރީ ކޯލިޝަނުން އެހީވާ ސަރުކާރުގެ ފައުޖުތައް ކުރާ ހަނގުރާމަ ވަނީ ވަރުގަދަކޮށްފަ އެވެ.
ޔަމަނުގެ އެކި ހިސާބުތަކުގައި ހަނގުރާމަ ކުރާތީ ފުރާނަ ސަލާމަތް ކުރަން ދެ މިލިއަން މީހުން މީގެ ކުރިން މަރިބް ސިޓީ އަށް ބަދަލުވި އެވެ. ނަމަވެސް މިހާރު އެ ސިޓީ ހިފަން ހަމަލާދެމުން ދާތީ އެ މީހުންނަށް ވާނެ ގޮތަކާ މެދު ބިރު އެބަ އޮތެވެ.
"ފާއިތުވާ ކޮންމެ ދުވަހަކާ އެކު ހަނގުރާމައިގެ އިންސާނީ އަދި އިގްތިސާދީ އަސަރު، ކުރިން އޮތް ގޮތަށް ރުޖޫއަކުރަން އުނދަގޫވޭ. ހަނގުރާމައާ ހެދި ޔަމަނުގެ އާއްމު ދިރިއުޅުމަކީ ބޮޑު ވޭނަކަށް ވެއްޖެ،" ގްރުންޑްބާގް ނެރުނު ބަޔާނެއްގައި ވިދާޅުވި އެވެ.
"ވަގުތުން ވަގުތަށް ޔަމަނުގެ މިސްރާބު ބަދަލު ކުރަން ޖެހޭ. ހުރިހާ ފަރާތެއް ހިމެނޭ ސިޔާސީ ހައްލަކާއެކު ހަމަނުޖެހުން ނިމުމަކަށް ގެނެސް، ޔަމަނު އަލުން ކުރިއަރަން ފުރުސަތު ދޭން ވެއްޖެ."
ގްރުންޑްބާގް ޔަމަނަށް ކުރެއްވި ފުރަތަމަ ދަތުރުގައި ބޮޑު ވަޒީރު މުއީން އަބްދުލް މާލިކް އާއެކު ގިނަ އޮފިޝަލުންނާ ބައްދަލުކުރެއްވި އެވެ. ހޫތީންގެ އަތް ދަށަށް ވެރިރަށް ސަނާ ދިޔުމާއެކު ވަގުތީ ވެރިރަށެއްގެ ގޮތުގައި ސަރުކާރު ހިންގަނީ އަދެން ގަ އެވެ.
ގްރުންޑްބާގް އާއި އަބްދުލް މާލިކް މަޝްވަރާ ކުރެއްވީ އިގްތިސާދީ ހާލަތާއި ޒަރޫރީ ހިދުމަތްތައް ފޯރުކޮށްދިނުމުގައި ހުރި ގޮންޖެހުންތަކާ ގުޅޭ ގޮތުންނެވެ.
މަރިބް ހިފަން ހޫތީންގެ އޮޕަރޭޝަން ވަރުގަދަ ކުރުމާއެކު ގިނަ އަދަދެއްގެ ހޫތީ ހަނގުރާމަވެރިންނާއި ސަރުކާރުގެ ސިފައިން ވަނީ ފާއިތުވި މަދު ދުވަސްކޮޅެއްގެ ތެރޭގައި މަރުވެފަ އެވެ. މަރިބް އަކީ ތެލުގެ މުއްސަނދިކަން އޮތް ޔަމަނުގެ އުތުރުގައި ސަރުކާރުގެ އަތުން ނުގެއްލި އޮތް ހަމައެކަނި ބޮޑު ސިޓީ އެވެ.
މަރިބް ހިފަން ހޫތީން އެންމެ ފުރަތަމަ އޮޕަރޭޝަން ވަރުގަދަ ކުރީ ފެބްރުއަރީ މަހު އެވެ. ހޫތީން ބޭނުންވަނީ ތެލުގެ މުއްސަނދިކަން އޮތް އެ ސަރަހައްދުގެ ފުރިހަމަ ކޮންޓްރޯލް ލިބިގަނެ، ސުލްހައިގެ މަޝްވަރާތަކުގައި އެ މީހުންގެ މަގާމު ވަރުގަދަ ކުރުމަށެވެ.
ސަނާއާ 120 ކިލޯމީޓަރު އިރުން އޮންނަ މަރިބް އަކީ ޔަމަނުގެ އުތުރާއި ދެކުނު ވަކިވާ ހިސާބުގައި އޮންނަ ތަނެކެވެ. ޔަމަނުގެ އުތުރުގެ ފުރިހަމަ ކޮންޓްރޯލް ހޯދަން ބޭނުން ނަމަ މަރިބް ހިފުން މުހިއްމެވެ.
ދެހާސް ސާދަ ވަނަ އަހަރު ހޫތީން ވެރިރަށް ސަނާ ހިފައި ފެށި ދާހިލީ ހަނގުރާމައާ ހެދި އެތައް ހާސް ބަޔަކު މަރުވެ، އެތައް މިލިއަން ބަޔެއްގެ ގެދޮރު ގެއްލިފައި ވެ އެވެ.
ޔަމަނުގެ އާބާދީގެ 30 މިލިއަން މީހުންގެ ތެރެއިން 80 ޕަސެންޓު މިހާރު ބަރޯސާވަނީ ބޭރުގެ އެހީ އަށެވެ. އދ. އިން ޔަމަނުގެ ހާލަތު ސިފަކުރަނީ ދުނިޔެއަށް ދިމާވެފައިވާ އެންމެ ބޮޑު އިންސާނީ ކާރިސާގެ ގޮތުގަ އެވެ.
