ރާއްޖޭން ބޭރަށް ފުރައިގެން ގޮސްފައިވާ މީހެއްގެ ޕާސްޕޯޓް ހިފަހައްޓާނެ ގާނޫނީ އިހްތިޔާރު ފަނޑިޔާރުންނަށް ލިބިފައިނުވާ ކަމަށް ކަނޑައަޅައި, ޖިންސީ ފުރައްސާރައިގެ ދައުވާތަކެއް ކޮށްފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ހިފެހެއްޓުމަށް ހައިކޯޓުން އަނެއްކާވެސް ދެކޮޅު ހަދައިފި އެވެ.
މިއީ, އަލީ ވަހީދުގެ ޕާސްޕޯޓާ ގުޅޭ ގޮތުން ހައިކޯޓުން ގޮތް ނިންމި ތިންވަނަ ފަހަރެވެ. މީގެކުރީ ދެ ފަހަރު ވެސް އަލީ ވަހީދުގެ ޕާސްޕޯޓް ހިފެހެއްޓުމުގެ އަމުރު ނެރެދީފައެއް ނުވެ އެވެ.
އަލީ ވަހީދު ފިލާފައިވާ ކަމަށް ބުނެ އޭނާގެ އޯޑިނަރީ ޕާސްޕޯޓް ހިފަހައްޓަން ޕްރޮސިކިއުޓާ ޖެނަރަލްގެ އޮފީހުން ކްރިމިނަލް ކޯޓަށް ހުށަހެޅި އެވެ. ނަމަވެސް, އެ ކޯޓުން ނިންމާފައިވަނީ އަލީ ވަހީދު މިހާރު ރާއްޖޭގައި ނެތުމުން އެ އަމުރު ނެރޭނެ ސަބަބެއް ނެތް ކަމަށެވެ. އެހެންވެ, މައްސަލަ ހައިކޯޓުގައި އިސްތިއުނާފުކުރީ އެވެ.
މިއަދު އެ މައްސަލާގައި ހައިކޯޓުން އިއްވި ހުކުމްގައި ބުނީ ޖިނާއީ އިޖުރާއަތުގެ ގާނޫނުގެ 75 ވަނަ މާއްދާގެ ދަށުން ޕާސްޕޯޓު ނުވަތަ ޓްރެވަލް ޑޮކިއުމަންޓު ހިފެހެއްޓުމުގެ ކޯޓު އަމުރެއް ހޯދުމަށް އެދެވޭނީވެސް އަދި އެފަދަ އަމުރެއް ނެރެދެވޭނީވެސް ޕާސްޕޯޓު ނުވަތަ ޓްރެވަލް ޑޮކިއުމަންޓު ހިފަހައްޓަން ބޭނުންވާ މީހާ ދިވެހިރާއްޖޭގެ އިހްތިސޯސުން ބޭރުވުމުގެ ކުރިން ކަމަށެވެ.
އެއީ, އެ އަމުރުން ހާސިލުކުރުމަށް ގާނޫނުގައި ކަނޑައަޅާފައިވާ ނަތީޖާއަކީ އެ މީހަކު ދިވެހިރާއްޖެއިން ފުރައިގެން ދިއުން މަނާކުރުން ކަމުގައިވާތީ ކަމަށް ހުކުމްގައިވެ އެވެ.
titledesc
ދިވެހިރާއްޖެއިން ފުރައިގެން މީހަކު ދިޔުމަށްފަހު، އޭނާ ފުރައިގެން ދިއުން މަނާކޮށް ޕާސްޕޯޓު ނުވަތަ ޓްރެވަލް ޑޮކިއުމަންޓު ހިފެހެއްޓުމުގެ ކޯޓު އަމުރެއް ހޯދަން އިޖުރާއަތުގެ ގާނޫނުގެ 75 ވަނަ މާއްދާގެ ދަށުން އެދެވިދާނެ ކަމަކަށް އަދި އެފަދަ އަމުރެއް އެ މާއްދާގެ ދަށުން ނެރެވިދާނެ ކަމަށް ނުފެންނަ ކަމަށް ހުކުމްގައި ބުންޏެވެ.
"މީހަކު މި ގައުމުދޫކޮށް ދިއުމަށްފަހު އެ މީހެއްގެ މައްޗަށް ޖިނާއީ އިޖުރާއަތުގެ ގާނޫނުގެ 75 ވަނަ މާއްދާގެ ދަށުން ޕާސްޕޯޓު ނުވަތަ ޓްރެވަލް ޑޮކިއުމަންޓު ހިފެހެއްޓުމުގެ ކޯޓު އަމުރެއް ނެރުމުގެ ފުރުސަތު ގާނޫނީ ހަމަތަކުން އޮތްކަން ޝަރީއަތަށް ގަބޫލުކުރެވޭފަދަ ހަމައަކުން ޕްރޮސިކިއުޝަނަށް ބަޔާންކޮށްދެވިފައިވާ ކަމަކަށް ނުދެކެން," ހުކުމްގައި ބުންޏެވެ.
ހުކުމްގައި ބުނި ގޮތުގައި, 75 ވަނަ މާއްދާގައި ބުނާ ޕާސްޕޯޓު ހިފެހެއްޓުމުގެ އަމުރަކީ ވަކި މަގުސަދަކަށްޓަކައި، ވަކިކަމެއް ކުރުން ހުއްޓުވުމުގެ ގޮތުން ނެރެވޭ އަމުރެކެވެ. އެ އަމުރަށް އެދެން ހުށަހަޅަންޖެހޭ މައުލޫމާތުތަކުންނާއި އަދި އެ އަމުރުގައި ހިމަނަންޖެހޭ އިބާރާތްތަކަށް ބެލުމުން އެ އަމުރަކީ ރާއްޖެއިން ބޭރުގައި ހުރި މީހެއްގެ މައްޗަށް ނެރެވިދާނެ އަމުރެއް ނޫންކަން ވަރަށް ސާފުކޮށް އެނގޭ ކަމަށެވެ.
"...އެހެނީ، އެ އަމުރަކީ އެމީހަކު ދިވެހިރާއްޖެއިން ފުރައިގެން ދިއުން މަނާކޮށްފައިވާކަން އަންގައި އެމީހާގެ ޕާސްޕޯޓު ނުވަތަ ޓްރެވަލް ޑޮކިއުމަންޓް ހިފެހެއްޓުމަށް މޯލްޑިވްސް އިމިގްރޭޝަނުގެ މައްޗަށްކުރާ އަމުރަކަށް ވީތީއެވެ." ހުކުމްގައިވެ އެވެ.
ކޯޓަކަށް އަމުރެއް ނެރެދެވޭނީވެސް، އެންމެ ފުރަތަމަ ކަމަކަށް، އެ އަމުރެއް ނެރެންޖެހޭ ފަދަ ހާލަތެއް ވުޖޫދުވެފައިވާނަމަ ކަމަށް ހުކުމްގައި ފާހަގަކުރި އެވެ. އެހެންވީއިރު މީހަކު ރާއްޖެއިން ގޮސް ފިލާފާނެކަމަށްޓަކައި، އެކަން ހުއްޓުވުމުގެ ގޮތުން ޖިނާއީ އިޖުރާއަތުގެ ގާނޫނުގެ 75 ވަނަ މާއްދާގެ ދަށުން އަމުރެއް ހޯދުމަށް އެދޭނަމަ، އެ މީހަކު ރާއްޖޭގެ ބޭރުވުމުގެ ކުރިން އެކަމަށް އެދެންޖެހޭނެ ކަމަށް ހައިކޯޓުން ކަނޑައެޅި އެވެ.
"ރާއްޖެދޫކޮށް ދިއުމުގެ ކުރިން އެ އަމުރު ނެރެގެން މެނުވީ އެ އަމުރު ނެރުމުގެ މަގުސަދު ހާސިލުވާނެކަމަކަށް ނުދެކެން," ހުކުމްގައިވެ އެވެ.
އެހެންވެ, އަލީ ވަހީދުގެ ޕާސްޕޯޓް ހިފަހައްޓާނެ ތަނެއް ނެތް ކަމަށް ކަނޑައަޅައި ކްރިމިނަލް ކޯޓުން ނެރެފައިވާ އަމުރު ބާތިލްކުރާނެ ތަނެއް ނެތް ކަމަށް ނިންމައި, ހައިކޯޓުން މައްސަލަ ނިންމި އެވެ. މި މައްސަލާގައި ރައުޔު ނެރުއްވީ ފަނޑިޔާރު ހަސަން ޝަފީއު އެވެ. ރައުޔަށް ފަނޑިޔާރު މުހައްމަދު ފައިސަލާއި ފަނޑިޔާރު ހުސައިން މަޒީދު ތާއީދު ކުރެއްވި އެވެ.
އަލީ ވަހީދު ހުރީ ބޭސްފަރުވާއަށް ދިޔަ ގޮތަށް އިނގިރޭސިވިލާތުގަ އެވެ. ސުޕްރީމް ކޯޓުގެ ހުރުމަތް ކަނޑާލުމުން އޭނާގެ މައްޗަށް ދެ މަހުގެ ޖަލު ހުކުމެއް ވެސް އެބަ އޮތެވެ. އެ ހުކުމް ތަންފީޒުކުރުމަށް އޭނާ ރާއްޖެ ގެނެވޭތޯ މަސައްކަތް ކުރަމުން ގެންދާކަމަށް ފުލުހުން ބުނެފައި ވެއެވެ.
އަލީ ވަހީދުގެ ޕާސްޕޯޓް ހިފަހައްޓަން ޕްރޮސިކިއުޓާ ޖެނަރަލްގެ ފަރާތުން ހައިކޯޓުގައި އެދުނު ސަބަބަކީ ވެސް އެއީ އެވެ. އެގޮތުން އެ އޮފީހުގެ ވަކީލް ވިދާޅުވެފައިވާ ގޮތުގައި އަލީގެ ޕާސްޕޯޓް ހިފެހެއްޓުމުން އޭނާ ރާއްޖެ ގެނައުމަށް މަގު ފަހިވެގެންދާނެ އެވެ.
އޭނާ ވިދާޅުވި ގޮތުގައި, ޕާސްޕޯޓް ހިފެހެއްޓުމުން އޭނާގެ ވިސާ ވެސް ކެންސަލް ވާނެ އެވެ. އެހެންވީއިރު, ގައުމެއްގެ ހިމާޔަތް ނެތްނަމަ, އޭނާއަށް ދާއިމީކޮށް އެ ގައުމެއް ނޫޅެވޭނެ ކަމަށާއި އެނބުރި ގައުމަށް އަންނަން މަޖުބޫރުވާނެކަން ވަކީލު ފާހަގަ ކުރެއްވި އެވެ.
