އިންޑިއާގެ ވެރިރަށް ނިއު ދިއްލީގައި އޯވާ-ބްރިޖެއްގެ ދަށުގައި އެއާ އިންޑިއާގެ ފްލައިޓެއް ތާށިވެފައި އޮތް މަންޒަރު ފެންނަ ވީޑިއޯއެއް ވައިރަލްވެއްޖެ އެވެ.
ބާދަގަނޑުގެ ގޮތުގައި ވިއްކާލާފައިވާ އެ ބޯޓު ބްރިޖު ދަށުގައި ތާށިވީ އެހެން ތަނަކަށް ގެންދިޔުމުގެ މަގުމަތީގައި ކަމަށް ރިޕޯޓުތައް ބުނެ އެވެ.
ވީޑިއޯ އިން ފެންނަނީ ފިޔަތައް ވަކިކޮށްފައިވާ ބޯޓު ބްރިޖު ދަށުގައި ތާށިވެފައި އޮތް އިރު، މަގުމަތިން އުޅަނދުތައް ދަތުރު ކުރާ މަންޒަރެވެ.
އެ ވީޑިއޯ ޓްވީޓު ކުރި ނޫސްވެރިޔާ، އެއާ އިންޑިއާގެ ބަޔާނަކާ ހަވާލަދީ ބުނީ އެ ބޯޓާއި އެއާ އިންޑިއާއާ އެއްވެސް ގުޅުމެއް ނެތް ކަމަށެވެ.
"އެއީ އެއާ އިންޑިއާގެ ފްލީޓުން އުނިކޮށް، ބާދަގަނޑުގެ ގޮތުގައި ވިއްކާލާފައިވާ ބޯޓެއް. ބޯޓު އެހެން ތަނަކަށް ގެންދިޔުމުގެ މަސައްކަތް ކުރީ އޭގެ އާ ވެރިފަރާތުން،" ބަޔާނުގައި ބުނެފައި ވެ އެވެ.
ދިއްލީ އެއާޕޯޓުގެ އޮފިޝަލުން ޓައިމްސް އޮފް އިންޑިއާ ނޫހަށް ބުނީ އެއީ ދިއްލީ އެއާޕޯޓު ފްލީޓުގެ ބޯޓެއް ނޫން ކަމަށާއި އޭތި ތާށިވީ އުޅަނދު ދުއްވަން އިން މީހާ އަށް އެރި އޮޅުމަކުން ކަމަށް ބެލެވޭ ކަމަށެވެ.
ޓްވިޓާ އާއި ޔޫޓިއުބުގައި އެތައް ހާސް ފަހަރަކު އެ ވީޑިއޯ ބަލާފައި ވާއިރު، ގިނަ ބަޔަކު ވަނީ ބޯޓު ތާށިވި ގޮތަކާ މެދު ސުވާލު އުފައްދާފަ އެވެ.
ބައެއް މީހުން ބުނެފައި ވަނީ ބްރިޖު ދަށުގައި ބޯޓު ތާށިވެފައި އޮންނަތާ މިހާރު ދުވަސްތަކެއް ވެއްޖެ ކަމަށެވެ. އޭގެ އިތުރުން 2019 ވަނަ އަހަރު ހިނގި މިފަދަ ހާދިސާއެއްގެ ވާހަކަ ވެސް މީހުން ދެއްކި އެވެ.
އެގޮތުން އެއާ އިންޑިއާ އިން ބޭނުން ކުރުން ހުއްޓާލި ބޯޓެއް ވެސްޓް ބެންގޯލް ސްޓޭޓުގައި ގެންދަނިކޮށް 2019 ގައި ވެސް ބްރިޖެއް ދަށުގައި ތާށިވި އެވެ.
