ނިއު ދިއްލީ، އިންޑިއާ (އޮކްޓޯބަރު 4) - މިދިޔަ އާދީއްތަ ދުވަހު ނަސާރާ ފައްޅިއެއްގައި އަޅުކަން ކުރިއަށް ދަނިކޮށް ދަނޑި އާއި ދަގަނޑު ފަދަ ހަތިޔާރު ހިފައިގެން ތިބި 200 އަށް ވުރެ ގިނަ މީހުންގެ ހިންދޫ ގްރޫޕަކުން ހަމަލާ ދީފި އެވެ.
ފައްޅީގެ ފަރާތުން ފުލުހުންނަށް ހުށަހެޅި މައްސަލާގައި ބުނީ އުއްތަރްހާންދް ސްޓޭޓުގައި ދިން އެ ހަމަލާގައި ފަސް މީހުންނަށް އަނިޔާވި ކަމަށެވެ. ފައްޅީގައި ހުރި ތަކެއްޗަށް ގެއްލުން ދިނީ ހިންދޫ ދީނުގެ އެކި ޝިއާރުތައް ގޮވަމުންނެވެ.
"ހަމަލާ ދިން ގްރޫޕުގެ ލީޑަރު ހައްޔަރު ކުރަން މި ދަނީ މަސައްކަތް ކުރަމުން. އެކަމުގައި ބައިވެރިވި އިތުރު 200 އެއްހާ މީހުން ދެނެގަތުމުގެ ތަހުގީގު ވެސް ދަނީ ކުރިއަށް،" ފުލުހުންގެ އޮފިޝަލް ވިވެކް ކުމާރް ވިދާޅުވި އެވެ.
ފައްޅީގައި މަސައްކަތް ކުރާ މީހަކު ބުނެފައި ވަނީ ހަމަލާ ދިނުމުގައި ބައިވެރިވި ގިނަ މީހުން އޭނާ އަށް އެނގޭ ކަމަށެވެ. އެ އެންމެންނަކީ ވެސް ހިންދޫ ހަރުކަށި ގްރޫޕު ބަޖްރަންގް ދަލް ފަދަ ގްރޫޕުތަކުގެ މެމްބަރުންނެވެ.
"އެ މީހުންނާ މެދު ހަރުކަށި ފިޔަވަޅު އެޅުމަށް އަޅުގަނޑުމެން ޑިމާންޑު ކުރަން،" ޓައިމްސް އޮފް އިންޑިއާ ނޫހަށް އޭނާ ބުންޏެވެ.
މި އަހަރުގެ ފެށުމާއެކު ގިނަ އަދަދެއްގެ ނަސާރާ ފައްޅިތަކަށް ހަމަލާދީފައި ވެ އެވެ. އެންމެ ގިނައިން އެފަދަ ހަމަލާ ދިނީ ޗައްޓިސްގަރް އަދި މަދްޔަ ޕްރަދޭޝް ސްޓޭޓުގަ އެވެ.
ނަސާރާ ދީނުގެ މީހުން ބުނާ ގޮތުގައި ބޮޑު ވަޒީރު ނަރެންދްރަ މޯދީގެ ހިންދޫ ބަރަތިޔަ ޖަނަތަ ޕާޓީ (ބީޖޭޕީ) އިން ވަނީ އެކި ދީންތަކާއި ނަސްލުތަކުގެ މީހުން ރައްކާތެރި ކުރުމުގައި ފެއިލްވެފަ އެވެ.
އިންޑިއާގެ 1.3 ބިލިއަން މީހުންގެ ތެރެއިން 80 ޕަސެންޓަކީ ހިންދޫންނެވެ. ނަސާރާއިންނާ ދެކޮޅަށް ހިންގާ އަމަލުތައް ހުއްޓާލުމަށް މިދިޔަ މަހު ފާދިރީން ވަނީ އިންޑިއާގެ ރައީސަށް ގޮވާލާފަ އެވެ. ނަސާރާއިންގެ އިތުރުން މުސްލިމުންނާ ދެކޮޅަށް އިންޑިއާގައި ހިންގާ ހަރަކާތްތައް ވެސް ވަނީ އިތުރުވެފަ އެވެ.
